આજે શુક્રવારે કેન્દ્રીય મંત્રીમંડળે કેન્દ્ર સરકારના કર્મચારીઓ માટે મોંઘવારી ભથ્થા (DA) માં 2% નો વધારો કરવાની મંજૂરી આપી. કેન્દ્રીય મંત્રીમંડળની બેઠકમાં સરકારે આ મોટો નિર્ણય લીધો છે. આ વધારા સાથે હવે કેન્દ્રીય કર્મચારીઓ અને પેન્શનરોના મોંઘવારી ભથ્થા (DA) અને પેન્શનરોના મોંઘવારી રાહત (DR) 53 ટકાથી વધીને 55 ટકા થશે. આ વધારો 7માં પગાર પંચ હેઠળ કરવામાં આવ્યો છે.
છેલ્લો વધારો જુલાઈ 2024 માં થયો હતો, જ્યારે મોંઘવારી ભથ્થું 50 ટકાથી વધારીને 53 ટકા કરવામાં આવ્યું હતું. હવે 2 ટકાનો વધારો કરવામાં આવ્યો છે, ત્યારબાદ કર્મચારીઓના મૂળ પગારમાં 2 ટકા વધારાનો મોંઘવારી ભથ્થો ઉમેરવામાં આવશે. આ વધારો ૧ જાન્યુઆરી, ૨૦૨૫ થી અમલી માનવામાં આવશે. મોંઘવારી ભથ્થામાં વધારાથી કરોડો કર્મચારીઓ અને પેન્શનરોને ફાયદો થશે.
ઉલ્લેખનીય છે કે છેલ્લા કેટલાક વર્ષોમાં મોંઘવારી ભથ્થામાં ફક્ત 3 થી 4 ટકાનો વધારો કરવામાં આવ્યો હતો પરંતુ 78 મહિનામાં એટલે કે 6.6 વર્ષમાં પહેલીવાર મોંઘવારી ભથ્થામાં ફક્ત 2 ટકાનો વધારો કરવામાં આવ્યો છે. વર્ષ 2018 ની શરૂઆતમાં મોંઘવારી ભથ્થામાં 2 ટકાનો વધારો કરવામાં આવ્યો હતો. ત્યારથી સતત 3 કે 4 ટકાનો વધારો જોવા મળ્યો છે.
પગાર કેટલો વધશે?
જો કોઈનો મૂળ પગાર 50,000 રૂપિયા છે, તો 53% ડીએ મુજબ તેને 26,500 રૂપિયા મોંઘવારી ભથ્થું મળશે, પરંતુ 55% ડીએ મુજબ તેને 27,500 રૂપિયા મોંઘવારી ભથ્થું મળશે. એટલે કે કર્મચારીઓના પગારમાં 1,000 રૂપિયાનો વધારો થશે.
હાલમાં, 70,000 રૂપિયાના મૂળ પગાર પર મોંઘવારી ભથ્થું 37,100 રૂપિયા હશે, પરંતુ 55 ટકા ડીએ મુજબ મોંઘવારી ભથ્થું 38,500 રૂપિયા હશે. એટલે કે આવા કર્મચારીઓના પગારમાં 1,400નો વધારો થશે.
તેવી જ રીતે, 1,00,000 નો મૂળ પગાર મેળવનારાઓને 53 ટકા DA ના દરે 53,000 મોંઘવારી ભથ્થું મળતું હતું, પરંતુ હવે તેમને 55 ટકાના દરે 55,000 મોંઘવારી ભથ્થું મળશે. એટલે કે કર્મચારીઓના પગારમાં દર મહિને 2,000 રૂપિયાનો વધારો થશે.
