અનિલ અંબાણીની મુશ્કેલીઓ વધી રહી છે. ED પછી હવે CBI 17,000 કરોડ રૂપિયાના બેંક છેતરપિંડીના કેસમાં અનિલ અંબાણી સાથે સંકળાયેલા સ્થળોએ શોધખોળ કરી રહી છે. CBI સવારે 7 વાગ્યાથી અનિલ અંબાણીના ઘરે દરોડા પાડી રહી છે. CBIના 7 થી 8 અધિકારીઓ સર્ચ ઓપરેશન ચલાવી રહ્યા છે.
અધિકારીઓ સવારે લગભગ 7 થી 8 વાગ્યે કફ પરેડ સીવિન્ડ સ્થિત તેમના નિવાસસ્થાને પહોંચ્યા અને ત્યારથી શોધખોળ ચાલુ છે. અનિલ અંબાણી અને તેમનો પરિવાર નિવાસસ્થાને હાજર છે. અગાઉ, ED દ્વારા અનિલ અંબાણીની પૂછપરછ કરવામાં આવી હતી.
17,000 કરોડના કથિત લોન છેતરપિંડી કેસની ચાલી રહેલી તપાસના સંદર્ભમાં ED એ રિલાયન્સ ગ્રુપના ચેરમેન અને MD અનિલ અંબાણીને પૂછપરછ માટે બોલાવ્યા હતા. તે પહેલાં પણ EDએ અનિલ અંબાણી સાથે જોડાયેલી વ્યવસાયિક સંસ્થાઓ પર દરોડા પાડ્યા હતા. EDએ રિલાયન્સ ગ્રુપ સાથે જોડાયેલા 50 વ્યવસાયિક સંસ્થાઓ અને 25 વ્યક્તિઓ પર દરોડા પાડ્યા હતા. આ દરોડા 24 જુલાઈના રોજ મુંબઈમાં ઓછામાં ઓછા 35 સ્થળોએ પાડવામાં આવ્યા હતા.
સીબીઆઈએ એફઆઈઆર દાખલ કરી હતી
દરોડા પહેલા સીબીઆઈએ બે એફઆઈઆર દાખલ કરી હતી, ત્યારબાદ ઇડીએ દરોડા પાડ્યા હતા. હવે સીબીઆઈ પણ તપાસ કરી રહી છે. આ દરોડા 17000 કરોડ રૂપિયાના કથિત બેંક લોન છેતરપિંડી અંગે છે, જે યસ બેંક દ્વારા નાણાકીય વર્ષ 2017-19 વચ્ચે અનિલ અંબાણીની કંપનીઓને ગેરકાયદેસર રીતે લોન તરીકે ટ્રાન્સફર કરવામાં આવ્યા હતા.
ED સૂત્રોના જણાવ્યા અનુસાર અનિલ અંબાણીની કંપનીઓને લોન આપવામાં આવે તે પહેલાં યસ બેંકના પ્રમોટરોને તેમના વ્યવસાયમાં મોટી રકમ મળી હતી. આ જ કારણ છે કે લાંચ અને બંને વચ્ચેના જોડાણની તપાસ કરવામાં આવી રહી છે.
