મહારાષ્ટ્રના નાગપુરથી એક ચોંકાવનારી હત્યાનો મામલો સામે આવ્યો છે. અમિતાભ બચ્ચનની ફિલ્મ ઝુંડમાં અભિનય કરનાર પ્રિયાંશુ ઉર્ફે બાબુ છેત્રીની ક્રૂરતાથી હત્યા કરવામાં આવી છે. આ ઘટના નાગપુરના જરીપટકા પોલીસ સ્ટેશન વિસ્તારના નારા વિસ્તારમાં બની હતી. ઘટનાની માહિતી મળતાં પોલીસ ઘટનાસ્થળે પહોંચીને મૃતદેહનો કબજો લીધો, તેને પોસ્ટમોર્ટમ માટે મોકલી દીધો અને કેસની તપાસ શરૂ કરી.
પોલીસના જણાવ્યા અનુસાર, પ્રિયાંશુ બુધવારે રાત્રે લગભગ 3 વાગ્યે વાયરથી બાંધેલો અને ગંભીર રીતે ઘાયલ હાલતમાં મળી આવ્યો હતો. સ્થાનિક લોકોએ તાત્કાલિક પોલીસને જાણ કરી હતી. માહિતી મળતા જ જરીપટકા પોલીસ ઘટનાસ્થળે પહોંચી હતી અને ઘાયલ અભિનેતાને માયો હોસ્પિટલમાં દાખલ કર્યો હતો. જોકે, તપાસ બાદ ડોક્ટરોએ તેને મૃત જાહેર કર્યો હતો.
પોલીસ તપાસમાં જાણવા મળ્યું છે કે પ્રિયાંશુ છેત્રી સામે અગાઉ ચોરી સહિતના ગુનાહિત કેસ નોંધાયેલા હતા. તેની બહેન શિલ્પા છેત્રીની ફરિયાદના આધારે પોલીસે હત્યાનો કેસ નોંધ્યો છે.
પોલીસે આરોપીની ધરપકડ કરી
પોલીસે આરોપી ધ્રુવ શાહુની ધરપકડ કરી છે અને પ્રાથમિક તપાસમાં હત્યા પાછળ અંગત દુશ્મનાવટ હોવાનું જણાય છે. પોલીસ હાલમાં અન્ય પાસાઓની પણ તપાસ કરી રહી છે. જરીપટકા પોલીસ સ્ટેશનના ઇન્સ્પેક્ટર અરુણ શિરસાગરે જણાવ્યું હતું કે આરોપીની પૂછપરછ કરવામાં આવી રહી છે અને ટૂંક સમયમાં સંપૂર્ણ સત્ય બહાર આવશે. આ ઘટનાથી નાગપુર શહેરમાં સનસનાટી મચી ગઈ છે .
