સુરત (Surat) : ઉધના મગદલ્લા રોડ પર સફલ સ્ક્વેરમાં આવેલી એલયુર હોટલના (Allure Hotel) માલિક ઉપર તેમના ભાણીયાના સાળાએ 5 લાખની ઉઘરાણી માટે છરી વડે હુમલો (Attack) કર્યો હોવાની ફરિયાદ ઉમરા પોલીસ સ્ટેશનમાં નોંધાઈ હતી.
- એલયુર હોટલના માલિક ઉપર 5 લાખની ઉઘરાણી માટે ભાણિયાના સાળાનો હુમલો
- હસમુખભાઈએ ભાણિયા પાસે 37 લાખનું સ્પા 27 લાખમાં લઈ હોટલ બનાવી હતી
મુળ રાજકોટમાં રામાપીર ચોકડી પાસે સ્વપ્નલોન રેસીડેન્સીમાં રહેતા 46 વર્ષીય હસમુખભાઈ ઉર્ફે મામા બાલકૃષ્ણભાઈ ગણાતરા ઉધના મગદલ્લા ખાતે આવેલા સફલ સ્ક્વેરમાં એલયુર રૂમ્સના નામે હોટલ ચલાવે છે. જ્યાં તેઓ ત્રણ વર્ષથી એકલા રહે છે. તેમનો પરિવાર રાજકોટ ખાતે રહે છે. હસમુખભાઈ અગાઉ એલ્યુર સ્પા પાર્લર ચલાવતા હતા. આ સ્પા પહેલા હસમુખભાઈનો ભાણીયો અલ્પેશ બલવંતરાય પલાણ ચલાવતો હતો. અલ્પેશનો સાળો હરદિપ વાળા પણ તેની સાથે સ્પા ચલાવતો હતો.
ત્રણ વર્ષ પહેલા હસમુખભાઈએ તેમના ભાણીયા અલ્પેશ પાસેથી 27 લાખ આપીને આ સ્પા લીધું હતું. અલ્પેશને આ સ્પા બનાવવામાં 37 લાખનો ખર્ચ થયો હતો. અલ્પેશે એક વર્ષ પહેલા આપઘાત કરી લેતા તેના સાળા હરદિપ વાળાએ હસમુખભાઈ પાસેથી અલ્પેશની 10 લાખ રૂપિયાની ઉઘરાણી શરૂ કરી હતી.
હસમુખભાઈ અલ્પેશની પત્નીને દર મહિને 50 હજાર રૂપિયા આપતા હતા. 6 હપ્તા મળી 3 લાખ તેમને આપી દીધા હતા. ડીસેમ્બરમાં હરદીપને બીજા 2 લાખ આપ્યા હતા. 5 લાખ રૂપિયા આપવાના બાકી હતા. આ 5 લાખની હરદીપ સતત ઉઘરાણી કરતો હતો. હસમુખભાઈએ થોડા થોડા કરીને 5 લાખ આપવાનું કહેતા હરદીપે એક સાથે રૂપિયા આપો કે પછી હોટલ ખાલી કરવા કહ્યું હતું.
દરમિયાન ગઈકાલે રાત્રે હસમુખભાઈ હોટલના રિસેપ્શન પર સોફા પર બેસેલા હતા ત્યારે હરદીપ વાળા પીધેલી હાલતમાં આવ્યો હતો. અને રૂમમાં બેસીને વાત કરવી છે તેમ કહેતા એક રૂમમાં ગયા હતા. હરદીપે રૂમનો દરવાજો બંધ કરી સ્ટોપર લગાવી તેના પિતાને વિડીયો કોલ કર્યો હતો. અને પૈસા બાબતે વિડીયો કોલમાં પિતાની સામે હરદીપ આજે આનુ મર્ડર કરી નાખીશ તેમ કહીને ફોન કટ કર્યો હતો. અને બાદમાં હસમુખભાઈને ગાળો આપી હતી. બાદમાં એક છરી કાઢીને હસમુખભાઈને છાતી, પેટ અને સાથળના ભાગે ઘા મારી દીધા હતા.
