વડોદરા: શહેરના આજવા રોડ સ્થિત એકતાનગરમાં રહેતા યુવકનું મોબાઈલ ફોનની ચોરીમાં નામ ઉછાળવા બદલ શખ્સે સાથે બોલાચાલી થઈ બાદ માથાભારે તત્વોએ બેલ્ટ અને ચાકુ વડે હુમલો કરતા યુવક ગંભીર રીતે ઘવાયો હતો. સીટી પોલીસે ચાર હુમલાખોરો વિરુદ્ધ ગુનો નોંધી વધુ તપાસ હાથ ધરી છે. શહેરના આજવા રોડ સ્થિત એકતાનગરમાં રહેતા મુસ્તકીય શેખ શુક્રવારે મિત્રની પત્નીએ પુત્રને જન્મ આપતા તેઓની ખબર પૂછવા જમનાબાઈ હોસ્પિટલમાં ગયા હતા. ત્યારે રામપાર્ક સોસાયટીમાં રહેતો જાફર પણ ત્યાં હાજર હતો. અગાઉ રમીઝ નામના યુવકે ઝફરનો મોબાઈલ લઇ લીધો હતો. અને તેમાં મુસ્તકીય શેખનું નામ ઉછાળ્યું હતું.
આ બાબત અંગે મુસ્તકીય શેખ સુધી વાત આવી પહોંચતા મુસ્તકીય શેખ સાંજના સમયે ભેંસવાડા ખાતે રમીઝને મળવા ગયા હતા. જ્યાં રમીઝ અને મુસ્તકીય શેખની તું તું મે મે થયા બાદ રમીઝે મુસ્તકીય શેખને ગળદાપાટુનો માર માર્યો હતો. ત્યારબાદ રમીઝ સમાધાન કરવાના નામે રિક્ષામાં મુસ્તકીય શેખને બેસાડી હાથીખાના વિસ્તારમાં લઇ ગયો હતો. જ્યાં અન્ય બે સાગરીતોએ મુસ્તકીય શેખ ઉપર ચાકુ અને બેલ્ટ વડે હુમલો કરતા ગંભીર ઈજાઓ પહોંચી હતી. દરમિયાન વચ્ચે છોડવવા પડેલા યુવક ઉપર પણ હુમલો કરવામાં આવ્યો હતો.
