શિખર ધવન, સુરેશ રૈના બાદ હવે એન્ફોર્સમેન્ટ ડિરેક્ટોરેટ (ED) એ આજે મંગળવારે તા. 16 સપ્ટેમ્બર 2025ના રોજ ભૂતપૂર્વ ક્રિકેટરો રોબિન ઉથપ્પા અને યુવરાજ સિંહ તેમજ અભિનેતા સોનુ સૂદને એક કથિત ગેરકાયદેસર ઓનલાઈન સટ્ટાબાજી એપ્લિકેશન સાથે જોડાયેલા મની લોન્ડરિંગ કેસમાં પૂછપરછ માટે સમન્સ મોકલ્યા છે.
ઈડીના અધિકારીઓએ જણાવ્યું હતું કે ‘1XBet’ નામના પ્લેટફોર્મ સાથે સંબંધિત કેસમાં ઉથપ્પા (39), યુવરાજ સિંહ (43) અને સૂદ (52) ને આગામી અઠવાડિયે પ્રિવેન્શન ઓફ મની લોન્ડરિંગ એક્ટ (PMLA) હેઠળ તેમના નિવેદનો નોંધાવવા માટે કહેવામાં આવ્યું છે. ઉથપ્પાને 22 સપ્ટેમ્બરે તેમનું નિવેદન નોંધાવવા માટે કહેવામાં આવ્યું છે, જ્યારે યુવરાજને 23 સપ્ટેમ્બરે અને સૂદને 24 સપ્ટેમ્બરે સમન્સ મોકલવામાં આવ્યા છે, એમ તેમણે જણાવ્યું હતું.
ફેડરલ તપાસ એજન્સીએ છેલ્લા કેટલાક અઠવાડિયામાં ભૂતપૂર્વ ક્રિકેટરો સુરેશ રૈના અને શિખર ધવનની પૂછપરછ કરી છે. સોમવારે આ કેસમાં તૃણમૂલ કોંગ્રેસના ભૂતપૂર્વ સાંસદ અને અભિનેત્રી મીમી ચક્રવર્તીનું નિવેદન પણ નોંધવામાં આવ્યું હતું.
સૂત્રોના જણાવ્યા અનુસાર, બંગાળી અભિનેતા અંકુશ હાજરા મંગળવારે આ કેસમાં તેમના નિર્ધારિત સમન્સ પર ED સમક્ષ હાજર થયો હતો, જ્યારે 1XBet ની ભારતની બ્રાન્ડ એમ્બેસેડર અને અભિનેત્રી ઉર્વશી રૌતેલા હજુ સુધી મંગળવારે તેમની નિર્ધારિત તારીખે હાજર થઈ નથી.
આ તપાસ કથિત ગેરકાયદેસર સટ્ટાબાજી એપ્લિકેશન્સ સાથે સંબંધિત છે, જેમણે ઘણા લોકો અને રોકાણકારો સાથે કરોડો રૂપિયાની છેતરપિંડી કરી છે અથવા મોટા પ્રમાણમાં કરચોરી કરી હોવાનું કહેવાય છે.
કંપનીના જણાવ્યા અનુસાર, 1XBet એ વૈશ્વિક સ્તરે માન્યતા પ્રાપ્ત સટ્ટાબાજીની કંપની છે જે 18 વર્ષથી આ ક્ષેત્રમાં કાર્યરત છે. કંપનીના જણાવ્યા અનુસાર, આ બ્રાન્ડના ગ્રાહકો હજારો રમતગમતની ઇવેન્ટ્સ પર સટ્ટો લગાવી શકે છે, અને કંપનીની વેબસાઇટ અને એપ્લિકેશન 70 ભાષાઓમાં ઉપલબ્ધ છે. આ એપ્લિકેશન પર લાખો વપરાશકર્તાઓ ઓનલાઇન ગેમિંગ દ્વારા સટ્ટો લગાવી રહ્યા છે.
