સંચાલક દંપતી સામે ગુનો નોંધાયો
(પ્રતિનિધિ) નડિયાદ, તા.4
નડિયાદ ટાઉન પોલીસ મથકે નોંધાયેલી ફરિયાદ મુજબ શહેરના મહા ગુજરાત નજીક વિસ્તારમાં આવેલા ખેતા તળાવ પાસેના એક કોમ્પ્લેક્સમાં ઓનેસ્ટ સ્પાની આડમાં કૂટણખાનું ચલાવતા દંપતીને ઝડપી પાડી કાયદેસરની કાર્યવાહી હાથ ધરવામાં આવી છે.
નડિયાદ ટાઉન પોલીસને મળેલી બાતમીના આધારે શહેરના ખેતા તળાવ પાસે આવેલા બેવર્લી ઓર્કિડ કોમ્પ્લેક્સના ત્રીજા માળે શોપ નંબર F-3 306 માં કાર્યરત ઓનેસ્ટ સ્પામાં દરોડો પાડવામાં આવ્યો હતો. પોલીસની પ્રાથમિક તપાસમાં બહાર આવ્યું છે કે આરોપી ઘનશ્યામ ઉર્ફે મોન્ટુ ઉમેદભાઈ પરમાર અને જેનીફરબેન આ સ્પા સેન્ટરની આડમાં બહારથી યુવતીઓ લાવી દેહવ્યાપારનો વ્યવસાય કરાવતા હતા. આરોપીઓ સ્પામાં આવતા ગ્રાહકો પાસેથી નાણાં મેળવીને તેમાંથી પોતાનું ગુજરાન ચલાવતા હતા અને ગેરકાયદેસર રીતે કૂટણખાનું ચલાવી રહ્યા હતા.
પોલીસે ઘટનાસ્થળેથી તપાસ દરમિયાન આરોપીનો મોબાઈલ ફોન જેની કિંમત 5000 રૂપિયા છે તે કબજે કર્યો છે. આ ઉપરાંત કાઉન્ટર પરથી 1500 રૂપિયા રોકડા, ગ્રાહકોની વિગતો નોંધવા માટે રાખેલી ડાયરી અને સીપી પ્લસ કંપનીનું ડીવીઆર મળી આવ્યા છે. તેમજ સાહેદ ઓમપુ દ્વારા મળેલા 2500 રૂપિયા અને અન્ય વાંધાજનક સામગ્રી પણ જપ્ત કરવામાં આવી છે. સમગ્ર મામલે નડિયાદ ટાઉન પોલીસે ઈમોરલ ટ્રાફિકિંગ પ્રિવેન્શન એક્ટની વિવિધ કલમો હેઠળ ગુનો નોંધી વધુ તપાસ હાથ ધરી છે.
