કોંગ્રેસ પ્રવક્તા પવન ખેડાની મુશ્કેલીઓ હવે તેમના બે ઓળખ કાર્ડ નંબરોને લઈને વધવાની છે. આ કેસમાં ચૂંટણી પંચે તેમને નોટિસ ફટકારી છે અને જવાબ માંગ્યો છે. નવી દિલ્હી જિલ્લા ચૂંટણી કાર્યાલયે કોંગ્રેસ નેતા પવન ખેડાને એક કરતાં વધુ મતવિસ્તારની મતદાર યાદીમાં પોતાનું નામ નોંધાવવા બદલ નોટિસ મોકલી છે.
તમને જણાવી દઈએ કે ભારતીય જનતા પાર્ટી (ભાજપ) આઈટી સેલના વડા અમિત માલવિયાએ મત ચોરીના મામલે કોંગ્રેસ પર વળતો પ્રહાર કરતા પવન ખેડા પર ગંભીર આરોપો લગાવ્યા હતા. તેમણે દાવો કર્યો હતો કે પવન ખેડાએ બે મતવિસ્તારની મતદાર યાદીમાં પોતાનું નામ નોંધાવ્યું છે. તેમણે ખેડાના બે ઓળખ કાર્ડ નંબર પણ શેર કર્યા હતા. આમાંથી એક નંબર જંગપુરા વિધાનસભા મતવિસ્તારમાં છે અને બીજો નવી દિલ્હી વિધાનસભા મતવિસ્તારમાં છે, જે અનુક્રમે પૂર્વ દિલ્હી અને નવી દિલ્હી લોકસભા મતવિસ્તાર હેઠળ આવે છે.
એક તરફ કોંગ્રેસ નેતા રાહુલ ગાંધી તેમની “મતદાર અધિકાર યાત્રા” દ્વારા ભાજપ પર ચૂંટણીમાં ગોટાળાના ગંભીર આરોપો લગાવી રહ્યા છે, તો બીજી તરફ ભાજપે કોંગ્રેસના પ્રવક્તા પવન ખેડા પર નિશાન સાધ્યું છે. ભાજપે દાવો કર્યો છે કે પવન ખેડા પાસે બે સક્રિય મતદાર ઓળખપત્રો છે, જે ચૂંટણી કાયદાનું સીધું ઉલ્લંઘન છે.
મંગળવારે ભાજપ આઇટી સેલના વડા અમિત માલવિયાએ એક સોશિયલ મીડિયા પોસ્ટમાં દાવો કર્યો હતો કે પવન ખેરાના નામે બે સક્રિય EPIC નંબર નોંધાયેલા છે. એક જંગપુરા વિધાનસભા મતવિસ્તાર (પૂર્વ દિલ્હી લોકસભા બેઠક) અને બીજો નવી દિલ્હી વિધાનસભા મતવિસ્તાર (નવી દિલ્હી લોકસભા બેઠક)નો છે.
માલવિયાએ કહ્યું – “હવે ચૂંટણી પંચ માટે તપાસનો વિષય છે કે પવન ખેરા પાસે બે મતદાર ઓળખપત્રો કેવી રીતે છે અને શું તેમણે એક કરતા વધુ વખત મતદાન કર્યું છે. આ ચૂંટણી કાયદાનું ખુલ્લેઆમ ઉલ્લંઘન છે.”
