દિલ્હીમાં ફરી એકવાર લોહિયાળ ગેંગ વોર જોવા મળી છે. શહેરના બાવાના વિસ્તારમાં મોર્નિંગ વોક પર જતા 30 વર્ષીય યુવકને બદમાશોએ ગોળી મારી દીધી હતી. ગોળીબારમાં માર્યો ગયેલો દીપક દિલ્હીના કુખ્યાત માફિયા મનજીત મહલનો ભત્રીજો હોવાનું કહેવાય છે.
જો દિલ્હી પોલીસના સૂત્રો પર વિશ્વાસ કરવામાં આવે તો, લંડનમાં રહેતો કુખ્યાત ગેંગસ્ટર નંદુ આ હત્યા પાછળ હોઈ શકે છે. અહીંથી ભાગી ગયેલા અને લંડનમાં રહેતા નંદુ વિરુદ્ધ રેડ કોર્નર નોટિસ જારી કરવામાં આવી છે. હકીકતમાં નંદુ અને મનજીત મહલ વચ્ચે વર્ષોથી દુશ્મનાવટ ચાલી રહી છે, જેમાં અત્યાર સુધીમાં બંને પક્ષે એક ડઝન લોકો માર્યા ગયા છે. મનજીત સાથેની દુશ્મનાવટને કારણે, નંદુએ 2 વર્ષ પહેલાં એક ભાજપના નેતાની પણ હત્યા કરી હતી.
દિલ્હીમાં એક પછી એક હત્યાના સમાચાર જે રીતે બહાર આવી રહ્યા છે તેનાથી કાયદો અને વ્યવસ્થા પર ગંભીર પ્રશ્નો ઉભા થયા છે. ગયા વર્ષે નવેમ્બરમાં પણ દિલ્હીના મુંડકા વિસ્તારમાં ગેંગ વોરના સમાચાર આવ્યા હતા. અહીં બાઇક સવાર બદમાશોએ તેમના વિરોધી ગેંગના અમિત નામના વ્યક્તિની ગોળી મારીને હત્યા કરી હતી. પોલીસ અધિકારીઓના જણાવ્યા અનુસાર 22 વર્ષીય બદમાશ અમિત તાજેતરમાં જેલમાંથી બહાર આવ્યો હતો અને તેના પર ટિલ્લુ તાજપુરિયા ગેંગે હુમલો કર્યો હતો.
