જસ્ટિસ યશવંત વર્માને તેમના પદ પરથી હટાવવાની પ્રક્રિયા ઝડપી બની છે. દિલ્હીમાં તેમના નિવાસસ્થાનેથી બળી ગયેલી રોકડના બંડલ મળ્યા બાદ વિપક્ષ અને શાસક પક્ષના સાંસદોએ તેમના વિરુદ્ધ લોકસભાના અધ્યક્ષ અને રાજ્યસભાના અધ્યક્ષને નોટિસ સુપરત કરી છે. આ વિવાદ બાદ યશવંત વર્માને દિલ્હી હાઈકોર્ટથી અલ્હાબાદ હાઈકોર્ટ પરત મોકલવામાં આવ્યા છે.
લોકસભામાં 145 સાંસદોએ મળીને જસ્ટિસ વર્માને હટાવવા માટે નોટિસ આપી છે. આમાં વિપક્ષી નેતા રાહુલ ગાંધી, ભાજપના રવિશંકર પ્રસાદ અને અનુરાગ ઠાકુર, કોંગ્રેસના કેસી વેણુગોપાલ અને કે સુરેશ, એનસીપી-એસપીના સુપ્રિયા સુલે, ડીએમકેના ટીઆર બાલુ, આરએસપીના એનકે પ્રેમચંદ્રન અને આઈયુએમએલના ઇટી મોહમ્મદ બશીર જેવા ઘણા દિગ્ગજ નેતાઓના નામ શામેલ છે.
રાજ્યસભામાં પણ 63 સાંસદોએ આ જ માંગણી કરતી નોટિસ આપી છે. કોંગ્રેસના સાંસદ સૈયદ નસીર હુસૈને જણાવ્યું હતું કે આમ આદમી પાર્ટી અને વિપક્ષી ઈન્ડિયા એલાયન્સના સાંસદોએ પણ આ નોટિસ પર હસ્તાક્ષર કર્યા છે. તેમણે કહ્યું કે તૃણમૂલ કોંગ્રેસના સાંસદો સોમવારે હાજર ન હોવા છતાં તેઓ પણ આ મુદ્દા પર સાથે છે અને ટૂંક સમયમાં તેમના હસ્તાક્ષર રજૂ કરશે.
ન્યાયાધીશને દૂર કરવાની પ્રક્રિયા બંધારણની કલમ ૧૨૪, ૨૧૭ અને ૨૧૮ હેઠળ નક્કી કરવામાં આવી છે. લોકસભામાં ઓછામાં ઓછા ૧૦૦ સાંસદો અને રાજ્યસભામાં ઓછામાં ઓછા ૫૦ સાંસદોના હસ્તાક્ષર જરૂરી છે. જો લોકસભા અધ્યક્ષ અને રાજ્યસભાના અધ્યક્ષ બંને નોટિસ સ્વીકારે છે તો તપાસ સમિતિની રચના કરવામાં આવે છે. આ સમિતિમાં સુપ્રીમ કોર્ટના એક વરિષ્ઠ ન્યાયાધીશ, હાઈકોર્ટના વર્તમાન મુખ્ય ન્યાયાધીશ અને એક પ્રખ્યાત કાનૂની નિષ્ણાતનો સમાવેશ થાય છે. આ સમિતિ ત્રણ મહિનાની અંદર સંસદમાં તપાસ અહેવાલ રજૂ કરશે. રિપોર્ટના આધારે સંસદમાં ચર્ચા થશે અને પછી મતદાન પછી નિર્ણય લેવામાં આવશે.
ન્યાયાધીશ યશવંત વર્મા સામે શું આરોપો છે?
તાજેતરમાં દિલ્હીમાં તેમના નિવાસસ્થાનેથી બળી ગયેલી નોટો મળી આવી હતી. ન્યાયાધીશ વર્માએ કોઈપણ ખોટું કામ કર્યાનો ઇનકાર કર્યો છે પરંતુ તપાસ સમિતિના પ્રારંભિક અહેવાલમાં જણાવાયું છે કે જે રૂમમાંથી રોકડ મળી આવી હતી તે જજ યશવંત વર્મા અને તેમના પરિવાર દ્વારા પ્રત્યક્ષ કે પરોક્ષ રીતે નિયંત્રિત હતી. આને ગંભીર અનુશાસનહીનતા માનવામાં આવી છે.
