ICC એ મહિલા વર્લ્ડ કપ 2025 ના સ્થળ અને તારીખોની જાહેરાત કરી છે. ભારત આ ટુર્નામેન્ટનું આયોજન કરી રહ્યું છે. આ મહિલા વર્લ્ડ કપનું 13મું સંસ્કરણ હશે, જે 30 સપ્ટેમ્બરથી 2 નવેમ્બર દરમિયાન બેંગલુરુ, ગુવાહાટી, ઇન્દોર, વિશાખાપટ્ટનમ અને કોલંબોમાં રમાશે.
મહિલા વર્લ્ડ કપ 12 વર્ષ પછી ભારતમાં પરત ફરવા જઈ રહ્યો છે. મહિલા T20 વર્લ્ડ કપ 2016 માં ભારતમાં રમાયો હતો. આ ટુર્નામેન્ટમાં કુલ 8 ટીમો ભાગ લેશે, જેમાં યજમાન ભારત, ઓસ્ટ્રેલિયા, ઇંગ્લેન્ડ, ન્યુઝીલેન્ડ, દક્ષિણ આફ્રિકા, શ્રીલંકા, પાકિસ્તાન અને બાંગ્લાદેશનો સમાવેશ થાય છે. ઓસ્ટ્રેલિયા ડિફેન્ડિંગ ચેમ્પિયન તરીકે ટુર્નામેન્ટમાં પ્રવેશ કરશે, જેણે 2022 માં ન્યુઝીલેન્ડમાં યોજાયેલા મહિલા વર્લ્ડ કપ 2022 ની ફાઇનલમાં ઇંગ્લેન્ડને હરાવ્યું હતું. ઓસ્ટ્રેલિયા ટુર્નામેન્ટના ઇતિહાસમાં સૌથી સફળ ટીમ પણ છે જે સાત વખત ચેમ્પિયન બની છે.
પાકિસ્તાન અહીં પોતાની મેચ રમશે
ભારતમાં આ ટુર્નામેન્ટની મેચો બેંગલુરુના એમ. ચિન્નાસ્વામી સ્ટેડિયમ, ગુવાહાટીના એસીએ સ્ટેડિયમ, ઇન્દોરના હોલકર સ્ટેડિયમ અને વિશાખાપટ્ટનમના એસીએ-વીડીસીએ સ્ટેડિયમમાં રમાશે. જોકે પાકિસ્તાનની ટીમ વર્લ્ડ કપમાં ભાગ લેવા માટે ભારત નહીં આવે. પાકિસ્તાનની ટીમ કોલંબોના આર પ્રેમદાસા સ્ટેડિયમમાં પોતાની વર્લ્ડ કપ મેચ રમશે. બીજી તરફ ભારત 30 સપ્ટેમ્બરે બેંગલુરુમાં પોતાની પહેલી મેચ રમશે. આ ટુર્નામેન્ટ રાઉન્ડ-રોબિન ધોરણે રમાશે જેમાં કુલ 28 લીગ સ્ટેજ મેચ રમાશે. આ પછી 2 સેમીફાઇનલ અને એક ફાઇનલ રમાશે.
ફાઇનલ 2 નવેમ્બરે રમાશે
જો પાકિસ્તાનની ટીમ સેમીફાઇનલ અને ફાઇનલમાં પહોંચે છે તો મેચો કોલંબોમાં રમાશે. આ જ કારણ છે કે પહેલી સેમિફાઇનલ 29 ઓક્ટોબરે ગુવાહાટી અથવા કોલંબોમાં રમાશે, જ્યારે બીજી સેમિફાઇનલ બીજા દિવસે 30 ઓક્ટોબરે બેંગલુરુમાં રમાશે. આ પછી બંને ફાઇનલિસ્ટ પાસે ટાઇટલના નિર્ણાયક મેચની તૈયારી માટે ઓછામાં ઓછા બે દિવસનો સમય હશે જેમાં 2025 મહિલા વર્લ્ડ કપની ફાઇનલ 2 નવેમ્બર, રવિવારના રોજ બેંગલુરુ અથવા કોલંબોમાં યોજાશે.
T20 વર્લ્ડ કપ 2026 12 જૂનથી શરૂ થશે
ઇંગ્લેન્ડને ICC મહિલા વર્લ્ડ કપ 2025 તેમજ આવતા વર્ષે રમાનારી ICC મહિલા T20 વર્લ્ડ કપ 2026 ના યજમાન તરીકે પુષ્ટિ મળી છે. મહિલા T20 વર્લ્ડ કપ 2026 12 જૂને બર્મિંગહામના એજબેસ્ટન ખાતે શરૂ થશે, જેમાં ઇંગ્લેન્ડની ટીમ પ્રથમ મેચ રમશે. ફાઇનલ 5 જુલાઈએ રમાશે. આ 24 દિવસ દરમિયાન કુલ 33 મેચ 7 સ્થળોએ રમાશે, જેમાં બર્મિંગહામ (એજબેસ્ટન), લંડન (ધ ઓવલ અને લોર્ડ્સ) ઓલ્ડ ટ્રેફોર્ડ ક્રિકેટ ગ્રાઉન્ડ (માન્ચેસ્ટર), હેડિંગલી (લીડ્સ), ધ હેમ્પશાયર બાઉલ (સાઉથમ્પ્ટન) અને બ્રિસ્ટોલ કાઉન્ટી ગ્રાઉન્ડનો સમાવેશ થાય છે. ઓવલ બંને સેમિફાઇનલ મેચનું આયોજન કરશે જ્યારે ફાઇનલ 5 જુલાઈ, 2026 ના રોજ આઇકોનિક લોર્ડ્સ ક્રિકેટ ગ્રાઉન્ડ પર યોજાશે. બંને સેમિફાઇનલ 30 જૂન અને 2 જુલાઈ, 2026 ના રોજ લંડનના ધ ઓવલ ખાતે રમાશે.
