થાઇલેન્ડની રાજધાની બેંગકોકમાં એક વ્યસ્ત રસ્તો અચાનક જમીનમાં ધસી ગયો, જેના કારણે 50 મીટર ઊંડો ભૂવો બની ગયો હતો. થાઇલેન્ડની વજીરા હોસ્પિટલની આસપાસનો વિસ્તાર ખાલી કરાવવો પડ્યો અને વિશાળ ખાડાને કારણે વાહનવ્યવહાર સંપૂર્ણપણે બંધ કરી દેવામાં આવ્યો હતો. કેટલાક વાહનો અથડાયા અને રસ્તા પરના વીજળીના થાંભલા પણ નીચે પડી ગયા હતા.
સાઉથ ચાઇના પોસ્ટ અનુસાર, આ ઘટના બુધવારે વહેલી સવારે બની હતી જ્યારે બેંગકોકની એક હોસ્પિટલની સામે 50 મીટર ઊંડો ભૂવો પડ્યો હતો, જેમાં કાર અને વીજળીના થાંભલા સમાઈ ગયા હતા. આ ઘટનાએ શહેરના રહેવાસીઓને સ્તબ્ધ કરી દીધા હતા અને નજીકના ભૂગર્ભ રેલ્વે સ્ટેશનને આ અકસ્માત માટે જવાબદાર ઠેરવવામાં આવી રહ્યું છે.
થાઈ રાજધાનીના ઐતિહાસિક જૂના શહેરમાં સેમસેન રોડ પર વજીરા હોસ્પિટલની આસપાસ સવારે 7 વાગ્યે સ્થાનિક અધિકારીઓએ રસ્તાઓ બંધ કરી દીધા હતા. કારણ કે આ વિસ્તારમાં એક વિશાળ ખાડો પડી ગયો હતો અને પાઇપલાઇનમાં ભંગાણ પડવાથી પાણીનો પ્રવાહ વહેતો હતો જ્યારે તૂટી પડેલા વીજ લાઇનોમાંથી ખતરનાક તણખા નીકળતા હતા.
રસ્તાની બાજુની ઇમારતો પણ જોખમમાં છે. જાહેર હોસ્પિટલની સામે આશરે 30×30 મીટર પહોળો અને 50 મીટર ઊંડો ખાડો બન્યો હતો. કોઈ પણ અનિચ્છનીય ઘટના ન બને તે માટે નજીકના એપાર્ટમેન્ટના રહેવાસીઓ અને હોસ્પિટલના દર્દીઓને બહાર કાઢવામાં આવ્યા હતા. અચાનક ખાડો પડ્યો ત્યારે રસ્તા પર ઘણા વાહનો હતા અને રસ્તો જમીનમાં ધસી ગયો હોવાનું જોઈને લોકો ઝડપથી પાછળ હટી ગયા હતા.
અગાઉ, થાઇલેન્ડના રાજ્ય સમાચાર બ્યુરો દ્વારા જારી કરાયેલા એક નિવેદનમાં કહેવામાં આવ્યું હતું કે સિંકહોલ વિસ્તરી રહ્યો છે પરંતુ કોઈ ઈજાગ્રસ્ત થયાના અહેવાલ નથી. અહેવાલમાં જણાવાયું છે કે કટોકટી અને એન્જિનિયરિંગ ટીમો વિસ્તારને સાફ કરવા અને વધુ નુકસાન અટકાવવા માટે કામ કરી રહી છે. સ્ટેશન બંધ કરવામાં આવ્યું છે કારણ કે સિંકહોલ સમગ્ર માળખા માટે ખતરો છે અને મુસાફરો માટે ચિંતા ઉભી કરે છે.
સોશિયલ મીડિયા પર શેર કરાયેલી તસવીરોમાં સિંકહોલ ફૂટપાથને ગળી જતા કારથી માત્ર થોડા મીટર પાછળ ફરી રહી હોય તેવું દેખાઈ રહ્યું છે, જેના કારણે ભૂગર્ભમાં ઊંડી ખાઈ બની ગઈ છે. આગામી દિવસોમાં મેકોંગ ડેલ્ટા દેશમાં સુપર ટાયફૂન રાગાસા ત્રાટકશે ત્યારે બેંગકોકમાં ભારે વરસાદની અપેક્ષા હોવાથી સિંકહોલ આવ્યો છે..
બેંગકોકના ગવર્નર ચૅડચાર્ટ સિટ્ટીપુન્ટે જણાવ્યું હતું કે અકસ્માતમાં કોઈને ઈજા થઈ નથી પરંતુ ત્રણ વાહનોને નુકસાન થયું છે. તેમણે ઉમેર્યું હતું કે અધિકારીઓ માને છે કે આ અકસ્માત ભૂગર્ભ રેલ્વે સ્ટેશન પર બાંધકામના કામને કારણે થયો હતો. હોસ્પિટલે જાહેરાત કરી છે કે તે બે દિવસ માટે બહારના દર્દીઓની સેવાઓ બંધ રાખશે.
બેંગકોક શહેરના અધિકારીઓએ જણાવ્યું હતું કે હોસ્પિટલની ઇમારતને નુકસાન થયું છે અને લોકોને પોલીસ સ્ટેશન અને નજીકની અન્ય ઇમારતો ખાલી કરવાનો આદેશ આપવામાં આવ્યો છે. ગવર્નરે જણાવ્યું હતું કે ભારે વરસાદને કારણે વધુ નુકસાન થવાની ધારણા હોવાથી સત્તાવાળાઓ શક્ય તેટલી ઝડપથી ખાડાને સુધારવા માટે કામ કરી રહ્યા છે. હાલમાં બેંગકોકમાં ચોમાસાની ઋતુ છે.
