ભારત અને વેસ્ટ ઈન્ડિઝ વચ્ચે બે મેચની ટેસ્ટ શ્રેણીની બીજી અને અંતિમ મેચ દિલ્હીના અરુણ જેટલી સ્ટેડિયમ ખાતે રમાઈ રહી છે. ચોથા દિવસે (13 ઓક્ટોબર) રમત પૂર્ણ થઈ ગઈ છે. રમતના અંતે ભારતે પોતાના બીજા દાવમાં 1 વિકેટે 63 રન બનાવ્યા હતા. ભારત હવે જીતથી માત્ર 58 રન દૂર છે. સાઈ સુદર્શન 30 રન બનાવીને અણનમ છે અને કેએલ રાહુલ 25 રન બનાવીને અણનમ છે. વેસ્ટ ઈન્ડિઝે ભારતને જીતવા માટે 121 રનનો લક્ષ્યાંક આપ્યો છે.
વેસ્ટ ઇન્ડીઝે પોતાની બીજી ઇનિંગમાં 390 રન બનાવ્યા હતા. ભારતે પોતાની પહેલી ઇનિંગ 518/5 પર ડિકલેર કરી હતી. ત્યારબાદ વેસ્ટ ઇન્ડીઝે પોતાની પહેલી ઇનિંગમાં 248 રન બનાવ્યા હતા. ભારતે પહેલી ઇનિંગમાં 270 રનની લીડ મેળવી હતી અને વેસ્ટ ઈન્ડિઝને ફોલોઓન કર્યું હતું. ટીમ ઇન્ડિયાએ અમદાવાદમાં શ્રેણીની પહેલી ટેસ્ટ એક ઇનિંગ અને 140 રનથી જીતી હતી. આનો અર્થ એ થયો કે શુભમન ગિલની આગેવાની હેઠળની ભારતીય ટીમ ટેસ્ટ શ્રેણીમાં 1-0થી આગળ છે.
રન ચેઝમાં ભારતીય ટીમની શરૂઆત સારી રહી ન હતી. ડાબોડી ઓપનર યશસ્વી જયસ્વાલ અંગત 8 રન બનાવીને જોમેલ વોરિકનની બોલ પર આઉટ થયો હતો. ત્યાર બાદ કેએલ રાહુલ અને સાઈ સુદર્શને અણનમ અડધી સદીની ભાગીદારી ઉમેરીને ભારતને વિજયની નજીક પહોંચાડ્યું હતું.
આ અગાઉ ફોલોઓન રમતા વેસ્ટ ઈન્ડિઝે તેની બીજી ઇનિંગમાં તેજનારાયણ ચંદ્રપોલ (10 રન) અને એલિક એથાનાસે (7 રન) ની વિકેટ સસ્તામાં ગુમાવી દીધી હતી. 35 રનમાં બે વિકેટ ગુમાવ્યા બાદ જોન કેમ્પબેલ અને શાઈ હોપે ત્રીજી વિકેટ માટે સદીની ભાગીદારી કરીને વિન્ડીઝને વાપસી અપાવી. કેમ્પબેલ તેના ટેસ્ટ કારકિર્દીનો શ્રેષ્ઠ સ્કોર બનાવવામાં સફળ રહ્યો.
શાઈ હોપ પણ લાંબા સમય પછી ટેસ્ટ ક્રિકેટમાં સારા ફોર્મમાં દેખાઈ રહ્યો હતો. મેચના ચોથા દિવસના પહેલા સત્રમાં જોન કેમ્પબેલ અને શાઈ હોપનો શાનદાર દેખાવ પણ જોવા મળ્યો. કેમ્પબેલે રવિન્દ્ર જાડેજાના બોલ પર સિક્સર ફટકારીને પોતાની પ્રથમ ટેસ્ટ સદી પૂરી કરી. કેમ્પબેલે 199 બોલનો સામનો કર્યો અને 12 ચોગ્ગા અને ત્રણ છગ્ગા સહિત 115 રન બનાવ્યા.
રવિન્દ્ર જાડેજાએ કેમ્પબેલને એલબીડબલ્યુ આઉટ કરીને ભાગીદારી તોડી. કેમ્પબેલ અને હોપે ત્રીજી વિકેટ માટે 177 રનની ભાગીદારી કરી. જોન કેમ્પબેલના આઉટ થયા પછી, કેપ્ટન રોસ્ટન ચેઝે જવાબદારી સંભાળી અને ચોથી વિકેટ માટે 59 રનની ભાગીદારી કરી. આ ભાગીદારી દરમિયાન હોપે તેની સદી પૂરી કરી, જે તેની કારકિર્દીની ત્રીજી સદી હતી. હોપે આઠ વર્ષ પછી ટેસ્ટ ક્રિકેટમાં સદી હાંસલ કરી. હોપને મોહમ્મદ સિરાજે બોલ્ડ કર્યો. હોપે 214 બોલનો સામનો કર્યો અને 12 ચોગ્ગા અને બે છગ્ગા સહિત 103 રન બનાવ્યા.
શાઈ હોપના આઉટ થયા પછી ભારતીય બોલરોએ વાપસી કરી. કુલદીપ યાદવે ટેવિન ઈમલાચ (12 રન), રોસ્ટન ચેઝ (40 રન) અને ખારી પિયર (0 રન) ને આઉટ કર્યા. ત્યારબાદ જસપ્રીત બુમરાહે જોમેલ વોરિકન (3 રન) અને એન્ડરસન ફિલિપ (2 રન) ને આઉટ કર્યા. 311 રન પર નવમી વિકેટ પડ્યા પછી જસ્ટિન ગ્રીવ્સ અને જેડેન સીલ્સે ભારતીય ટીમ માટે ઘણી મુશ્કેલી ઉભી કરી. તેમણે છેલ્લી વિકેટ માટે 79 રનની ભાગીદારી કરી. ગ્રીવ્સે અણનમ 50 અને સીલ્સે 32 રન બનાવ્યા.
