નવી દિલ્હી: દિલ્હીમાં ગઈકાલે બુધવારે તા. 29મી મેના રોજ રેકોર્ડ બ્રેક 52.9 ડિગ્રી એટલે કે લગભગ 53 ડિગ્રી ગરમી નોંધાઈ હતી. ઈતિહાસમાં પહેલીવાર આટલી ગરમી દિલ્હીમાં પડી છે. ગરમીથી બચવા દિલ્હીવાસીઓ સતત એરકન્ડીશનર ચલાવી રહ્યાં છે. તેના લીધે દિલ્હીમાં વીજળીનો વપરાશે પણ નવો રેકોર્ડ બનાવ્યો છે.
દરમિયાન દિલ્હીના નોઈડામાં ચોંકાવનારી ઘટના બની છે. અહીં એક બહુમાળી એપાર્ટમેન્ટમાં ACમાં વિસ્ફોટ થતા ભીષણ આગ ફાટી નીકળી છે, જેના કારણે ઘણા ફ્લેટ આગની લપેટમાં આવી ગયા છે.
આ મામલો નોઈડાના સેક્ટર 100 સ્થિત લોટસ બુલેવાર્ડ સોસાયટીનો છે. એસીમાં બ્લાસ્ટ થતાં આખા ફ્લેટમાં આગ લાગી હતી, જેના કારણે સોસાયટીમાં રહેતા લોકોમાં અફરા-તફરી મચી ગઈ હતી. નજીકના ફ્લેટમાં રહેતા લોકો તેમના ફ્લેટ છોડીને મેદાનમાં આવી ગયા હતા. ઘણા વધુ ફ્લેટમાં પણ આગ લાગવાની શક્યતા છે. લોકોએ તાત્કાલિક ફાયર વિભાગને આગની જાણ કરી હતી. હાલ આગ પર કાબૂ મેળવવાના પ્રયાસો કરવામાં આવી રહ્યા છે.
તમને જણાવી દઈએ કે બુધવારે જ નોઈડાની બાજુમાં આવેલા ગાઝિયાબાદના ઈન્દિરાપુરમમાં એક ફ્લેટમાં એસી ફાટ્યું હતું. AC ફાટતાની સાથે જ ઘરમાં આગ લાગી હતી. સારા સમાચાર એ છે કે કોઈ જાનહાનિ થઈ નથી. ફાયર વિભાગે ભારે જહેમત બાદ એક કલાકમાં આગ પર કાબુ મેળવ્યો હતો.
AC માં બ્લાસ્ટ કેમ થાય છે?
ACમાં વિસ્ફોટ થવાના ઘણા કારણો હોઈ શકે છે જેમ કે અયોગ્ય સફાઈ, નબળી ગુણવત્તાના કેબલ અને પ્લગનો ઉપયોગ, વોલ્ટેજમાં વધઘટ, ખોટા ગેસનો ઉપયોગ. એસીની સફાઈ યોગ્ય રીતે થઈ ન હોય તો તેમાં ગંદકી જમા થાય છે. તે યોગ્ય રીતે વાતાવરણ ઠંડું કરતું નથી. બીજી તરફ ઠંડક મળતી ન હોય એસી સ્વીચ ઓફ કર્યા વિના સતત ચાલતું રહે તો બ્લાસ્ટ થાય છે.
ખરાબ વાયરિંગઃ જો ACના વાયરિંગમાં વપરાતા વાયર, પ્લગ, સોકેટ અને સર્કિટ બ્રેકર સારી ગુણવત્તાના ન હોય તો તેનાથી પણ ACમાં આગ લાગી શકે છે. આવા કોઈપણ અકસ્માતથી બચવા માટે એસીમાં સારી સામગ્રીનો ઉપયોગ કરવો જરૂરી છે.
પાવર વધઘટ: એસી સાથે, અન્ય ઇલેક્ટ્રિક સામાન પણ વોલ્ટેજની વધઘટથી પ્રભાવિત થાય છે. દેશમાં વીજળીને લઈને આ એક મોટી સમસ્યા છે. જેના કારણે એસીમાં આગ પણ લાગી શકે છે.
ખોટા ગેસનો ઉપયોગઃ એર કંડિશનરમાં ખાસ પ્રકારના ગેસનો ઉપયોગ થાય છે. સામાન્ય રીતે AC માં ફ્રીઓન ગેસનો ઉપયોગ થાય છે. તે આગનું કારણ નથી, પરંતુ તે ગ્લોબલ વોર્મિંગમાં નોંધપાત્ર યોગદાન આપે છે. R410a નામનો ગેસ 2019 પછી ઉત્પાદિત નવા એસીમાં વપરાય છે, જે પુરોન છે. તે આગ પણ પકડતી નથી. જો કે, ખોટા ગેસનો ઉપયોગ કરવાથી ઓવરહિટીંગ થઈ શકે છે અને અન્ય કોઈ રીતે આગ લાગી શકે છે.
