ભારતે UAE ને 234 રનથી હરાવ્યું. ટીમ ઈન્ડિયાએ અંડર-19 એશિયા કપ 2025 માં વિજય સાથે પોતાના અભિયાનની શરૂઆત કરી. પહેલા બેટિંગ કરતા ભારતે વૈભવ સૂર્યવંશીની ઐતિહાસિક 171 રનની ઇનિંગને કારણે 433 રનનો વિશાળ સ્કોર બનાવ્યો. જવાબમાં UAE ટીમ નિર્ધારિત 50 ઓવરમાં ફક્ત 199 રન જ બનાવી શકી.
આ અંડર-19 એશિયા કપ 2025 ની પહેલી મેચ હતી જેમાં ભારતીય કેપ્ટન આયુષ મ્હાત્રે ફ્લોપ રહ્યો. જોકે વૈભવ સૂર્યવંશીએ ચોક્કસપણે UAE ના બોલરોને તોડી પાડ્યા. તેણે માત્ર 56 બોલમાં પોતાની સદી પૂરી કરી. તેણે મેચમાં 95 બોલમાં 171 રન બનાવ્યા જેમાં તેની ઇનિંગમાં 14 છગ્ગા અને 9 ચોગ્ગા ફટકાર્યા. ભારત તરફથી વિહાન મલ્હોત્રા અને એરોન જ્યોર્જ બંનેએ 69 રન બનાવ્યા.
ભારતે આ મેચમાં અંડર-19 વનડે ક્રિકેટ ઇતિહાસમાં ત્રીજો સૌથી મોટો સ્કોર નોંધાવ્યો. UAE ને 234 રનથી હરાવીને ભારતે અંડર-19 વનડે ઇતિહાસમાં રન દ્વારા ચોથો સૌથી મોટો વિજય મેળવ્યો. અગાઉ ભારતની અંડર-19 ટીમે પણ ઇંગ્લેન્ડને 234 રનથી હરાવ્યું હતું.
ભારતે નવ બોલરોનો ઉપયોગ કર્યો જેમાં ખિલન પટેલ સિવાય કોઈએ સંપૂર્ણ દસ ઓવર નાખી ન હતી. વૈભવ સૂર્યવંશીએ પણ બે ઓવર ફેંકી, 13 રન આપ્યા. UAE એ 53 રનમાં છ વિકેટ ગુમાવી દીધી. જોકે પૃથ્વી મધુના 50 અને ઉદ્દીશ સૂરીના અણનમ 78 રનના કારણે UAE 199 રન સુધી પહોંચવામાં સફળ રહ્યું.
આજે રમાયેલી અંડર-19 એશિયા કપ 2025 ની બીજી મેચમાં પાકિસ્તાનનો સામનો મલેશિયા સાથે થયો. તે મેચમાં પાકિસ્તાને પ્રથમ બેટિંગ કરતા ૩૪૫ રન બનાવ્યા હતા પરંતુ મલેશિયા ફક્ત ૪૮ રનમાં ઓલઆઉટ થઈ ગયું હતું. પાકિસ્તાને અંડર-૧૯ વનડે ક્રિકેટમાં રનથી સૌથી મોટી જીત મેળવી હતી. ભારત અને પાકિસ્તાન એક જ ગ્રુપમાં છે.
