માત્ર 10 વર્ષમાં જ છત ના પોપડા ખરી પડતાં ગુણવત્તા પર સવાલ..!
વડોદરા :- રાજ્યની સૌથી મોટી સરકારી હોસ્પિટલોમાંની એક એવી વડોદરાની સર સયાજીરાવ જનરલ (SSG) હોસ્પિટલ ફરી એકવાર વિવાદના વમળમાં ફસાઈ છે. દર્દીઓ અને તેમના સગાં-સંબંધીઓ માટે સુરક્ષા સામે ગંભીર સવાલ ઊભો કરતાં, હોસ્પિટલના ન્યૂ સર્જિકલ બિલ્ડિંગના બીજા માળે આવેલ C-2 બ્લોકની છતના મોટા પોપડા અચાનક ખરી પડ્યા હતા. સદનસીબે, આ ઘટનામાં કોઈ જાનહાનિ થઈ નથી, પરંતુ આ ગંભીર બેદરકારીએ માત્ર 10 વર્ષ જૂના બાંધકામની ગુણવત્તા અને તેમાં થયેલા ભ્રષ્ટાચારની પોલ ખોલી નાખી છે.
આ ન્યૂ સર્જિકલ બિલ્ડિંગનું નિર્માણ કાર્ય લગભગ 10 વર્ષ પહેલાં જ કરવામાં આવ્યું હતું. કરોડો રૂપિયાના ખર્ચે તૈયાર થયેલું આ બિલ્ડિંગ અત્યાર સુધીમાં સેંકડો દર્દીઓની સારવારનું કેન્દ્ર રહ્યું છે. જોકે, માત્ર એક દાયકાના ટૂંકા ગાળામાં જ છતની આ હાલત થવી એ સ્પષ્ટપણે દર્શાવે છે કે તેના નિર્માણ કાર્યમાં મોટાપાયે અનિયમિતતા અને ભ્રષ્ટાચાર આચરવામાં આવ્યો છે.
ભયનો માહોલ અને દર્દીઓની સુરક્ષા જોખમમાં.
ન્યૂ સર્જિકલ બિલ્ડિંગના બીજા માળે આવેલા C-2 બ્લોકમાં જ્યારે અચાનક છતના પોપડા પડવાની ઘટના બની, ત્યારે હાજર દર્દીઓ અને હોસ્પિટલના સ્ટાફમાં ગભરાહટનો માહોલ સર્જાયો હતો. આ બ્લોક દર્દીઓની સારવાર માટે ઉપયોગમાં લેવાય છે, ત્યારે જો આ ઘટના થોડી ક્ષણો વહેલી કે મોડી થઈ હોત, તો મોટી દુર્ઘટના સર્જાઈ હોત. આ ઘટનાએ સરકારી બાંધકામોમાં થઈ રહેલા ભ્રષ્ટાચારનો ‘સીલિંગ પ્લસ્ટર’ ઉખેડી નાખ્યો છે.
કમિશનખોરી’ના કારણે બાંધકામની ગુણવત્તા સાથે ચેડાં.
સ્થાનિક નાગરિકો અને સામાજિક કાર્યકરો આ ઘટનાને સીધી રીતે કોન્ટ્રાક્ટર અને સરકારી બાબુઓની સાંઠગાંઠનું પરિણામ ગણી રહ્યા છે. તેમનો આક્ષેપ છે કે, પ્રોજેક્ટમાં નાણાં બચાવવા અને કમિશન મેળવવાના લોભમાં બાંધકામમાં હલકી ગુણવત્તાના માલ-સામાનનો ઉપયોગ કરવામાં આવ્યો છે. જો વિશ્વસનીય મટીરીયલ અને યોગ્ય ઈજનેરી માપદંડોનું પાલન થયું હોત, તો 10 વર્ષમાં જ આ રીતે સીલિંગ ધસી પડવાની ઘટના બની ન હોત.
હોસ્પિટલ પ્રશાસન અને રાજ્ય સરકાર આ મામલે મૌન સેવી રહ્યાં છે, ત્યારે વિપક્ષી પાર્ટીઓ અને જાગૃત નાગરિકો દ્વારા આ સમગ્ર બાંધકામની ગુણવત્તાની તાત્કાલિક ઉચ્ચ સ્તરીય તપાસ કરવાની માંગ કરવામાં આવી છે. આ તપાસ માત્ર રિપેરિંગ સુધી સીમિત ન રહેતાં, બિલ્ડિંગના નિર્માણ સમયે સંકળાયેલા કોન્ટ્રાક્ટર, ઈજનેરો અને સુપરવાઈઝર અધિકારીઓ સામે ભ્રષ્ટાચાર નિવારણ કાયદા હેઠળ પગલાં લેવામાં આવે તેવી પ્રબળ માંગણી ઉઠી છે.
આ ઘટના એસ.એસ.જી. હોસ્પિટલના સમગ્ર ન્યૂ સર્જિકલ બિલ્ડિંગની સલામતી પર સવાલ ઉઠાવે છે, અને સરકારને એ યાદ અપાવે છે કે જનતાના સ્વાસ્થ્ય અને સુરક્ષા સાથે જોડાયેલા બાંધકામોમાં ભ્રષ્ટાચારને કોઈ સ્થાન ન હોવો જોઈએ.
