ભારતે 15 દિવસ પછી આતંકના ગઢમાં પ્રવેશ કરીને જમ્મુ અને કાશ્મીરના પહેલગામમાં 22 એપ્રિલ 2025 ના રોજ થયેલા આતંકવાદી હુમલામાં માર્યા ગયેલા 26 લોકોના મોતનો બદલો લીધો. ભારતે પાકિસ્તાનમાં ઘૂસીને લશ્કર-એ-તૈયબા, જૈશ-એ-મોહમ્મદ અને હિઝબુલ મુજાહિદ્દીનના 9 ઠેકાણાઓને નિશાન બનાવ્યા. દરમિયાન ઓપરેશન સિંદૂર હેઠળ મુરીદકેમાં મરકઝ તૈયબા પર થયેલા હુમલામાં લશ્કર-એ-તૈયબાના HVT (હાઈ વેલ્યુ ટેરરિસ્ટ) અબ્દુલ મલિક અને મુદસ્સિર માર્યા ગયા છે.
આ ઉપરાંત મસૂદ અઝહરના પરિવારના 14 લોકોના મોત થયા છે અને મસૂદનો ભાઈ રઉફ અસગર ગંભીર રીતે ઘાયલ થયો છે. માર્યા ગયેલા લોકોમાં રૌફની પત્ની પણ હતી. આ સાથે, લશ્કરના બે વધુ આતંકવાદી, વકાસ અને હસન પણ માર્યા ગયા. સેનાએ એક પ્રેસ કોન્ફરન્સમાં માહિતી આપી હતી કે ભારતીય સેનાએ પાકિસ્તાનના કોઈપણ લશ્કરી ઠેકાણાને નિશાન બનાવ્યું નથી, તેણે ફક્ત આતંકવાદી ઠેકાણાઓનો નાશ કર્યો છે.
પાકિસ્તાનમાં શાળાઓ અને કોલેજો બંધ
પાકિસ્તાનની રાજધાની ઇસ્લામાબાદમાં તમામ જાહેર અને ખાનગી ક્ષેત્રની શાળાઓ અને કોલેજો બંધ રાખવાનો આદેશ જારી કરવામાં આવ્યો છે. ડિસ્ટ્રિક્ટ મેજિસ્ટ્રેટ ઓફિસ ઇસ્લામાબાદે એક આદેશમાં જણાવ્યું હતું કે પ્રવર્તમાન સુરક્ષા પરિસ્થિતિને કારણે ઇસ્લામાબાદ કેપિટલ ટેરિટરીના અધિકારક્ષેત્રમાં આવતી તમામ જાહેર અને ખાનગી ક્ષેત્રની શાળાઓ અને કોલેજો 07 મે, 2025 (બુધવાર) ના રોજ બંધ રહેશે. જોકે બધી સુનિશ્ચિત પરીક્ષાઓ 7 મેના રોજ આયોજન મુજબ યોજાશે અને તેની કોઈ અસર થશે નહીં.
પીએમ નરેન્દ્ર મોદી આ સમગ્ર લશ્કરી કાર્યવાહી પર સતત નજર રાખી રહ્યા હતા. ભારતીય સેનાના પ્રવક્તાએ કહ્યું કે, અમારા હુમલાઓ કેન્દ્રિત અને સચોટ હતા. અમે ફક્ત તે આતંકવાદી ઠેકાણાઓને નિશાન બનાવ્યા જ્યાંથી ભારત વિરુદ્ધ હુમલાઓનું આયોજન કરવામાં આવ્યું હતું. પ્રધાનમંત્રી નરેન્દ્ર મોદી અને વરિષ્ઠ અધિકારીઓએ આખી રાત ઓપરેશનની પ્રગતિ પર નજર રાખી. સૂત્રોએ પુષ્ટિ આપી કે વડા પ્રધાન રાષ્ટ્રીય સુરક્ષા સલાહકારો અને લશ્કરી કમાન્ડરો સાથે સતત સંપર્કમાં હતા જેથી ખાતરી કરી શકાય કે ઓપરેશન યોજના મુજબ આગળ વધે.
