રાજ્યમાં નશાની હાલતમાં વાહનો બેફામ હંકારીને નબીરાઓએ કાળો કહેર વર્તાવી રહ્યાં છે ત્યારે નશાની હાલતમાં વાહનો શહેરની અંદર ચલાવતાં તત્વો પણ માસૂમોના જીવ માટે ખતરા સમાન છે. શહેરના ગોડાદરા વિસ્તારમાં નશાની હાલતમાં એક કાર ચાલકે સોસાયટીના લોખંડના ગેટ સાથે કાર અથડાવી હતી. આ એક્સિડેન્ટના લીધે લોખંટનો ગેટ નીચે પડ્યો હતો. આ ગેટ નજીકમાં રમતી બાળકી પર પડતાં તેનું મોત નિપજ્યું હતું.
ગોડાદરા વિસ્તારમાં આવેલા સુડા સહકાર આવાસના ગેટ નજીક બાળકો રમી રહ્યાં હતાં. આ દરમિયાન એક 4 વર્ષની બાળકી ગેટની નજીક ઉભી હતી. સિક્યુરિટી ગાર્ડની દીકરી ઉભી હતી. ત્યારે એક નશામાં બેફામ થયેલા ચાલક કાર લઈને પસાર થઈ રહ્યો હતો. જેણે સ્ટિયરીંગ પરથી કાબુ ગુમાવી કારને ગેટ સાથે અથડાવી હતી. જેથી લોખંડનો ભારે ભરખમ ગેટ પડી ગયો હતો. જે બાળકી પર પડતાં કચડાઈ ગઈ હતી.આટલું બાકી હોય તેમ આડા પડેલા ગેટ પર પણ ચાલકે કાર ચડાવી દીધી હતી. જેથી બાળકી વધારે કચડાઈ ગઈ હતી.
બાળકી પર ગેટ પડ્યા બાદ પણ નશાખોર કાર ચાલક કાર અટકાવતો નથી અને સોસાયટીમાં અંદર પ્રવેશ કરે છે. લોકોએ દોડી જઈ તેને રોક્યો હતો અને પકડી પોલીસને સોંપ્યો હતો. આ તરફ ઘટનાની જાણ થતા પોલીસ ઘટના સ્થળે દોડી ગઈ હતી. પોલીસે કાર ચાલક હરેશ ઓળખીયાની ધરપકડ કરી લીધી છે. સાપરાધ મનુષ્ય વધની કલમ સાથે તેની કાર જપ્ત કરવામાં આવી છે.
સુડા સહકાર આવાસમાં સિક્યુરિટી તરીકે કામ કરતાં ગાર્ડની દીકરી કચડાઈ ગઈ હતી. જેથી તાત્કાલિક લોકોએ એકઠા થઈને ચાલકને ઝડપી લીધો હતો. જે નશામાં હતો. બાદમાં કાર ચાલકને લોકોએ પોલીસને હવાલે કર્યો હતો. હાલ પોલીસે આરોપીની ધરપકડ કરીને વધુ તપાસ હાથ ધરી છે.
