ઝિમ્બાબ્વેમાં ઈરાની દૂતાવાસે હોર્મુઝની સમુદ્રધુની અંગે યુએસ પ્રમુખ ડોનાલ્ડ ટ્રમ્પની ધમકીઓનો કટાક્ષભર્યા સ્વરમાં જવાબ આપ્યો છે. દૂતાવાસે જણાવ્યું હતું કે “હોર્મુઝની સામુદ્રધુનીની ચાવી ખોવાઈ ગઈ છે.”
ટ્રમ્પે ઈરાનને અલ્ટીમેટમ આપ્યું હતું જેમાં માંગ કરવામાં આવી હતી કે તે તાત્કાલિક આ દરિયાઈ માર્ગ ફરીથી ખોલે નહીં તો તેને ગંભીર લશ્કરી કાર્યવાહીનો સામનો કરવો પડશે. તેમણે ચેતવણી આપી હતી કે તેના પાવર પ્લાન્ટ અને પુલોને નિશાન બનાવવામાં આવશે અને ઈરાનને જીવંત નર્કમાં ફેરવી દેવામાં આવશે.
અન્ય ઘણા ઈરાની દૂતાવાસે પણ ટ્રમ્પની મજાક ઉડાવવા માટે સોશિયલ મીડિયાનો ઉપયોગ કર્યો છે. દક્ષિણ આફ્રિકામાં ઈરાની દૂતાવાસે કટાક્ષભર્યા જવાબમાં કહ્યું હતું કે “ચાવી ફૂલદાની નીચે છે, માર્ગ મિત્રો માટે ખુલ્લો રહે છે.”
ઈરાન વૈશ્વિક પુરવઠા શૃંખલાઓને વિક્ષેપિત કરવાની ધમકી આપી છે
ઈરાને ધમકી આપી છે કે જો અમેરિકા અને ઈઝરાયલ દ્વારા હુમલાઓ વધશે તો તે વૈશ્વિક પુરવઠા શૃંખલાઓને સંપૂર્ણપણે સ્થગિત કરી દેશે. અલ જઝીરાના અહેવાલ મુજબ ઈરાને જણાવ્યું છે કે હોર્મુઝ સ્ટ્રેટ ઉપરાંત તે અન્ય દરિયાઈ માર્ગોને પણ નિશાન બનાવી શકે છે.
ઈરાનના સુપ્રીમ લીડરના સલાહકાર અલી અકબર વેલાયતીએ જાહેર કર્યું છે કે કોઈપણ મોટા આક્રમણનો જવાબ લશ્કરી ક્ષેત્રની બહાર વિસ્તરશે જેનાથી વૈશ્વિક ઉર્જા બજારો અને વેપાર પર અસર પડશે. તેમણે ચેતવણી આપી હતી કે માત્ર હોર્મુઝ સ્ટ્રેટ જ નહીં પરંતુ બાબ-અલ-મંદેબ જેવા અન્ય મહત્વપૂર્ણ દરિયાઈ માર્ગો પણ જોખમમાં મુકાઈ શકે છે.
આ નિવેદન એવા સમયે આવ્યું છે જ્યારે યુએસ પ્રમુખ ડોનાલ્ડ ટ્રમ્પે ઈરાનને હોર્મુઝ સ્ટ્રેટને ફરીથી ખોલવા માટે અલ્ટીમેટમ જારી કર્યું છે સાથે જ કડક દંડાત્મક કાર્યવાહીની કડક ચેતવણી પણ આપી છે. આ પહેલા યમનના હુતી બળવાખોરો જેમને વ્યાપકપણે ઈરાનના નજીકના સાથી માનવામાં આવે છે તેમણે લાલ સમુદ્રમાં જતા જહાજો પર હુમલા કરવાની ધમકી આપી હતી.
