પ્રધાનમંત્રી નરેન્દ્ર મોદી આજે સવારે પંજાબના આદમપુર એરબેઝ પહોંચ્યા. અહીં તેઓ વાયુસેનાના જવાનોને મળ્યા. પીએમ મોદી આજે સવારે 7 વાગ્યે દિલ્હીના પાલમ એરપોર્ટથી ઉડાન ભરીને પંજાબના જલંધરમાં આદમપુર એરબેઝ પહોંચ્યા હતા. પીએમ મોદી અહીં 1 કલાક રોકાયા અને વાયુસેનાના જવાનોને મળ્યા હતા. તસવીરોમાં પ્રધાનમંત્રી મોદી વાયુસેનાના જવાનો સાથે જોવા મળે છે.
વડાપ્રધાનનું વિમાન આદમપુર એરબેઝ પર ઉતર્યા પછી તે સાબિત થયું કે પાકિસ્તાનનો આ એરબેઝને ઉડાવી દીધાનો દાવો સંપૂર્ણપણે ખોટો હતો. કારણ કે ભારતના સૌથી VVIP નું વિમાન આ એરબેઝ પર સફળતાપૂર્વક ઉતર્યું હતું.
તમને જણાવી દઈએ કે આદમપુર એરબેઝ ભારતના ફાઇટર એરક્રાફ્ટ મિગ 29 નું બેઝ છે. એર ચીફ માર્શલ એપી સિંહ પણ પ્રધાનમંત્રી સાથે હતા. પાકિસ્તાન સરહદની નજીક આવેલું આદમપુર એરબેઝ દુશ્મન પર ઝડપી હુમલો કરવા માટે જાણીતું છે.
આ એરબેઝ પર પીએમ મોદીનો એક ફોટો ખૂબ ચર્ચામાં છે. આ તસવીરમાં લખ્યું છે કે દુશ્મનના પાઇલટ્સ સારી રીતે કેમ ઊંઘતા નથી. આ તસવીરમાં પીએમ મોદી વાયુસેનાના સૈનિકોની ટોપી પહેરેલા છે.
આ મુલાકાત વિશે માહિતી આપતાં પીએમ મોદીએ ટ્વીટ કરીને લખ્યું, આજે સવારે મેં AFS આદમપુરની મુલાકાત લીધી અને આપણા બહાદુર વાયુસેના યોદ્ધાઓ અને સૈનિકોને મળ્યા. હિંમત, દૃઢનિશ્ચય અને નિર્ભયતાના પ્રતીક એવા લોકો સાથે રહેવું ખૂબ જ ખાસ અનુભવ હતો. ભારત આપણા સશસ્ત્ર દળો આપણા દેશ માટે જે કંઈ કરે છે તેના માટે હંમેશા આભારી રહેશે.
આદમપુર એરબેઝ પર પ્રધાનમંત્રી મોદીએ ઓપરેશન સિંદૂર અને ત્યારબાદ પાકિસ્તાન સામે ભારતીય હુમલાઓને અંજામ આપનારા ફાઇટર પાઇલટ્સ અને ટેકનિકલ સપોર્ટ સ્ટાફને પણ મળ્યા. ખુદ વડાપ્રધાન મોદીએ વાયુસેનાના આ બહાદુર સૈનિકોને મળવાની ઇચ્છા વ્યક્ત કરી હતી.
