નવી દિલ્હી: દિલ્હીમાં (Delhi) દારૂ કૌભાંડનો (Liquor Scam) મામલો આ દિવસોમાં દેશભરમાં ચર્ચામાં છે. સોમવારે સુપ્રીમ કોર્ટે (Supreme Court) આ કેસમાં ધરપકડ કરાયેલા દિલ્હીના પૂર્વ ઉપમુખ્યમંત્રી મનીષ સિસોદિયાની જામીન અરજી ફગાવી દીધી હતી. તે જ સમયે, EDએ મુખ્યમંત્રી કેજરીવાલને (CM Arvind Kejriwal) ગુરુવારે તેમની સામે હાજર થવા માટે સમન્સ જારી કર્યું છે. આ મામલામાં આ મહિને AAP સાંસદ સંજય સિંહની પણ ધરપકડ કરવામાં આવી હતી. જો કે સંજય સિંહ હજુ પણ જેલમાં છે.
કેજરીવાલને સમન્સ જારી કરવામાં આવ્યા બાદ આમ આદમી પાર્ટીએ આરોપ લગાવ્યો છે કે તે પાર્ટીને બરબાદ કરવાનું ષડયંત્ર છે. દિલ્હીના શિક્ષણ મંત્રી આતિશીએ કહ્યું કે, “વડાપ્રધાન મોદી અને ભાજપ AAPને ખતમ કરવા પર તત્પર છે. ચારે બાજુથી સમાચાર છે કે AAPના સંયોજક અને દિલ્હીના મુખ્યમંત્રી અરવિંદ કેજરીવાલની 2 નવેમ્બરે ધરપકડ કરવામાં આવશે. આ ધરપકડ એટલા માટે થશે કારણ કે મોદી અરવિંદ કેજરીવાલથી ડરી ગયા છે.”
17 નવેમ્બર 2021 ના રોજ, દિલ્હી સરકારે રાજ્યમાં નવી દારૂ નીતિ લાગુ કરી. આ અંતર્ગત રાજધાનીમાં 32 ઝોન બનાવવામાં આવ્યા હતા અને દરેક ઝોનમાં વધુમાં વધુ 27 દુકાનો ખોલવાની હતી. આ રીતે કુલ 849 દુકાનો ખોલવાની હતી. નવી દારૂની નીતિમાં દિલ્હીની તમામ દારૂની દુકાનોને ખાનગી બનાવી દેવામાં આવી છે. આ પહેલા દિલ્હીમાં દારૂની 60 ટકા દુકાનો સરકારી અને 40 ટકા ખાનગી હતી. નવી નીતિના અમલ પછી, તે 100 ટકા ખાનગી થઈ ગઈ. સરકારે દલીલ કરી હતી કે આનાથી રૂ. 3,500 કરોડનો ફાયદો થશે.
સરકારે લાઇસન્સ ફીમાં પણ અનેક ગણો વધારો કર્યો છે. એલ-1 લાયસન્સ માટે, જેના માટે અગાઉ કોન્ટ્રાક્ટરોએ રૂ. 25 લાખ ચૂકવવાના હતા, નવી દારૂની નીતિના અમલ પછી, કોન્ટ્રાક્ટરોએ રૂ. 5 કરોડ ચૂકવવાના હતા. તેવી જ રીતે, અન્ય કેટેગરીમાં પણ લાઇસન્સ ફીમાં નોંધપાત્ર વધારો થયો છે. નવી દારૂની નીતિથી જનતા અને સરકાર બંનેને નુકસાન થવાનો આરોપ છે. સાથે જ દારૂના મોટા વેપારીઓને ફાયદો થતો હોવાનું કહેવાય છે. ભારતીય જનતા પાર્ટીનો આ આરોપ છે.
