યુએસ ફેડરલ રિઝર્વના વ્યાજ દરના નિર્ણય અને સંભવિત યુએસ વેપાર સોદાને લગતી અનિશ્ચિતતાઓ પહેલાં શેરબજારમાં વેચવાલી ચાલુ રહી. શેરબજારમાં સતત બીજા દિવસે તીવ્ર ઘટાડો જોવા મળ્યો. સેન્સેક્સ 436 પોઈન્ટ ઘટીને 84,666 પર બંધ થયો, જ્યારે નિફ્ટી 120 પોઈન્ટ ઘટીને 25,839 પર બંધ થયો. આ ઘટાડા વચ્ચે રાષ્ટ્રપતિ ડોનાલ્ડ ટ્રમ્પે ભારતીય ચોખા પર નવા ટેરિફ લાદવાનો સંકેત પણ આપ્યો, જેનાથી બજારની ચિંતામાં વધારો થયો.
સેન્સેક્સમાં એશિયન પેઇન્ટ્સ સૌથી મોટો ઘટાડો રહ્યો જે 4.61% ઘટીને 2,790.90 પર બંધ થયો. ટેક મહિન્દ્રાના શેર 1.99% ઘટીને 2.56% પર બંધ થયા. અન્ય મુખ્ય ઘટાડામાં HCL ટેક્નોલોજીસ, ટાટા સ્ટીલ, મારુતિ સુઝુકી અને સન ફાર્માનો સમાવેશ થાય છે, જે અનુક્રમે 1.78%, 1.56%, 1.16% અને 1.05% ઘટ્યા.
આ પાંચ શેર ICICI બેંક, HDFC બેંક, રિલાયન્સ ઇન્ડસ્ટ્રીઝ, એશિયન પેઇન્ટ્સ અને ઇન્ફોસિસે સેન્સેક્સના ઘટાડામાં મોટો ફાળો આપ્યો. BSE IT ઇન્ડેક્સ 0.89% ઘટીને 36,843 પર બંધ થયો, જે ઘટાડાનું મુખ્ય કારણ હતું. BSE ઓટો ઇન્ડેક્સ પણ 0.63% ઘટીને 60,973.37 પર બંધ થયો. છેલ્લા બે દિવસમાં શેરબજારમાં તીવ્ર ઘટાડો જોવા મળ્યો છે. સેન્સેક્સ 1,045 પોઈન્ટ ઘટ્યો છે, જ્યારે નિફ્ટી 345 પોઈન્ટ ઘટ્યો છે.
રોકાણકારોને નોંધપાત્ર નુકસાન
બે દિવસ પહેલા BSE માર્કેટ કેપ 470.96 લાખ કરોડ હતી, જે હવે ઘટીને 464.91 લાખ કરોડ થઈ ગઈ છે. પરિણામે છેલ્લા બે દિવસમાં રોકાણકારોએ આશરે 6 લાખ કરોડ ગુમાવ્યા છે.
162 શેરોમાં નીચલી સર્કિટ લાગી
એકંદરે બીએસઈ પર સક્રિય રીતે ટ્રેડ થતા 4331 શેરોમાંથી 2616 શેરો વધીને બંધ થયા જ્યારે 1550 શેરો નીચા સ્તરે બંધ થયા અને 165 શેરો યથાવત રહ્યા. 67 શેરો ૫૨ સપ્તાહના નવા ઉચ્ચતમ સ્તર પર પહોંચ્યા, જ્યારે 512 શેરો ૫૨ સપ્તાહના નવા નીચલા સ્તર પર પહોંચ્યા. દરમિયાન, 169 શેરો ઉપલી સર્કિટમાં ગયા અને 162 શેરો નીચલી સર્કિટમાં ગયા.
શેરબજાર કેમ ઘટ્યું?
જિયોજિત ઇન્વેસ્ટમેન્ટ્સના રિસર્ચ હેડ વિનોદ નાયરે જણાવ્યું હતું કે સ્થાનિક શેરબજારો નરમાઈ સાથે ખુલ્યા હતા, જેમાં તાજેતરના નફા-બુકિંગ ચાલુ રહ્યા હતા કારણ કે આવતીકાલના યુએસ ફેડ પોલિસી પરિણામ પહેલા રોકાણકારો સાવચેત બન્યા હતા. તેમણે ઉમેર્યું હતું કે નબળો રૂપિયો, વિદેશી સંસ્થાકીય રોકાણકારો દ્વારા સતત વેચાણ અને યુએસ-ભારત વેપાર સોદાને લગતી અનિશ્ચિતતાએ બજારના સેન્ટિમેન્ટ પર વધુ ભાર મૂક્યો હતો.
