આમ આદમી પાર્ટીના (AAP) રાષ્ટ્રીય સંયોજક અને દિલ્હીના મુખ્યમંત્રી (Delhi CM) અરવિંદ કેજરીવાલને રાઉઝ એવન્યુ કોર્ટમાંથી રાહત મળી નથી. કેજરીવાલની વચગાળાની જામીનની માંગ પર રાઉઝ એવન્યુ કોર્ટનો આદેશ 5 જૂને આવશે. જેને કારણે કેજરીવાલે આવતીકાલે આત્મસમર્પણ કરવું પડશે અને તેઓ ફરી એકવાર તિહાર જેલમાં જશે.
દિલ્હીના મુખ્યમંત્રી અરવિંદ કેજરીવાલ દારૂ કૌભાંડ કેસમાં આત્મસમર્પણ કરશે. આવતીકાલે તેમના વચગાળાના જામીનની છેલ્લી તારીખ છે. દિલ્હીની રાઉઝ એવન્યુ કોર્ટ આ કેસમાં વચગાળાના જામીન પર 5 જૂને પોતાનો ચુકાદો આપશે. આજે રાઉઝ એવન્યુ કોર્ટમાં અરવિંદ કેજરીવાલની વચગાળાની જામીનની માંગ પર સુનાવણી હાથ ધરવામાં આવી હતી. સીએમ કેજરીવાલે ખરાબ તબિયત અને મેડિકલ ટેસ્ટને ટાંકીને 7 દિવસ માટે વચગાળાના જામીન માંગ્યા હતા. EDએ કોર્ટને કહ્યું કે અમે અમારો જવાબ દાખલ કરી દીધો છે. એસજી તુષાર મહેતા અને એએસજી એસવી રાજુ વીડિયો કોન્ફરન્સિંગ દ્વારા જોડાયા હતા.
તમને જણાવી દઈએ કે 27 મેના રોજ કેજરીવાલે સુપ્રીમ કોર્ટમાં પોતાના વચગાળાના જામીન વધુ સાત દિવસ વધારવાની માંગ કરી હતી. કેજરીવાલે તેની પાછળ તેમના સ્વાસ્થ્યનું કારણ જણાવ્યું હતું. તેમણે કોર્ટને કહ્યું કે પીઈટી અને સીટી સ્કેન સિવાય તેમને કેટલાક વધુ ટેસ્ટ કરાવવાના છે. આ તમામ તપાસ માટે તેમને સાત દિવસની જરૂર છે.
નિવેદન જારી કરતી વખતે આમ આદમી પાર્ટીએ એ પણ માહિતી આપી હતી કે ધરપકડ બાદ કેજરીવાલનું વજન સાત કિલો ઘટી ગયું છે. તેનું કીટોન લેવલ ઘણું ઊંચું છે. આ કોઈ ગંભીર બીમારીના લક્ષણો હોઈ શકે છે. આવી સ્થિતિમાં કેજરીવાલ વતી અરજી દાખલ કરીને વચગાળાના જામીન સાત દિવસ વધારવાની માંગ કરવામાં આવી હતી.
ઉલ્લેખનીય છે કે દિલ્હી લિકર પોલિસી કેસમાં ઘેરાયેલા કેજરીવાલને ગયા મહિનાની શરૂઆતમાં સુપ્રીમ કોર્ટમાંથી રાહત મળી હતી. સુપ્રીમ કોર્ટે લોકસભા ચૂંટણીને ધ્યાનમાં રાખીને AAP કન્વીનરને 1 જૂન સુધી વચગાળાના જામીન આપવાનો નિર્ણય કર્યો હતો. કેજરીવાલની 21 માર્ચે ED દ્વારા દિલ્હી એક્સાઇઝ પોલિસી 2021-22માં કથિત અનિયમિતતા સંબંધિત મની લોન્ડરિંગ તપાસના સંબંધમાં ધરપકડ કરવામાં આવી હતી.
બીજી તરફ કેજરીવાલની જામીન અરજી મામલે એસજી તુષાર મહેતાએ EDનો પક્ષ રજૂ કરતા કહ્યું કે ગઈ કાલે અરવિંદ કેજરીવાલે પ્રેસ કોન્ફરન્સ કરી અને કહ્યું કે તેઓ 2 જૂને બપોરે 3 વાગે આત્મસમર્પણ કરી રહ્યા છે. આ કાયદાકીય પ્રક્રિયાનો દુરુપયોગ છે. અમે આ વાંધો ઉઠાવીએ છીએ. આ સાથે જ એએસજી રાજુએ એમ પણ કહ્યું કે જ્યારે સુપ્રીમ કોર્ટ આ મામલે વિગતવાર આદેશ આપી ચૂકી છે તો પછી કોર્ટને ગેરમાર્ગે દોરવાની શું જરૂર છે? તે કોર્ટ સમક્ષ પોતાની હકીકતો કેમ છુપાવી રહ્યા છે? ASGએ વધુમાં જણાવ્યું હતું કે આ વચગાળાના જામીન માત્ર ચૂંટણી પ્રચાર માટે હતા. તેઓએ 2 જૂને આત્મસમર્પણ કરવું પડશે. સુપ્રીમ કોર્ટે તેના અગાઉના આદેશમાં ક્યાંય એવું નથી કહ્યું કે અરવિંદ તેમના વચગાળાના જામીન લંબાવવાની માંગ કરતી અરજી દાખલ કરી શકે છે. કેજરીવાલની આ અરજી સ્વીકારવી ન જોઈએ, તેને ફગાવી દેવી જોઈએ.
આ પછી એસજી તુષાર મહેતાએ કોર્ટને કહ્યું કે સુપ્રીમ કોર્ટે પોતાના નિર્ણયમાં કહ્યું છે કે અરવિંદ કેજરીવાલે 2 જૂને સરેન્ડર કરવાનું છે. શું આ કોર્ટ સુપ્રીમ કોર્ટના નિર્ણયમાં ફેરફાર કરી શકે છે? મારી જાણકારી મુજબ ના, માત્ર સુપ્રીમ કોર્ટ જ આ કરી શકે છે. સુપ્રીમ કોર્ટે વચગાળાના જામીન આપ્યા ત્યારે પણ તેઓએ તારીખ લંબાવવાની માંગણી કરી હતી પરંતુ કોર્ટે ના પાડી દીધી હતી. મેડિકલ ટેસ્ટ કરાવવાને બદલે અરવિંદ સતત રેલીઓ કરી રહ્યા હતા. આનો અર્થ એ છે કે તે બીમાર નથી. 7 કિલો વજન ઘટાડવાનો દાવો ખોટો છે. અરવિંદનું વજન જેલમાં એક કિલો વધી ગયું હતું.
