નિયમ ભંગ બદલ બિલ્ડર્સ-ડેવલોપર્સને રૂ. 28.52 લાખનો દંડ, VMCની કડક નજર
વડોદરા :
વડોદરા મહાનગરપાલિકા (VMC)ના બાંધકામ પરવાનગી વિભાગ દ્વારા શહેરની હદ વિસ્તારમાં ચાલી રહેલા નવા બાંધકામ તથા કન્સ્ટ્રક્શન સાઇટ્સ પર **એર ક્વોલિટી ઇન્ડેક્સ (AQI)**માં સુધારો લાવવા માટે કડક પગલાં લેવામાં આવ્યા છે. પર્યાવરણ જાળવણી અને Good Construction Practiceના અમલ માટે તમામ બિલ્ડર્સ અને ડેવલોપર્સને નોટિસ આપી નિયમોનું પાલન કરાવવા કાર્યવાહી હાથ ધરવામાં આવી છે.
VMC દ્વારા બાંધકામ સાઇટ્સ પર બિલ્ડીંગને ગ્રીન નેટથી કવર કરવું, કન્સ્ટ્રક્શન મટીરીયલ પર પાણીનો છંટકાવ (સ્પ્રીન્કલિંગ) કરવો તથા C&D વેસ્ટ (Construction & Demolition Waste) ને VMC સંચાલિત કલેક્શન સેન્ટર પર જમા કરાવવાની સૂચના આપવામાં આવી હતી. આ નિયમોનું પાલન ન કરનાર બિલ્ડર્સ અને ડેવલોપર્સ સામે કાર્યવાહી કરી કુલ રૂ. 28.52 લાખનો દંડ/પેનલ્ટી ફટકારવામાં આવી છે.
નોટિસ અને દંડની કાર્યવાહી બાદ શહેરની અનેક ચાલુ બાંધકામ સાઇટ્સ પર હવે ગ્રીન નેટ લગાડવાની કામગીરી શરૂ કરવામાં આવી છે તેમજ ધૂળ નિયંત્રણ માટે નિયમિત પાણીનો છંટકાવ કરવામાં આવી રહ્યો છે. સાથે સાથે કન્સ્ટ્રક્શન વેસ્ટ મટીરીયલનો યોગ્ય જગ્યાએ નિકાલ કરવામાં આવી રહ્યો છે.
આ સમગ્ર પ્રક્રિયા પર VMCના સ્ટાફ દ્વારા સતત દેખરેખ અને નિરીક્ષણ રાખવામાં આવી રહ્યું છે. મહાનગરપાલિકાએ સ્પષ્ટ કર્યું છે કે આગામી સમયમાં શહેરમાં AQI સુધારવા માટે આવા નક્કર અને કડક પગલાં સાથે કાર્યવાહી સતત ચાલુ રહેશે, જેથી પર્યાવરણ સંરક્ષણ સાથે નાગરિકોના આરોગ્યની સુરક્ષા સુનિશ્ચિત કરી શકાય
