કર્ણાટકના નાયબ મુખ્યમંત્રી ડીકે શિવકુમારે રાષ્ટ્રીય સ્વયંસેવક સંઘ (RSS) ની પ્રાર્થના ગાવાના વિવાદ વચ્ચે મંગળવારે ફરી સ્પષ્ટતા કરી છે. તેમણે બેંગલુરુમાં કહ્યું- ‘હું ગાંધી પરિવાર અને કોંગ્રેસ પાર્ટી પ્રત્યે મારી વફાદારીનો પુનરોચ્ચાર કરવા માંગુ છું. હું કોંગ્રેસમાં જન્મ્યો છું અને કોંગ્રેસમાં જ મરીશ. હું આખા દેશને આ સંદેશ આપવા માંગુ છું કે હું કોંગ્રેસને સંપૂર્ણપણે સમર્પિત છું. ગાંધી પરિવાર મારા માટે ભગવાન છે અને હું તેમનો ભક્ત છું.
નાયબ મુખ્યમંત્રીએ કહ્યું- મારો ક્યારેય RSS ની પ્રશંસા કરવાનો ઇરાદો નહોતો. ભાજપે મને તિહાર જેલમાં નાખીને હેરાન કર્યો હતો. જો કોઈને દુઃખ થયું હોય તો હું માફી માંગુ છું. જણાવી દઈએ કે ડીકે શિવકુમારે 21 ઓગસ્ટના રોજ વિધાનસભામાં RSS પ્રાર્થના ગીત ‘નમસ્તે સદા વાત્સલે માતૃભુમે’ ની કેટલીક પંક્તિઓ ગાઈ હતી. આ પછી કોંગ્રેસ સાથેના તેમના સંઘર્ષની અટકળો તેજ થઈ ગઈ હતી. એવું કહેવામાં આવી રહ્યું હતું કે તેઓ ગમે ત્યારે ભાજપમાં જોડાઈ શકે છે.
21 ઓગસ્ટના રોજ કર્ણાટક વિધાનસભામાં ચિન્નાસ્વામી સ્ટેડિયમમાં થયેલી ભાગદોડ (4 જૂન) પર ચર્ચા ચાલી રહી હતી. આ દરમિયાન ભાજપના ધારાસભ્ય આર. અશોકે વિધાનસભામાં શિવકુમાર તરફ ઈશારો કર્યો અને કહ્યું કે કર્ણાટક સરકારે આરસીબી ભાગદોડની જવાબદારી લેવી જોઈએ.
આ અંગે ડેપ્યુટી સીએમ શિવકુમારે કહ્યું કે તેઓ ભાજપની ચાલાકીઓ વિશે બધું જાણે છે. ત્યારબાદ તેમણે ભાજપના ધારાસભ્ય સાથેની ચર્ચા દરમિયાન આરએસએસની પ્રાર્થના ‘નમસ્તે સદા વાત્સલે માતૃભુમે’ ની 2 પંક્તિઓ ગાઈ. આ દરમિયાન કોંગ્રેસ છાવણી તેમજ વિપક્ષ ચોંકી ગયા. શિવકુમારનો આ વીડિયો સોશિયલ મીડિયા પર પણ વાયરલ થયો હતો.
શિવકુમારે બીજા દિવસે કહ્યું હતું – હું જન્મજાત કોંગ્રેસી છું
22 ઓગસ્ટના રોજ શિવકુમારે આ બાબતે સ્પષ્ટતા આપી હતી. જ્યારે તેમને વિધાનસભાની બહાર પૂછવામાં આવ્યું કે શું વિધાનસભામાં આરએસએસ વંદના વાંચવી એ કોઈ પ્રકારનો સંકેત છે ત્યારે તેમણે કહ્યું કે હું જન્મજાત કોંગ્રેસી છું. મારું લોહી, મારું જીવન, બધું કોંગ્રેસમાં છે. હું કોંગ્રેસનું સંપૂર્ણ તાકાતથી નેતૃત્વ કરીશ.
