દિલ્હી કેન્ટ પોલીસ સ્ટેશન વિસ્તારમાં BMW કાર સાથે અથડામણમાં નાણા મંત્રાલયના નાયબ સચિવ નવજોત સિંહના મૃત્યુના કેસમાં આરોપી મહિલાને કસ્ટડીમાં લેવામાં આવી છે. ગુરુગ્રામની રહેવાસી આરોપી મહિલા ગગનપ્રીતને હોસ્પિટલમાંથી રજા આપવામાં આવી હતી. તે જ સમયે દિલ્હી પોલીસે આરોપી મહિલાને વધુ તપાસ માટે કસ્ટડીમાં લીધી છે.
રવિવારે બપોરે દિલ્હી કેન્ટ પોલીસ સ્ટેશન વિસ્તારમાં એક ઝડપી BMW કારે મોટરસાયકલ ચલાવતા એક દંપતીને ટક્કર મારી હતી. નાણા મંત્રાલયમાં તૈનાત ડેપ્યુટી સેક્રેટરી નવજોત સિંહ તેમની પત્ની સાથે મોટરસાયકલ પર જનકપુરી સ્થિત પોતાના ઘરે પરત ફરી રહ્યા હતા. આ અકસ્માતમાં નવજોત સિંહનું મોત થયું હતું, જ્યારે તેમની પત્ની ઘાયલ થઈ હતી.
ડેપ્યુટી સેક્રેટરી મૃત્યુ કેસમાં FIRમાંથી ઘણા ખુલાસા
એફઆઈઆરમાં નોંધાયેલા નિવેદનથી આ અકસ્માત અંગે ઘણા પ્રશ્નો ઉભા થયા છે. એફઆઈઆર મુજબ અકસ્માત સમયે નવજોત સિંહ શ્વાસ લઈ રહ્યા હતા અને તેમની પત્ની સંદીપ કૌરે આરોપી દંપતીને વારંવાર વિનંતી કરી હતી કે તેઓ તેમને નજીકની હોસ્પિટલમાં લઈ જાય.
સંદીપ કૌરના નિવેદન મુજબ તેમણે આરોપી મહિલાને કહ્યું કે પ્લીઝ અમને નજીકની હોસ્પિટલમાં લઈ જાઓ, પરંતુ તેમની વિનંતીને અવગણવામાં આવી. સંદીપ કૌરનો આરોપ છે કે BMW ડ્રાઈવર મહિલા અને તેના પતિએ તેમને જાણી જોઈને નજીકના હોસ્પિટલને બદલે 19 કિલોમીટર દૂર એક નાની હોસ્પિટલમાં લઈ ગઈ હતી.
વહેલી સારવાર મળી હોત તો જીવ બચાવી શકાયો હોત: સંદીપ કૌર
દરમિયાન તેમને એક કાર્ગો વાનમાં લઈ જવામાં આવ્યા જેમાં લોહીલુહાણ નવજોત સિંહને કોઈપણ પ્રાથમિક સારવાર વિના રાખવામાં આવ્યો હતો. હોસ્પિટલ પહોંચતા જ ડોક્ટરોએ નવજોત સિંહને મૃત જાહેર કર્યા. FIRમાં એ પણ નોંધાયું છે કે ઘટના પહેલા મહિલા ડ્રાઈવર BMW કાર ખૂબ જ ઝડપે અને બેદરકારીથી ચલાવી રહી હતી.
આરોપી મહિલા ખૂબ જ ઝડપે BMW ચલાવી રહી હતી
રિપોર્ટ અનુસાર, જ્યારે કારે સંતુલન ગુમાવ્યું, ત્યારે તે સીધી નવજોત સિંહની મોટરસાઇકલ સાથે અથડાઈ હતી. આ ટક્કર પછી બાઇક પહેલા ડિવાઇડર અને પછી બસ સાથે અથડાઈ, જેના કારણે નવજોત અને તેની પત્ની ગંભીર રીતે ઘાયલ થયા. આ FIR પ્રકાશમાં આવ્યા પછી પોલીસે માત્ર અકસ્માતની ગંભીરતા જ નહીં પરંતુ ત્યારબાદની ઘટનાઓ વિશે પણ તપાસ તેજ કરી છે. દિલ્હી પોલીસે BMW કાર જપ્ત કરી છે અને આરોપી મહિલા અને તેના પતિની પૂછપરછ કરવાની તૈયારી કરી રહી છે. અકસ્માતના CCTV ફૂટેજ અને પ્રત્યક્ષદર્શીઓના નિવેદનો પણ એકત્રિત કરવામાં આવી રહ્યા છે જેથી સમગ્ર સત્ય બહાર આવી શકે.
