ભારતનો અભિષેક શર્મા ICC રેન્કિંગમાં T20નો નંબર-1 બેટ્સમેન બન્યો છે. વિરાટ કોહલી અને સૂર્યકુમાર યાદવ પછી તે નંબર-1 સ્થાન મેળવનાર ત્રીજો ભારતીય બેટ્સમેન બન્યો છે. બુધવારે જાહેર કરાયેલ રેન્કિંગમાં અભિષેક શર્માના 829 પોઈન્ટ છે જ્યારે વેસ્ટ ઈન્ડિઝ સામેની 5મી T20માં ન રમવાને કારણે ટ્રેવિસ હેડના 814 પોઈન્ટ છે. આનાથી ભારતીય બેટ્સમેન નંબર-1 પોઝિશન પર પહોંચ્યો છે.
ભારતના સ્ટાર ઓપનર અભિષેક શર્મા ટ્રેવિસ હેડને પાછળ છોડીને T20નો નંબર-1 બેટ્સમેન બન્યો છે. હેડને વેસ્ટ ઈન્ડિઝ સામેની T20 શ્રેણી ન રમવાનું નુકસાન સહન કરવું પડ્યું અને તે એક સ્થાન નીચે બીજા સ્થાને આવી ગયો છે. આ અભિષેકની કારકિર્દીની શ્રેષ્ઠ રેન્કિંગ છે. એટલું જ નહીં કુલ નવ રેન્કિંગમાંથી પાંચમાં ભારતીય ખેલાડીઓનો દબદબો છે જેમાં ત્રણેય ફોર્મેટ ટેસ્ટ, ODI અને T20ની ત્રણેય શ્રેણીઓ (બેટર, બોલર અને ઓલરાઉન્ડર)નો સમાવેશ થાય છે. અભિષેક ઉપરાંત શુભમન ગિલ વનડેમાં નંબર વન બેટ્સમેન છે જ્યારે જસપ્રીત બુમરાહ ટેસ્ટ બોલરોમાં નંબર વન છે. રવિન્દ્ર જાડેજા ટેસ્ટ ઓલરાઉન્ડરોમાં નંબર વન છે અને હાર્દિક પંડ્યા ટી20 ઓલરાઉન્ડરોમાં નંબર વન છે.
અભિષેકે હેડને પાછળ છોડી દીધો
અભિષેકે ઓસ્ટ્રેલિયાના ટ્રેવિસ હેડને પાછળ છોડીને નંબર-1 સ્થાન મેળવ્યું છે. હેડ ગયા વર્ષે ટી20 વર્લ્ડ કપ દરમિયાન સૂર્યકુમારને હટાવીને ટોચ પર પહોંચ્યો હતો. હેડ તાજેતરમાં વેસ્ટ ઈન્ડિઝ સામે રમાયેલી ટી20 શ્રેણીમાંથી બહાર થઈ ગયો હતો. આ પછી તેણે નંબર-1 સ્થાન ગુમાવવું પડ્યું હતું.
ભારત વિરુદ્ધ ઈંગ્લેન્ડ શ્રેણીની છેલ્લી મેચ પહેલા ICC એ જાહેર કરેલી નવી રેન્કિંગમાં આ વખતે પણ ઘણા ઉતાર-ચઢાવ અને ફેરફારો છે. દરમિયાન જો રૂટનું નંબર વન સ્થાન અકબંધ છે. યશસ્વી જયસ્વાલને આ વખતે મોટું નુકસાન થયું છે. ઋષભ પંત એક સ્થાન આગળ વધ્યો છે. શુભમન ગિલને આ વખતે બહુ ફાયદો થયો નથી.
ICC ટેસ્ટ રેન્કિંગમાં જો રૂટ નંબર વન બેટ્સમેન
ICC એ 23 જુલાઈ સુધી અપડેટેડ ટેસ્ટ રેન્કિંગ જાહેર કર્યું છે. ઇંગ્લેન્ડના ભૂતપૂર્વ કેપ્ટન જો રૂટ 904 રેટિંગ સાથે નંબર વન સ્થાન પર છે. આ પછી ન્યુઝીલેન્ડના કેન વિલિયમસન બીજા ક્રમે આવે છે. હાલમાં તેમનું રેટિંગ 867 છે. ઇંગ્લેન્ડના હેરી બ્રુક 834 રેટિંગ સાથે ત્રીજા ક્રમે છે. સ્ટીવ સ્મિથનું રેટિંગ 816 છે અને તે ચોથા ક્રમે છે.
