અંડર-19 એશિયા કપમાં ભારતે પાકિસ્તાનને 90 રનથી હરાવ્યું. રવિવારે દુબઈમાં રમાયેલી ગ્રુપ સ્ટેજ મેચમાં 241 રનના લક્ષ્યનો પીછો કરતા પાકિસ્તાન 41.2 ઓવરમાં 150 રનમાં ઓલઆઉટ થઈ ગયું. પાકિસ્તાન તરફથી હુઝૈફા અહસાને સૌથી વધુ 70 રન બનાવ્યા. ભારત તરફથી દીપેશ દેવેન્દ્રન અને કનિષ્ક ચૌહાણે ત્રણ-ત્રણ વિકેટ લીધી. કિશન સિંહે બે વિકેટ લીધી જ્યારે વૈભવ સૂર્યવંશી અને ખિલાન પટેલે એક-એક વિકેટ લીધી.
અગાઉ પાકિસ્તાને ટોસ જીતીને પ્રથમ બોલિંગ કરવાનો નિર્ણય લીધો. વરસાદને કારણે મેચ ૪૯-૪૯ ઓવરની કરવામાં આવી હતી. ભારતે એરોન જ્યોર્જના ૮૫ રનની મદદથી ૨૪૦ રન બનાવ્યા. કનિષ્ક ચૌહાણે ૪૬ રન અને કેપ્ટન આયુષ મ્હાત્રેએ ૩૮ રનનું યોગદાન આપ્યું. ગત મેચમાં સદી ફટકારનાર વૈભવ સૂર્યવંશી આ વખતે ફક્ત 5 રન જ બનાવી શક્યો. પાકિસ્તાન તરફથી મોહમ્મદ સૈયમ અને અબ્દુલ સુભાને 3-3 વિકેટ લીધી. નિકાબ શફીકે 2 વિકેટ લીધી, જ્યારે અલી રઝા અને અહેમદ હુસૈને 1-1 વિકેટ લીધી.
કનિષ્ક ચૌહાણને પ્લેયર ઓફ ધ મેચ જાહેર કરવામાં આવ્યો
ભારત તરફથી કનિષ્ક ચૌહાણે ઓલરાઉન્ડ પ્રદર્શન કર્યું. તેણે બેટથી 46 રન બનાવ્યા અને બોલથી 3 પાકિસ્તાની બેટ્સમેનોને આઉટ કર્યા. તેના ઉત્કૃષ્ટ પ્રદર્શન માટે તેને પ્લેયર ઓફ ધ મેચ જાહેર કરવામાં આવ્યો.
ભારત ટોચ પર પહોંચ્યું
ભારત અંડર-19 એશિયા કપના ગ્રુપ A માં ટોચ પર પહોંચી ગયું છે. ટીમ ઈન્ડિયાએ તેની બંને મેચ જીતી છે. પહેલી મેચમાં ભારતે UAE ને 234 રનથી હરાવ્યું. ભારતના હવે 4 પોઈન્ટ છે અને આગામી મેચ 16 ડિસેમ્બરે મલેશિયા સામે રમાશે.
ભારત: આયુષ મ્હાત્રે (કેપ્ટન), વૈભવ સૂર્યવંશી, એરોન જ્યોર્જ, વિહાન મલ્હોત્રા, વેદાંત ત્રિવેદી, અભિજ્ઞાન કુંડુ (વિકેટકીપર), કનિષ્ક ચૌહાણ, ખિલાન પટેલ, દીપેશ દેવેન્દ્રન, કિશન સિંહ અને હેનીલ પટેલ.
પાકિસ્તાન: ઉસ્માન ખાન, સમીર મિન્હાસ, અલી હસન બલોચ, અહેમદ હુસૈન, ફરહાન યુસુફ (કેપ્ટન), હમઝા ઝહૂર (વિકેટકીપર), હુઝૈફા અહસાન, નિકાબ શફીક, અબ્દુલ સુભાન, મોહમ્મદ સૈયમ અને અલી રઝા.
