ગાઝીપુરઃ યુપીના ગાઝીપુર જિલ્લામાં રેલવે ટ્રેક પરથી લાકડાનો મોટો ટુકડો મળી આવતા ખળભળાટ મચી ગયો હતો. પોલીસે ગુનો નોંધી તપાસ શરૂ કરી છે. લાકડાનો આ ટુકડો સિટી સ્ટેશન પાસે રેલવે ટ્રેક પરથી મળી આવ્યો હતો, જે એન્જિનમાં ફસાઈ ગયો હતો. જેના કારણે સ્વતંત્રતા સંગ્રામ સેનાની એક્સપ્રેસમાં ટેક્નિકલ ખામી સર્જાઈ હતી અને તે લગભગ 2 કલાક સુધી ઉભી રહી હતી.
પ્રાપ્ત માહિતી અનુસાર ટ્રેક પર રાખેલ લાકડાનો ટુકડો ટ્રેનના એન્જિનમાં ફસાઈ ગયો હતો. સદ્નસીબે ડ્રાઈવરે સમયસર ટ્રેન રોકી હતી, જેના કારણે મોટી દુર્ઘટના ટળી હતી. હાલમાં ટ્રેનને પાટા પરથી ઉતારવાનું કોઈ કાવતરું છે કે કેમ તેની તપાસ કરવામાં આવી રહી છે.
કારણ કે, તાજેતરમાં કાનપુરમાં કાલિંદી એક્સપ્રેસને ઉથલાવી દેવાના ષડયંત્રનો ખુલાસો થયો હતો . અસામાજિક તત્વોએ પાટા પર ગેસ સિલિન્ડર મૂકી દીધું હતું. ગાઝીપુરમાં બનેલી આ ઘટના બાદ રેલવે એન્જિનિયરની ફરિયાદ પર પોલીસ સ્ટેશનમાં કેસ નોંધવામાં આવ્યો હતો.
એસપી સિટીએ કહ્યું છે કે થોડા દિવસો પહેલા કેટલાક લોકોએ રેલ્વે ટ્રેક પર પથ્થરના ટુકડા મુક્યા હતા, જેમાં ત્રણ લોકોની ધરપકડ કરવામાં આવી હતી. હકીકતમાં, વહેલી સવારે સ્વતંત્રતા સંગ્રામ સેનાની એક્સપ્રેસ ટ્રેન જોરદાર અવાજ સાથે રેલવે ટ્રેક પર ઉભી રહી હતી. જ્યારે ડ્રાઇવરે નજીકના ગાઝીપુર સિટી રેલ્વે સ્ટેશન પર આની જાણ કરી, ત્યારે આરપીએફ, જીઆરપી અને સિવિલ પોલીસ અને ટેક્નિકલ એન્જિનિયર્સ ઘટનાસ્થળે પહોંચ્યા.
તપાસમાં જાણવા મળ્યું કે રેલવે ટ્રેક પર લાકડાનો મોટો ટુકડો મૂકવામાં આવ્યો હતો, જે એક્સપ્રેસ ટ્રેનના પૈડામાંથી પસાર થઈને એન્જિનમાં ફસાઈ ગયો હતો. સદનસીબે ટ્રેન સાથે કોઈ મોટી દુર્ઘટના થઈ નથી. જોકે, એન્જિનમાં લાકડા ફસાઈ જવાને કારણે ટેકનિકલ ખામી સર્જાઈ હતી અને ટ્રેન લગભગ બે કલાક મોડી પડી હતી.
ગાઝીપુરના એસપી સિટી જ્ઞાનેન્દ્ર નારાયણે પણ આ ઘટનાની પુષ્ટિ કરી છે. સમગ્ર ઘટનાનું વર્ણન કરતાં તેમણે કહ્યું કે આ કોતવાલી ગાઝીપુર પોલીસ સ્ટેશનનો મામલો છે. રેલવે એન્જિનિયરની ફરિયાદ પર એફઆઈઆર નોંધવામાં આવી છે. આવી જ ઘટના ભૂતકાળમાં પણ બની હતી. ત્યારબાદ ટ્રેક પર વિશાળ બૅલાસ્ટ મૂકવામાં આવ્યો હતો. પ્રાથમિક તપાસમાં તેને ટ્રેનને પાટા પરથી ઉતારવાનું ષડયંત્ર માનવામાં આવી રહ્યું છે.
