ઓસ્ટ્રેલિયાએ ત્રીજી વનડેમાં દક્ષિણ આફ્રિકાને 276 રનથી હરાવ્યું. આ ઓસ્ટ્રેલિયાની ODI ક્રિકેટમાં રન માર્જિનથી બીજી સૌથી મોટી જીત છે. કાંગારૂ ટીમે ટ્રેવિસ હેડ, મિશેલ માર્શ અને કેમેરોન ગ્રીનની સદીઓની મદદથી 431 રનનો પહાડ બનાવ્યો હતો. જવાબમાં દક્ષિણ આફ્રિકાની ટીમ ફક્ત 155 રનમાં સમેટાઈ ગઈ. આ 2025 ની ODI માં કોઈપણ ટીમ દ્વારા સૌથી મોટી જીત છે. ઓસ્ટ્રેલિયા તરફથી 4 બેટ્સમેન બેટિંગ કરવા આવ્યા હતા અને ચારેય બેટ્સમેનોએ 50 કે તેથી વધુ રન બનાવ્યા હતા.
દક્ષિણ આફ્રિકાએ ઓસ્ટ્રેલિયા પ્રવાસનો અંત શરમજનક હાર સાથે કર્યો છે. 3 મેચની ODI શ્રેણીની પ્રથમ બે મેચમાં યજમાન ઓસ્ટ્રેલિયાને હરાવનાર દક્ષિણ આફ્રિકા ત્રીજી અને અંતિમ મેચમાં જીતનો સિલસિલો જાળવી શક્યું નહીં. છેલ્લી મેચમાં ઓસ્ટ્રેલિયાએ જબરદસ્ત વાપસી કરી અને દક્ષિણ આફ્રિકાને ખૂબ જ ખરાબ રીતે હરાવ્યું. આ રીતે દક્ષિણ આફ્રિકાના નામે ખૂબ જ શરમજનક રેકોર્ડ નોંધાયો.
વનડે ક્રિકેટ ઇતિહાસમાં સૌથી મોટી જીતનો રેકોર્ડ ભારત પાસે છે જેણે 2023 માં શ્રીલંકાને 317 રનથી હરાવ્યું હતું. હવે ઓસ્ટ્રેલિયાએ 2025 માં રનના માર્જિનથી સૌથી મોટી જીત નોંધાવી છે. અગાઉ 2025 માં સૌથી મોટી જીતનો રેકોર્ડ ઇંગ્લેન્ડ પાસે હતો જેણે મે મહિનામાં વેસ્ટ ઇન્ડીઝને 238 રનથી હરાવ્યું હતું. આ યાદીમાં વેસ્ટ ઇન્ડીઝ ત્રીજા નંબરે છે જેણે થોડા દિવસ પહેલા પાકિસ્તાનને 202 રનથી હરાવ્યું હતું.
- 276 રન – ઓસ્ટ્રેલિયા વિરુદ્ધ દક્ષિણ આફ્રિકા
- 238 રન – ઇંગ્લેન્ડ વિરુદ્ધ વેસ્ટ ઇન્ડીઝ
- 202 રન – વેસ્ટ ઇન્ડીઝ વિરુદ્ધ પાકિસ્તાન
- 197 રન – વેસ્ટ ઇન્ડીઝ વિરુદ્ધ આયર્લેન્ડ
- 174 રન – શ્રીલંકા વિરુદ્ધ ઓસ્ટ્રેલિયા
ચાર બેટ્સમેનોએ ધમાલ મચાવી
ઓસ્ટ્રેલિયા માટે ચાર બેટ્સમેનમાંથી ત્રણે સદી ફટકારી અને એકે અડધી સદી ફટકારી. ટ્રેવિસ હેડ અને મિશેલ માર્શ વચ્ચે પ્રથમ વિકેટ માટે 250 રનની ભાગીદારી હતી. હેડે 142 રન અને કેપ્ટન માર્શે 100 રન બનાવ્યા. ત્રીજા નંબરે બેટિંગ કરવા આવેલા કેમેરોન ગ્રીન 55 બોલમાં 118 રન બનાવીને અણનમ રહ્યા અને એલેક્સ કેરીએ પણ અણનમ 50 રન બનાવ્યા.
જવાબમાં જ્યારે દક્ષિણ આફ્રિકાની ટીમ લક્ષ્યનો પીછો કરવા આવી ત્યારે ડેવાલ્ડ બ્રેવિસ સૌથી વધુ રન બનાવનાર ખેલાડી હતા તેમણે 49 રનની ઇનિંગ રમી. તેમના સિવાય કોઈ બેટ્સમેન મોટી ઇનિંગ રમી શક્યો નહીં. ત્રીજી વનડે હારવા છતાં દક્ષિણ આફ્રિકાએ વનડે શ્રેણી 2-1થી જીતી લીધી.
