રશિયાના રાષ્ટ્રપતિ વ્લાદિમીર પુતિને યુએસ રાષ્ટ્રપતિ ડોનાલ્ડ ટ્રમ્પને ટેરિફના નામે ભારત અને ચીનને ધમકી આપવાનું બંધ કરવા કહ્યું છે. તેમણે કહ્યું કે બંને (ભારત-ચીન) દેશો તેમની ધમકીઓથી ડરવાના નથી.બુધવારે (3 સપ્ટેમ્બર) ચીનના વિજય દિવસ પરેડમાં હાજરી આપ્યા બાદ મીડિયા સાથે વાત કરતા પુતિને કહ્યું કે ટ્રમ્પ ભારત કે ચીન સાથે આ રીતે વાત કરી શકતા નથી.
રશિયાના રાષ્ટ્રપતિએ કહ્યું, ‘ભારત અને ચીનનો ઇતિહાસ હુમલાઓથી ભરેલો છે. જો આ દેશોનો કોઈ નેતા નબળાઈ બતાવે છે, તો તેની રાજકીય કારકિર્દી સમાપ્ત થઈ શકે છે.’ ટ્રમ્પે ભારત પર ઘણી વખત આરોપ લગાવ્યો છે કે ભારત રશિયન તેલ ખરીદે છે અને યુક્રેન યુદ્ધમાં રશિયાને ટેકો આપી રહ્યું છે. ટ્રમ્પ તેમના ટેરિફને યુદ્ધો ઉકેલવા માટેનું હથિયાર કહે છે. ટ્રમ્પે બુધવારે ધ સ્કોટ જેનિંગ્સ રેડિયો શોમાં કહ્યું હતું કે આ (ટેરિફ) નીતિ અમેરિકાને શક્તિ આપે છે. ટ્રમ્પે ટેરિફને જાદુઈ હથિયાર ગણાવ્યું અને દાવો કર્યો કે તેણે તેના દ્વારા 7 યુદ્ધો રોક્યા છે.
પુતિને કહ્યું- ટ્રમ્પ રૂઢિચુસ્ત માનસિકતા ધરાવતા વ્યક્તિ
પુતિને અમેરિકાના વલણને જૂનું અને રૂઢિચુસ્ત ગણાવ્યું. તેમણે કહ્યું, ‘વસાહતી યુગ હવે પૂરો થઈ ગયો છે. અમેરિકાએ સમજવું પડશે કે તે તેના ભાગીદારો સાથે આવી ભાષામાં વાત કરી શકતું નથી.’ જોકે તેમણે આશા વ્યક્ત કરી કે ભવિષ્યમાં તણાવ ઓછો થશે અને સામાન્ય રાજકીય વાતચીત ફરી શરૂ થશે. પુતિનની આ ટિપ્પણી એવા સમયે આવી છે જ્યારે ભારત રશિયન તેલ ખરીદવા માટે યુએસ ટેરિફનો સામનો કરી રહ્યું છે અને ચીન યુએસ સાથે વેપાર યુદ્ધમાં ફસાઈ ગયું છે.
મોદી, પુતિન અને જિનપિંગ SCOમાં સાથે જોવા મળ્યા
SCO બેઠક 1 સપ્ટેમ્બરના રોજ ચીનના તિયાનજિનમાં યોજાઈ હતી. બેઠક પહેલા ફોટો સેશન દરમિયાન ભારતીય પીએમ નરેન્દ્ર મોદી, ચીનના રાષ્ટ્રપતિ શી જિનપિંગ અને રશિયન રાષ્ટ્રપતિ પુતિન સાથે જોવા મળ્યા હતા. ત્રણેય નેતાઓ એકબીજાના હાથ પકડીને પણ જોવા મળ્યા હતા. ભારત, ચીન અને રશિયાના નેતાઓએ પરસ્પર મિત્રતા દર્શાવી હતી જેના કારણે અમેરિકા બેચેન થઈ ગયું છે. વડાપ્રધાન નરેન્દ્ર મોદીએ રશિયાને એક ખાસ અને વિશ્વસનીય ભાગીદાર ગણાવ્યું. ચીનના રાષ્ટ્રપતિ શી જિનપિંગે કહ્યું કે વિશ્વના બે સૌથી વધુ વસ્તી ધરાવતા દેશોએ મિત્ર બનવું જોઈએ.
ટ્રમ્પના સલાહકારે કરી હતી આલોચના
ટ્રમ્પના વેપાર સલાહકાર પીટર નવારોએ રશિયા અને ચીનના નેતાઓ સાથે વડાપ્રધાન નરેન્દ્ર મોદીની નિકટતા સામે વાંધો ઉઠાવ્યો હતો. નવારોએ કહ્યું હતું કે મોદી માટે શી જિનપિંગ અને વ્લાદિમીર પુતિન સાથે ઊભા રહેવું શરમજનક છે. તેમણે પ્રશ્ન ઉઠાવ્યો હતો કે અમને ખબર નથી કે મોદી શું વિચારી રહ્યા છે, અમને આશા છે કે તેઓ સમજશે કે તેમણે રશિયાને બદલે અમારી સાથે રહેવું જોઈએ.
