ઇઝરાયલ પછી ઇરાને પણ યુદ્ધવિરામની જાહેરાત કરી છે. ઇરાનની સુપ્રીમ નેશનલ સિક્યુરિટી કાઉન્સિલે આ અંગે માહિતી આપતા એક નિવેદન બહાર પાડ્યું છે. નિવેદનમાં કહેવામાં આવ્યું છે કે ઇરાને દુશ્મનને પસ્તાવો કરવા અને હાર સ્વીકારવા મજબૂર કર્યો. ઇરાને મંગળવારે ઇઝરાયલ પર નવો હુમલો કરવાનો પણ ઇનકાર કર્યો છે.
યુએસ રાષ્ટ્રપતિ ડોનાલ્ડ ટ્રમ્પે યુદ્ધના 12મા દિવસે ઇરાન અને ઇઝરાયલ વચ્ચે યુદ્ધવિરામની જાહેરાત કરી. તેમણે કહ્યું કે તે આગામી 6 કલાકમાં અમલમાં આવશે. સવારે 10:38 વાગ્યાનો નિર્ધારિત સમય પૂરો થયા પછી તેમણે બીજી પોસ્ટ કરી અને લખ્યું – “યુદ્ધવિરામ હવેથી અમલમાં આવે છે, કૃપા કરીને તેને તોડશો નહીં.”
ટ્રમ્પ પછી ઇઝરાયલી વડા પ્રધાન બેન્જામિન નેતન્યાહૂએ હુમલો બંધ કરવાની જાહેરાત કરી. તેમણે કહ્યું કે ઇઝરાયલી સેનાનો ઉદ્દેશ્ય પૂર્ણ થઈ ગયો છે. જોકે યુદ્ધવિરામ શરૂ થયાના લગભગ અઢી કલાક પછી ઇઝરાયલે ઇરાન પર મિસાઇલ હુમલાનો આરોપ લગાવ્યો. આ પછી ઇઝરાયલી સંરક્ષણ પ્રધાન ઇઝરાયલ કાત્ઝે પણ સેનાને ઈરાન સામે બદલો લેવાનો આદેશ આપ્યો છે. કાત્ઝે સેનાને તેહરાન પર જોરદાર હુમલો કરવા કહ્યું છે. જોકે ઈરાનમાં યુદ્ધવિરામ પછી કોઈ નવા હુમલાની કોઈ માહિતી નથી.
ઈરાની સેનાએ યુદ્ધવિરામ પછી મિસાઈલ હુમલાનો ઇનકાર કર્યો
ઈરાનની સેનાએ મંગળવારે ઈઝરાયલ પર કોઈ નવા હુમલાનો ઇનકાર કર્યો છે. ઈરાનના રાજ્ય ટેલિવિઝને ઈરાનના સશસ્ત્ર દળોના જનરલ સ્ટાફના નિવેદનને ટાંકીને આ જણાવ્યું છે. રાષ્ટ્રપતિ ડોનાલ્ડ ટ્રમ્પે મંગળવારે સવારે યુદ્ધવિરામની જાહેરાત કર્યાના થોડા કલાકો પછી ઈરાને ઈઝરાયલ પર મિસાઈલ છોડવાનો ઇનકાર કર્યો છે.
યુદ્ધવિરામ શરૂ થયાના લગભગ અઢી કલાક પછી ઈઝરાયલે મિસાઈલ હુમલાની માહિતી આપી હતી. ઈઝરાયલે જવાબમાં ઈરાન પર હુમલો કરવાનો આદેશ આપ્યો છે. જોકે ત્યાં કોઈ તાત્કાલિક હુમલાના સમાચાર નથી.
ઈરાને ઈઝરાયલ પર 6 વાર હુમલો કર્યો
ટ્રમ્પે યુદ્ધવિરામની જાહેરાત કર્યા પછી ઈરાનના વિદેશ મંત્રીએ તેને નકારી કાઢ્યો હતો. તેમણે કહ્યું હતું કે હજુ સુધી ઈઝરાયલ સાથે કોઈ અંતિમ યુદ્ધવિરામ કરાર થયો નથી. જો ઈઝરાયલ હુમલા બંધ કરે છે તો ઈરાન પણ હુમલો કરશે નહીં.
થોડા સમય પછી ઈરાને ઈઝરાયલ પર 6 વાર બેલિસ્ટિક મિસાઈલોથી હુમલો કર્યો. ટાઈમ્સ ઓફ ઈઝરાયલના અહેવાલો અનુસાર બેરશેબા શહેરમાં એક ઇમારત પર એક મિસાઈલ પડી. મેડિકલ ટીમે જણાવ્યું હતું કે આ હુમલામાં 5 લોકો માર્યા ગયા છે જ્યારે 20 થી વધુ ઘાયલ થયા છે.
ઈરાને કતારમાં યુએસ એરબેઝ પર મિસાઈલ છોડ્યા
ટ્રમ્પની જાહેરાતના થોડા કલાકો પહેલા જ ઈરાને કતારમાં અમેરિકાના અલ-ઉદેદ એર મિલિટરી બેઝ પર 19 મિસાઈલ છોડ્યા હતા. જોકે આ હુમલામાં કોઈ જાનહાનિ થઈ નથી કારણ કે ઈરાને હુમલા પહેલા જ આ અંગે ચેતવણી જારી કરી દીધી હતી.
ઈરાન પરમાણુ કાર્યક્રમ પુનઃસ્થાપિત કરવાની તૈયારી કરી રહ્યું છે
યુદ્ધવિરામ પછી ઈરાને તેના પરમાણુ કાર્યક્રમને પુનઃસ્થાપિત કરવાની તૈયારી શરૂ કરી દીધી છે. ઈરાની પરમાણુ ઉર્જા સંગઠનના વડા મોહમ્મદ ઇસ્લામીએ જણાવ્યું હતું કે દેશ ઇઝરાયલી અને યુએસ હુમલાઓથી તેના પરમાણુ કાર્યક્રમને થયેલા નુકસાનનું મૂલ્યાંકન કરી રહ્યું છે અને તેને સુધારવાની યોજનાઓ બનાવી રહ્યું છે.
