નવી દિલ્હીઃ અફઘાનિસ્તાન અને ન્યુઝીલેન્ડ વચ્ચેની એકમાત્ર ટેસ્ટ મેચ આજે તા. 13 સપ્ટેમ્બરે પણ રમાઈ શકી નથી. ગ્રેટર નોઈડામાં આયોજિત આ મેચ રદ કરવામાં આવી હતી. ખરાબ હવામાન અને તે ઉપરાંત ઘણી બધી ગેરવ્યવસ્થા મેચ ન યોજવાનું કારણ બની હતી. જમીન અને પિચને આવરી લેવા માટે કવર (કાર્પેટ) અને પંખા પણ ટેન્ટ હાઉસમાંથી ખરીદવામાં આવ્યા હતા.
સતત વરસાદને કારણે અફઘાનિસ્તાન વિ ન્યુઝીલેન્ડ ટેસ્ટનો 5મો અને અંતિમ દિવસ શક્ય ન હતો તેથી મેચ અધિકારીઓ દ્વારા ટેસ્ટ મેચ રદ કરવામાં આવી હતી. ગ્રેટર નોઈડા સ્પોર્ટ્સ કોમ્પ્લેક્સમાં અફઘાનિસ્તાન અને ન્યુઝીલેન્ડ વચ્ચે રમાયેલી ઐતિહાસિક વન-ઑફ ટેસ્ટ મેચ આમ 91 વર્ષમાં ભારતીય ધરતી પરની પ્રથમ ટેસ્ટ હતી જેને સંપૂર્ણપણે રદ કરવામાં આવી હતી.
ભારતે પ્રથમ વખત 1933માં મુંબઈ (જીમખાના ગ્રાઉન્ડ, બોમ્બે)માં ટેસ્ટ મેચનું આયોજન કર્યું હતું. તે પછી ભારતમાં આયોજિત ટેસ્ટ મેચમાં આવું પ્રથમ વખત બન્યું જ્યારે બોલ ફેંક્યા વિના મેચ રદ કરવામાં આવી.
એશિયાની વાત કરીએ તો ડિસેમ્બર 1998માં ફૈસલાબાદમાં રમાયેલી ટેસ્ટ મેચ ધુમ્મસને કારણે એક પણ બોલ ફેંક્યા વિના રદ કરવામાં આવી હતી. આ ટેસ્ટ મેચ પાકિસ્તાન અને ઝિમ્બાબ્વે વચ્ચે પ્રસ્તાવિત હતી.
ગ્રેટર નોઈડામાં સતત વરસાદ ટેસ્ટ મેચ ન યોજવાનું એક કારણ હતું. બીજી તરફ નબળી ડ્રેનેજ સિસ્ટમ અને સંસાધનોની અછતને કારણે પણ શરમજનક સ્થિતિ સર્જાઈ હતી. કારણ કે ગ્રાઉન્ડ સ્ટાફ પણ ભારે વરસાદથી બચાવવા માટે સમગ્ર મેદાનને આવરી લેવામાં નિષ્ફળ ગયો હતો. જ્યારે 5માં દિવસે પણ રમત શક્ય ન હતી ત્યારે અધિકારીઓએ 13 સપ્ટેમ્બરની સવારે મેચ રદ કરવાનો નિર્ણય લીધો હતો.
26 વર્ષમાં આ પ્રથમ વખત બન્યું છે કે જ્યારે કોઈ ટેસ્ટ મેચ ટોસ અને બોલ ફેંક્યા વગર રદ કરવામાં આવી હોય. છેલ્લી વખત ક્રિકેટ મેચ દરમિયાન આવું કંઈક થયું હતું જ્યારે 1998માં ડ્યુનેડિનના કેરિસબ્રુકમાં ભારત અને ન્યૂઝીલેન્ડ વચ્ચે રમાયેલી મેચ દરમિયાન થયું હતું.
