શહેરમાં સતત વરસાદ અને આજવા સરોવરના ગેટ ખૂલતા નદીનું જળસ્તર વધ્યું; સુરક્ષા માટે વિસ્તાર બેરિકેડિંગ કરી ગાર્ડ્સ તૈનાત
વડોદરા શહેરમાં છેલ્લા કેટલાય દિવસોથી વરસતા સતત વરસાદે નદી અને સરોવરોના જળસ્તરમાં વધારો કર્યો છે. તેની અસર રૂપે શહેરના લોકપ્રિય કમાટીબાગ વિસ્તારમાં આવું એક ગંભીર બનાવ બન્યો છે.
કમાટીબાગમાં આવેલ શૌચાલય પાછળથી જ વિશ્વામિત્રી નદી પસાર થાય છે. સતત પાણીના પ્રવાહ અને ધસમસતા વરસાદે નદી કિનારે માટી ધસાડતા શૌચાલય પાછળની લોખંડની રેલિંગ એકાએક ધરાશાયી થઈ ગઈ હતી. આ બનાવથી શૌચાલયનો ઉપયોગ બંધ કરવો પડ્યો છે. આસપાસની જમીનમાં પડેલા ગાબડાને કારણે જોખમ ઊભું થતું હોવાથી તરતજ રોડનો ભાગ કોર્ડન કરી બેરિકેડિંગ કરાયું છે.
સતત વરસતા વરસાદ અને આજવા સરોવરની ગેટ ખોલવામાં આવવાથી વિશ્વામિત્રી નદીનું જળસ્તર વધ્યુ હતું. નદીના પાણીના પ્રભાવથી કમાટીબાગના શૌચાલય પાછળ માટી બેસી જતાં રેલિંગ તૂટી પડ્યું હતું. ખતરાને ટાળવા માટે તાત્કાલિક કાર્યવાહી કરી બેરિકેડિંગ કરવામાં આવ્યું છે અને સિક્યુરિટી ગાર્ડ્સને ડ્યુટી પર મુકાયા.
સદનસીબે આ ઘટનામાં કોઈ જાનહાની કે ઈજા થઈ નથી. સાથે જ નજીકમાં જ આવેલા લીમડાના વૃક્ષની ડાળ પણ તૂટી પડી હતી, પરંતુ એ સમયે આસપાસ કોઈ ન હોવાથી અકસ્માત ટળી ગયો. વરસાદી માહોલને કારણે પર્યટકોની સંખ્યા સામાન્ય કરતાં ઓછી હોવા છતાં મોટી દુર્ઘટના બનતાની સંભાવનાને પૂર્ણ રીતે નકારી શકાતી નથી. હાલમાં વિશ્વામિત્રી નદીના પાણીના સ્તરમાં ઘટાડો નોંધાયો છે, તેમ છતાં નદી હજી પણ બંને કાંઠે વહી રહી છે.
શહેરના સૌથી વ્યસ્ત પાર્ક કમાટીબાગમાં પર્યટકોની સતત અવરજવર રહે છે. વરસાદી માહોલમાં મુલાકાતીઓની સંખ્યામાં થોડો ઘટાડો થયો છે. પરંતુ બનતી સ્થિતિને ધ્યાનમાં રાખીને તંત્રએ પૂરતી તકેદારી રાખી છે. ઉલ્લેખનીય છે કે આખાય વિસ્તારમાં સંપૂર્ણ બેરિકેડિંગ સાથે સુરક્ષા ગાર્ડ્સને તૈનાત કરવામાં આવ્યા છે જેથી પર્યટકોની સલામતી સુનિશ્ચિત થઈ શકે.
