નવસારી: (Navsari) નવસારીમાં મુંબઈના (Mumbai) આધેડે પ્રેમિકાના પતિને (Husband) તેના જ ઘરે હાથ બાંધી માર માર્યો હતો. તે સમયે પ્રેમિકા ઘરે આવી જતા પ્રેમિકાને પણ માર માર્યો હતો. ત્યારે પ્રેમિકાએ તેના પ્રેમીની પત્નીને ફોન કરીને જાણ કરતા પ્રેમીએ (Lover) તેના બંને હાથની નસ કાપી નાખતા મામલો નવસારી ગ્રામ્ય પોલીસ (Police) મથકે નોંધાયો છે. પ્રેમીએ તેના બે સાગરિતો સાથે આવી પ્રેમિકા પર પણ છરાથી હુમલો કર્યો હતો જેથી પ્રેમિકાએ પ્રેમીની પત્નીને જાણ કરતાં તે ગભરાયો હતો.
નવસારીના કબીલપોર ગામે અમીષ નગર સોસાયટીમાં નીલમબેન ભવ્યભાઈ દેસાઈ તેમના પરિવાર સાથે રહે છે. છેલ્લા ઘણા સમયથી નીલમબેન તેમજ મૂળ ભાવનગર તાલુકાના કણબીવાડ ચાચરની શેરી અને હાલ મુંબઈ થાણા મીરા રોડ ઇસ્ટ આકાર બિલ્ડીંગ ક્નેકીયા રોડ પર રહેતા અતુલભાઈ વિજયકાંત પટેલ સાથે પ્રેમ સંબંધ હતો. જોકે નીલમબેન અને અતુલભાઈ પરણેલા હોવાથી તેમના પ્રેમપ્રકરણ બાબતે પરિવારજનોને જાણ થઈ ગઈ હતી. જેથી તેઓનું વૈવાહિક જીવન માટે પરિવારજનોએ મળી આ બાબતે સમાધાન કરી તેઓને છુટા કર્યા હતા. પરંતુ ત્યારબાદ પણ નીલમબેન અને અતુલભાઈ વચ્ચે વાતચીત ચાલી રહી હતી. ગત ૪થીએ અતુલભાઈ મુંબઈથી હિરેન અને બે અજાણ્યા ઈસમો સાથે નીલમબેનના ઘરે આવ્યો હતો. જ્યાં નીલમબેનના પતિ ભવ્યભાઈ હાજર હતા. દરમિયાન તેઓ વાતચીત કરી રહ્યા હતા.
દરમિયાન મામલો ઉગ્ર બનતા અતુલભાઈ, હિરેન અને બે અજાણ્યા ઇસમોએ ભવ્યભાઈના પટ્ટીથી હાથ બાંધી તથા મોઢા પર પટ્ટી લગાવી માર મારી રહ્યા હતા. ત્યારે ભવ્યભાઈનો પુત્ર ઘરે પહોંચતા તેણે માતા નીલમબેનને ફોન કરી જાણ કરી હતી. જેથી નીલમબેન ઘરે પહોંચી ગયા હતા અને અતુલભાઈ સાથે વાત કરી રહ્યા હતા. પરંતુ અતુલભાઈએ એકાએક નીલમબેન ઉપર છરાથી હુમલો કરી હાથના ભાગે ઈજા પહોંચાડી હતી.
સાથે જ લાકડીથી માથાના ભાગે અને શરીરે ફટકો મારી અપશબ્દો બોલી જાનથી મારી નાંખવાની ધમકી આપી હતી. આ ઘટના બાબતે નીલમબેને અતુલભાઈની પત્નીને જાણ કરતા અતુલભાઈ ગભરાયા હતા અને તેમણે તેમના બંને હાથની નસ કાપી નાંખી હતી. જોકે અતુલભાઈને તાત્કાલિક સારવાર અર્થે નવસારી સિવિલ હોસ્પિટલમાં ખસેડ્યા હતા. જયારે નીલમેબેને નવસારી ગ્રામ્ય પોલીસ મથકે અતુલભાઈ, હિરેન અને અજાણ્યા બે ઈસમો વિરૂદ્ધ ફરિયાદ નોંધાવતા આગળની તપાસ પી.એસ.આઈ. એસ.બી. ટંડેલે હાથ ધરી છે.
