કોંગ્રેસ હાઇકમાન્ડ સાથેના મતભેદો વચ્ચે શશિ થરૂરે ગુરુવારે કોંગ્રેસ પ્રમુખ મલ્લિકાર્જુન ખડગે અને લોકસભામાં વિરોધ પક્ષના નેતા રાહુલ ગાંધી સાથે મુલાકાત કરી. ત્રણેય નેતાઓ વચ્ચેની મુલાકાત સંસદ ભવનમાં ખડગેના કાર્યાલયમાં થઈ હતી. આ મુલાકાત થરૂરે તાજેતરમાં કેરળ વિધાનસભા ચૂંટણીની તૈયારી માટે બોલાવવામાં આવેલી અખિલ ભારતીય કોંગ્રેસ સમિતિ (AICC) ની મહત્વપૂર્ણ બેઠકમાં ભાગ ન લીધા બાદ થઈ હતી. જોકે થરૂરે જણાવ્યું હતું કે તેમણે પાર્ટીના નેતાઓને અગાઉથી જાણ કરી દીધી હતી કે તેઓ કેરળ સાહિત્ય મહોત્સવમાં હાજરી આપવાના હોવાથી તેઓ આ બેઠકમાં હાજરી આપી શકશે નહીં.
રાહુલ અને ખડગેને મળ્યા પછી થરૂરે સોશિયલ મીડિયા વેબસાઇટ X પર બંને નેતાઓ સાથેની મુલાકાતનો ફોટો પોસ્ટ કર્યો, જેમાં લખ્યું, “આજે વિવિધ વિષયો પર સાર્થક ચર્ચા કરવા બદલ કોંગ્રેસના રાષ્ટ્રીય અધ્યક્ષ મલ્લિકાર્જુન ખડગેજી અને લોકસભામાં વિરોધ પક્ષના નેતા રાહુલ ગાંધીજીનો આભાર. ભારતના લોકોની સેવામાં આગળ વધતાં આપણે બધા એક જ પાના પર છીએ. હું બીજું શું કહી શકું? મેં હંમેશા પાર્ટી માટે પ્રચાર કર્યો છે. મેં ક્યાં પ્રચાર નથી કર્યો?” કેરળના મુખ્યમંત્રી પદ વિશે પૂછવામાં આવતા, તેમણે કહ્યું, “ના, તેની ક્યારેય ચર્ચા થઈ નથી. મને કોઈ પણ વસ્તુ માટે ઉમેદવાર બનવામાં કોઈ રસ નથી. હું પહેલેથી જ સાંસદ છું, અને તિરુવનંતપુરમના મારા મતદારો મારા પર વિશ્વાસ કરે છે. મારે સંસદમાં તેમના હિતોનું ધ્યાન રાખવું પડશે; તે મારું કામ છે.”
થરૂર તેમના નવા પુસ્તક, “શ્રી નારાયણ ગુરુ” પર બોલવા માટે કેરળ સાહિત્ય મહોત્સવમાં હતા. દરમિયાન 24 જાન્યુઆરીએ થરૂરે સ્પષ્ટપણે સંકેત આપ્યો કે તેમની અને પાર્ટી વચ્ચે કેટલાક “મુદ્દાઓ” છે અને તેઓ પાર્ટી નેતૃત્વ સાથે તેમની ચર્ચા કરવા માંગે છે. તેમણે કહ્યું, “મુદ્દાઓ ગમે તે હોય મારે પાર્ટી નેતૃત્વ સાથે ચર્ચા કરવાની જરૂર છે અને હું તે કરવાની તક શોધી રહ્યો છું. હું આ બાબતે જાહેરમાં ટિપ્પણી કરીશ નહીં.” જોકે તેમણે ઉમેર્યું કે કેટલાક મીડિયા અહેવાલો કે તેઓ બેઠક છોડી રહ્યા છે તે સાચા હોઈ શકે છે જ્યારે અન્ય ન પણ હોય,” પરંતુ આવી બાબતોની જાહેર મંચ પર ચર્ચા થવી જોઈએ નહીં.
કોંગ્રેસ નેતા રાહુલ ગાંધીએ કથિત રીતે તેમને “અવગણ્યા” ત્યારે થરૂરના પાર્ટી હાઇકમાન્ડ સાથે મતભેદોના અહેવાલો પ્રકાશમાં આવ્યા. આ ઘટના 19 જાન્યુઆરીના રોજ કેરળના કોચીમાં પાર્ટીની “મહાપંચાયત”માં બની હતી. રાહુલ ગાંધી પહોંચ્યા ત્યારે થરૂર મહાપંચાયતમાં બોલી રહ્યા હતા. રાહુલે કેસી વેણુગોપાલ સહિત પાર્ટીના ઘણા નેતાઓનું સ્વાગત કર્યું, પરંતુ થરૂરને સીધું સ્વાગત કર્યું નહીં. રાહુલ દ્વારા સ્ટેજ પર ઘણા અન્ય નેતાઓનો ઉલ્લેખ કર્યો હતો પરંતુ થરૂરનું નામ લીધું ન હતું જેથી થરૂરને ખૂબ અપમાન લાગ્યું હતું.
