અમેરિકામાં 47મી રાષ્ટ્રપતિની ચૂંટણી માટે મતદાન શરૂ થઈ ગયું છે. રિપબ્લિકન પાર્ટી તરફથી ડોનાલ્ડ ટ્રમ્પ અને ડેમોક્રેટિક પાર્ટી તરફથી ભારતીય મૂળના કમલા હેરિસ રાષ્ટ્રપતિ પદ માટે મેદાનમાં છે. કમલા હેરિસ હાલમાં અમેરિકાના ઉપરાષ્ટ્રપતિ છે, જ્યારે ટ્રમ્પ 2017 થી 2021 સુધી રાષ્ટ્રપતિ રહ્યા છે. રાષ્ટ્રપતિની ચૂંટણી માટે મતદાન પહેલા 17 રાજ્યોમાં નેશનલ ગાર્ડ તૈનાત કરવામાં આવ્યા છે. એફબીઆઈએ ચૂંટણી પ્રક્રિયા પર નજર રાખવા માટે વોશિંગ્ટનમાં નેશનલ ઈલેક્શન કમાન્ડ પોસ્ટ પણ બનાવી છે.
અમેરિકામાં રાષ્ટ્રપતિની ઐતિહાસિક ચૂંટણી માટે મંગળવારે મતદાન થઈ રહ્યું છે. દરમિયાન યુએસ-કેનેડા સરહદને અડીને આવેલા ન્યુ હેમ્પશાયરમાં સોમવારે મધ્યરાત્રિએ રાષ્ટ્રપતિની ચૂંટણી માટે પ્રથમ મતદાન થયું હતું. ભૂતપૂર્વ રાષ્ટ્રપતિ ડોનાલ્ડ ટ્રમ્પે ચૂંટણી પ્રચારના અંતિમ દિવસે નોર્થ કેરોલિના, પેન્સિલવેનિયા અને મિશિગનમાં રેલીઓ યોજી હતી જ્યારે હેરિસે ફિલાડેલ્ફિયા અને પિટ્સબર્ગ, પેન્સિલવેનિયામાં સમર્થકોને સંબોધિત કર્યા હતા. યુનિવર્સિટી ઓફ ફ્લોરિડાની ચૂંટણી લેબ અનુસાર જે સમગ્ર યુ.એસ.માં પ્રારંભિક મતદાન અને મેલ દ્વારા મતદાનને ટ્રેક કરે છે તેના જણાવ્યા મુજબ 78 મિલિયનથી વધુ અમેરિકનો તેમના મત આપી ચૂક્યા છે.
યુએસ પ્રમુખપદ માટે મંગળવારે મતદાન થઈ રહ્યું છે અને રાત્રે હોવર્ડ યુનિવર્સિટી ડેમોક્રેટિક પાર્ટીના ઉમેદવાર કમલા હેરિસના સન્માનમાં પાર્ટીનું આયોજન કરાયું છે. અમેરિકી પ્રમુખપદની ચૂંટણીના ઈતિહાસમાં આ પ્રથમ વખત બનશે જ્યારે મતદાનની રાત્રે ઉમેદવાર માટે યુનિવર્સિટી કેમ્પસમાં પાર્ટી યોજવામાં આવશે. હેરિસે 1986માં હોવર્ડ યુનિવર્સિટીમાંથી સ્નાતક થયા હતા.
દરમિયાન અમેરિકામાં પ્રથમ ચૂંટણી પરિણામો આવી ગયા છે. જોકે આમાં ડોનાલ્ડ ટ્રમ્પ કે કમલા હેરિસમાંથી કોઈને જીત મળી નથી. ન્યૂ હેમ્પશાયરના નાના શહેર ડિક્સવિલે નોચમાં સૌપ્રથમ મતદાન શરૂ થયું. 12 વાગ્યે શરૂ થયેલું મતદાન 12.15 વાગ્યે પૂરું થયું હતું. કારણ એ હતું કે અહીં માત્ર છ લોકો રહેતા હતા. તેમાંથી કમલા હેરિસને ત્રણ અને ડોનાલ્ડ ટ્રમ્પને ત્રણ વોટ મળ્યા હતા.
ભારતમાં મતદાનનો સમય શું હશે
યુએસ પ્રમુખપદની ચૂંટણી માટે અમેરિકામાં મતદાન 5 નવેમ્બરે સ્થાનિક સમય મુજબ સવારે 6:00 થી રાત્રે 8:00 વાગ્યા સુધી મતદાન મથકો પર થશે. ભારતીય સમય મુજબ તે સમય 5 નવેમ્બરના રોજ સાંજે 4:30 વાગ્યાથી 6 નવેમ્બરના રોજ સવારે 6:30 વાગ્યા સુધીનો રહેશે.
ટ્રમ્પે જીતનો દાવો કર્યો
ડોનાલ્ડ ટ્રમ્પે તેમના પ્રચાર દરમિયાન જીતનો દાવો કર્યો હતો. પ્રચારના છેલ્લા ચૂંટણી ભાષણમાં તેમણે કહ્યું હતું કે બિડેનના વહીવટને કારણે અમેરિકન અર્થતંત્રને નુકસાન થયું છે. તેમણે કહ્યું કે અમે ચૂંટણી જીતી રહ્યા છીએ.
તામિલનાડુમાં કમલા માટે પૂજા
દક્ષિણ ભારતના રાજ્યોમાં લોકો ભારતીય મૂળની કમલા હેરિસની જીત માટે પૂજા કરી રહ્યા છે. અનેક લોકોએ કમલા માટે પ્રાર્થના કરી હતી.
મસ્કે કહ્યું- જો ટ્રમ્પ હારશે તો આ છેલ્લી ચૂંટણી હશે
ચૂંટણીમાં ટ્રમ્પનું સમર્થન કરી રહેલા ઇલોન મસ્કએ કહ્યું કે જો ટ્રમ્પ આ ચૂંટણીમાં હારી જશે તો તે અમેરિકાની છેલ્લી ચૂંટણી હશે. મસ્કે કહ્યું કે જો અમે ટ્રમ્પને પસંદ નહીં કરીએ તો દેશમાં લોકતાંત્રિક વ્યવસ્થા ખતમ થઈ જશે અને માત્ર એક જ ડેમોક્રેટિક પાર્ટી બચશે. ટ્રમ્પે સોમવારે રાત્રે મિશિગનમાં પોતાની છેલ્લી રેલીને સંબોધિત કરતા કહ્યું કે તેમની સ્પર્ધા કમલા હેરિસ સાથે નથી પરંતુ ડેમોક્રેટિક પાર્ટીની ‘રાક્ષસી સિસ્ટમ’ સાથે છે. ટ્રમ્પે તેમના સમર્થકોને તેમના ઘરની બહાર આવીને મતદાન કરવા કહ્યું.
