ઓસ્ટ્રેલિયાના સિડનીમાં બોન્ડી બીચ પર યહૂદી સમુદાયના હનુક્કાહ ઉજવણી દરમિયાન થયેલા ભયાનક આતંકવાદી હુમલા બાદ માનવતા અને હિંમતનું એક ઉદાહરણ સામે આવ્યું છે.
વડા પ્રધાન એન્થોની અલ્બેનીઝે હોસ્પિટલમાં અહેમદ અલ-અહમદની મુલાકાત લીધી, જેમણે એક આતંકવાદી પાસેથી રાઇફલ છીનવી લેવા અને ઘણા લોકોના જીવ બચાવવા માટે પોતાનો જીવ જોખમમાં મૂક્યો હતો.
વડા પ્રધાન અલ્બેનીઝે અહેમદને ” ઓસ્ટ્રેલિયન હીરો” તરીકે વર્ણવતા કહ્યું, “અહમદ, તમે સાચા ઓસ્ટ્રેલિયન હીરો છો. તમે બીજાઓને બચાવવા માટે પોતાનો જીવ જોખમમાં મૂક્યો. બોન્ડી બીચ પર ભય તરફ દોડ્યા અને એક આતંકવાદીને નિઃશસ્ત્ર કર્યો.”
સોશિયલ મીડિયા પર પોસ્ટ કરતા અલ્બેનીઝે લખ્યું, “સૌથી અંધકારમય સમયમાં આપણે ઓસ્ટ્રેલિયનોનું શ્રેષ્ઠ પ્રદર્શન જોઈએ છીએ. રવિવારની રાત્રે પણ આવું જ હતું. દરેક ઓસ્ટ્રેલિયન વતી હું તમારો આભાર માનું છું.”
સિડની બીચ પર પિતા અને પુત્રએ હુમલો કર્યો
સિડનીના પિતા-પુત્ર સાજિદ અકરમ અને નવીદ અકરમની ઓળખ હુમલાખોરો તરીકે કરવામાં આવી છે. આ હુમલામાં ઓછામાં ઓછા 15 લોકો માર્યા ગયા હતા. પોલીસના જણાવ્યા અનુસાર, સાજિદ અકરમનું ઘટનાસ્થળે જ ગોળી મારીને મોત થયું હતું, જ્યારે તેનો 24 વર્ષનો પુત્ર, નવીદ અકરમ હોસ્પિટલમાં ગંભીર પરંતુ સ્થિર હાલતમાં છે.
નવીદ અકરમની 2019 માં પૂછપરછ કરવામાં આવી હતી
વડા પ્રધાન અલ્બેનીઝે પણ પુષ્ટિ કરી હતી કે ઓસ્ટ્રેલિયાની સ્થાનિક ગુપ્તચર એજન્સી, ASIO એ 2019 માં નવીદ અકરમની પૂછપરછ કરી હતી. અલ્બેનીઝના જણાવ્યા મુજબ શંકાસ્પદ વ્યક્તિઓ સાથેના તેના જોડાણ માટે ઓક્ટોબર 2019 માં નવીદની તપાસ કરવામાં આવી હતી, જે સમયગાળો લગભગ છ મહિના ચાલ્યો હતો. તે સમયે, તેને તાત્કાલિક ખતરો માનવામાં આવતો ન હતો.
બંદૂક લાઇસન્સ નિયમો કડક કરવામાં આવશે
આ ખુલાસા બાદ સુરક્ષા એજન્સીઓ પર સવાલ ઉઠાવવામાં આવી રહ્યા છે કે શું આ હુમલો અટકાવી શકાયો હોત. દરમિયાન, સરકારે બંદૂક કાયદાઓને વધુ કડક બનાવવાનો સંકેત આપ્યો છે. વડા પ્રધાન અલ્બેનીઝ અને રાજ્યના નેતાઓએ સ્પષ્ટતા કરી છે કે બંદૂકના લાઇસન્સ અને શસ્ત્રોની સંખ્યા અંગેના નિયમો સમગ્ર દેશમાં સુમેળમાં લાવવામાં આવશે, ખાસ કરીને હુમલાખોર પાસે કાયદેસર રીતે છ શસ્ત્રો હોવાનું બહાર આવ્યા પછી.
