નવી દિલ્હી: ઉત્તરાખંડ (Uttarakhand)માં ફરી ભારે વરસાદ (Heavy rain)થી સામાન્ય માણસનું જીવન કંગાળ બની ગયું છે. વરસાદને કારણે ઘણા વિસ્તારોમાં ભારે નુકસાન થયું છે, જખાન નદી (Jakhan river) પરના પુલનો એક આખો ભાગ તૂટી પડ્યો છે.
પુલ તૂટી પડવાના કારણે અનેક વાહનોને નુકસાન થયું છે. જો કે અત્યાર સુધી કોઈ જાનહાનિની જાણ થઈ નથી પરંતુ શહેરમાં અને રાજ્યના ઘણા ભાગોમાં પણ પરિવહન ખરાબ રીતે પ્રભાવિત થયું છે. રાણીપોખરી (Ranipokhari) માં, દેહરાદૂન-રીષિકેશ હાઈવે (Dehradun-Rishikesh highway) પર જખાન નદી પરના પુલનો કેટલોક ભાગ તૂટી પડ્યો અને નદીમાં પડ્યો. ઘટનાસ્થળ પરથી મળેલી તસવીરોમાં કાટમાળ નીચે ફસાયેલા અનેક વાહનો અને લોકો ભાગતા જોવા મળ્યા છે. સ્ટેટ ડિઝાસ્ટર રિસ્પોન્સ ફોર્સ (SDRF) ની રેસ્ક્યુ અને ડીપ ડાઇવિંગ ટીમ ઘટના સ્થળે પહોંચી છે. સમાચાર એજન્સી ANI ના રિપોર્ટમાં કહેવામાં આવ્યું છે કે બચાવ અને રાહત કામગીરી ચાલુ છે. જિલ્લા મેજિસ્ટ્રેટ આર રાજેશ કુમારે જણાવ્યું હતું કે રૂટ પર ટ્રાફિક બંધ કરી દેવામાં આવ્યો છે.
અન્ય એક ઘટનામાં, દેહરાદૂનમાં સતત વરસાદને પગલે માલદેવતા-સહસ્ત્રધારા લિંક રોડનો ભાગ તૂટી પડ્યો અને નદીમાં ડૂબી ગયો. દરમિયાન, તપોવનથી મલેથા સુધીનો નેશનલ હાઇવે 58 આ વિસ્તારમાં ભારે વરસાદને કારણે બંધ કરી દેવામાં આવ્યો છે, એમ ટિહરી-ગઢવાલ જિલ્લાના અધિકારીઓએ જણાવ્યું હતું. રાજ્ય પોલીસે જણાવ્યું છે કે રીષિકેશ-દેવપ્રયાગ, રીષિકેશ-ટિહરી અને દેહરાદૂન-મસૂરી રસ્તાઓ પણ છેલ્લા 3-4 દિવસમાં વરસાદ બાદ ઘણી જગ્યાએ ભૂસ્ખલનને કારણે બંધ થઈ ગયા છે. હવામાન સામાન્ય ન થાય ત્યાં સુધી લોકોને આ વિસ્તારમાં મુસાફરી ન કરવાની ચેતવણી આપવામાં આવી છે. શહેરમાં ભારે વરસાદ વચ્ચે એસડીઆરએફની ટીમો દહેરાદૂનમાં બચાવ કામગીરી હાથ ધરી રહી છે. રાજ્યમાં તાજેતરના વર્ષોમાં કુદરતી આફતોને કારણે જાન -માલનું ભારે નુકસાન થયું છે.
2013 માં, વાદળ ફાટવાથી સર્જાયેલા વિનાશક પૂર અને ભૂસ્ખલને પુરા ઉત્તરાખંડને હચમચાવી દીધા હતા. આ દુર્ઘટનામાં 5,700 થી વધુ લોકો મૃત્યુ પામ્યા હતા. આવી જ બીજી એક ઘટના 2016 માં બની હતી, જેમાં લગભગ 30 લોકો માર્યા ગયા હતા. 2021 માં, ગંગાની કેટલીક ઉપનદીઓમાં હિમપ્રપાતના કારણે આવેલા પુરમાં 200 થી વધુ લોકોએ જીવ ગુમાવ્યા હતા.
