લોસ એન્જલસની ઉત્તરે કાસ્ટેઇક લેક નજીક એક નવી જંગલી આગ ફાટી નીકળી છે, જેના લીધે હજારો લોકોને તેમના ઘરો ખાલી કરવાની ફરજ પડી છે. આ આગ થોડા જ કલાકોમાં 8,000 એકર (3,200 હેક્ટર) કરતાં વધુ વિસ્તારમાં ફેલાઈ છે. જોરદાર ફૂંકાતા પવન અને સૂકી ઝાડીઓને કારણે આગ ઝડપથી ફેલાઈ રહી છે.
મળતી માહિતી અનુસાર આગ કાસ્ટેક લેક સાન્ટા ક્લેરિટા નજીક લાગી છે. જેના કારણે 31,000 લોકોને તેમના ઘર ખાલી કરવા સૂચના આપવામાં આવી છે. આ સિવાય I5 ફ્રીવેનો એક ભાગ બંધ કરાયો છે. જો કે કેલિફોર્નિયા ફાયર વિભાગ અને એન્જલસ નેશનલ ફોરેસ્ટના કર્મચારીઓ આ આગને કાબૂમાં લેવાનો પ્રયાસ કરી રહ્યા છે. હેલિકોપ્ટર અને વિશાળ વિમાનો દ્વારા પાણી નાંખી આગ ઓલવવાનો પ્રયાસ કરવામાં આવી રહ્યો છે.
ફાયર વિભાગના જણાવ્યા અનુસાર તીવ્ર પવન, ઓછી ભેજ અને સૂકી ઝાડીઓ આગને ઝડપથી ફેલાવવામાં મદદ કરી રહી છે. આગ વેન્ચુરા કાઉન્ટીમાં ફેલાઈ શકે તેવી આશંકા છે. આ વિસ્તાર સૂકો છે અને ગાઢ બળતણ પથારીઓથી ભરેલો છે, જેના કારણે આગ વધુ ફેલાવાનું જોખમ વધી રહ્યું છે.
સ્થાનિક રહીશો માટે ગાઈડલાઈન જાહેર કરાઈ
જંગલમાં ભારે આગ લાગ્યા પછી સ્થાનિક લોકોને તેમના ઘર ખાલી કરવા માટે ઈમરજન્સીની ચેતવણી આપવામાં આવી છે. એક સ્થાનિક રહેવાસીએ કહ્યું કે હું ફક્ત પ્રાર્થના કરું છું કે અમારું ઘર બળી ન જાય. ઘટના સ્થળની નજીક સ્થિત કાસ્ટેઇકમાં પિચ ડિટેન્શન સેન્ટરને ખાલી કરાવવામાં આવ્યું હતું અને લગભગ 500 કેદીઓને અન્ય સ્થળે સ્થાનાંતરિત કરવામાં આવ્યા હતા. લોસ એન્જલસ કાઉન્ટી શેરિફે જણાવ્યું હતું કે જો પરિસ્થિતિ વધુ વણસે તો 4,600 કેદીઓને સ્થળાંતર કરવાની તૈયારી કરવામાં આવી રહી છે.
આબોહવા સંકટની અસર
જાન્યુઆરી મહિનો દક્ષિણ કેલિફોર્નિયામાં વરસાદની મોસમ માનવામાં આવે છે પરંતુ છેલ્લા 8 મહિનામાં કોઈ મોટો વરસાદ થયો નથી. તેના કારણે સર્જાયેલી દુષ્કાળની સ્થિતિએ ગ્રામ્ય વિસ્તારોને આગ પ્રત્યે વધુ સંવેદનશીલ બનાવ્યા છે. માનવીય પ્રવૃત્તિઓને કારણે આબોહવા બદલાઈ રહી છે. ભૂગર્ભ ઇંધણ બાળવાથી સરેરાશ વૈશ્વિક તાપમાન વધી રહ્યું છે, જેના કારણે દક્ષિણ કેલિફોર્નિયા જેવા વિસ્તારોમાં દુષ્કાળ અને જંગલની આગ વધી રહી છે.
