પાકિસ્તાનના ભૂતપૂર્વ વડા પ્રધાન ઈમરાન ખાન અંગેનો સસ્પેન્સ સમાપ્ત થઈ ગયો છે. તેમની બહેન ઉઝમા સોમવારે જેલમાં તેમને મળી હતી. બહાર આવ્યા પછી ઉઝમાએ જણાવ્યું હતું કે ઈમરાન ખાન ખૂબ ગુસ્સે હતા. ઈમરાન ખાને ખુલાસો કર્યો હતો કે તેમને જેલમાં માનસિક ત્રાસ આપવામાં આવ્યો હતો. ઉઝમાએ જણાવ્યું હતું કે તેણી ઈમરાન ખાન સાથે લગભગ 20 મિનિટ સુધી મળી હતી. ઈમરાન ખાનની બહેને પાકિસ્તાનના આર્મી ચીફ અસીમ મુનીર પર પણ ગંભીર આરોપો લગાવ્યા હતા.
પાકિસ્તાનના ભૂતપૂર્વ વડા પ્રધાન ઈમરાન ખાનની બહેન ઉઝમા ખાને મંગળવારે રાવલપિંડીની અદિયાલા જેલમાં તેમની સાથે મુલાકાત કરી હતી. જેલમાંથી બહાર નીકળ્યા પછી ઉઝમાએ પુષ્ટિ આપી હતી કે તેનો ભાઈ ઈમરાન સંપૂર્ણપણે સ્વસ્થ છે. તેમણે એમ પણ કહ્યું હતું કે ઈમરાન ખાનની તબિયત સારી છે. તેમણે કહ્યું હતું કે તે તેમની બે બહેનો અલીમા ખાન અને નૌરીન ખાન સાથે વાત કર્યા પછી વધુ માહિતી શેર કરશે. મીડિયા રિપોર્ટ્સ અનુસાર મુલાકાત પહેલાં ઉઝમાએ અલીમા ખાન સાથે લાંબી વાતચીત કરી હતી.
‘અસીમ મુનીર ઈમરાન ખાનને આખો દિવસ…’
ઈમરાન ખાન આદિયાલા જેલમાં છે. તેમની બહેન ઉઝમા ખાન તેમની સાથે લગભગ 20 મિનિટ સુધી મળી હતી. જેલમાંથી બહાર નીકળ્યા પછી ઉઝમા ખાને કહ્યું કે ઈમરાન ખાન ખૂબ ગુસ્સે છે અને તેમને માનસિક ત્રાસ આપવામાં આવ્યો છે. ઉઝમાએ કહ્યું કે આસીમ મુનીર ઈમરાન ખાનને આખો દિવસ પોતાના રૂમમાં બંધ રાખે છે. તેમને કોઈને મળવાની મંજૂરી નથી, અને તે ખૂબ જ નારાજ છે. ઈમરાન ખાનને કોઈની સાથે વાતચીત કરવાની મંજૂરી નથી. ઉઝમાના જણાવ્યા મુજબ ઈમરાને તેમને કહ્યું કે આ બધી મુશ્કેલીનું કારણ આસીમ મુનીર છે.
ઈમરાન 27 દિવસ પછી પરિવારને મળ્યા
ઈમરાન ખાન 27 દિવસ પછી પરિવારના એક સભ્યને મળ્યા છે. તે અગાઉ 5 નવેમ્બરના રોજ તેમની બહેન નૌરીન ખાનને મળ્યા હતા. ગયા મંગળવારે ઈમરાન ખાનના સમર્થકો અને પરિવારના સભ્યો તેમને મળવા ગયા હતા પરંતુ જેલ વહીવટીતંત્રે તેમને મળવાની મંજૂરી આપવાનો ઇનકાર કર્યો હતો. અફવાઓ ફેલાઈ હતી કે ઈમરાનનું મૃત્યુ થયું છે અને પાકિસ્તાની સરકાર તેમના મૃત્યુને છુપાવી રહી છે. આજે સમગ્ર પાકિસ્તાનમાં એક મોટો વિરોધ પ્રદર્શન કરવામાં આવ્યો હતો જેના કારણે રાવલપિંડીથી ઈસ્લામાબાદ સુધી હાઈ એલર્ટ જાહેર કરવામાં આવ્યું હતું.
