સોશિયલ મીડિયામાં ભાઈગીરીની રિલ્સ બનાવી લોકો પર રોફ જમાવવાનો ટ્રેન્ડ વધ્યો છે, ત્યારે સુરત શહેર પોલીસે આવા હવાબાજોની મસ્તી ઉતારવા માટે અભિયાન હાથ ધર્યું છે. ગેંગ્સ્ટરની સ્ટાઈલમાં લોકોમાં ડર ફેલાવાનારા શખ્સોને હવે સુરત શહેર પોલીસ સબક શીખવી રહી છે. તાજેતરમાં લિંબાયત વિસ્તારમાં દાદાગીરી કરતા અસ્ફાક નામના ઈસમ વિરુદ્ધ પોલીસે કાર્યવાહી કરી છે. પોલીસે કાન આમળતા અસ્ફાકે જાહેરમાં માફી માંગી છે.
લિંબાયત વિસ્તારના અસ્ફાક નામના શખ્સ ઉપર મારામારીનો કેસ નોધાઇ ચુક્યો છે. તે પોતાને સોશિયલ મીડિયામાં રીલ દ્વારા “માફિયા” તરીકે રજૂ કરવાનો પ્રયાસ કર્યો હતો. આ વીડિયો પોલીસની નજરમાં આવતા જ આખો ખેલ ફેરવાઈ ગયો અને અસ્ફાક માફી માગતો નજરે ચડ્યો.
પોલીસની સખત કાર્યવાહી પછી અસ્ફાકે માફી માગતા કહ્યું કે હવે તે સુધરવા માગે છે. પોલીસે ન માત્ર તેની બધી મસ્તી ઉતારી નાખી પણ તેના બધા સોશિયલ મીડિયા એકાઉન્ટ્સ પણ ડિલીટ કરાવી દીધા છે.
અસ્ફાક અગાઉ પણ મારામારી જેવા ગુનાઓમાં પોલીસ ચોપડે ચડી ચૂક્યો છે. હવે જો તે ફરીથી આવા વીડિયો બનાવવાનો પ્રયાસ કરશે, તો સુરત પોલીસ તેની સામે વધુ કડક પગલાં ભરશે. પોલીસે આવા તત્વોને સ્પષ્ટ સંદેશ આપ્યો છે કે જો ભાઈગીરી કરશો, તો પોલીસ તમને છોડશે નહીં.
નોંધનીય છે કે સોશિયલ મીડિયામાં ભાઈગીરી અને ગેંગસ્ટર ઍટિટ્યુડ નહિ ચાલે તેવો સાફ મેસેજ સુરત પોલીસે આપ્યો છે. રીલ્સમાં ગુંડાગીરી બતાવતા ઈસમો હવે પોલીસના રડાર પર છે. તાજેતરમાં પોલીસ બુલડોઝર એક્શન પણ લઈ રહી છે, જ્યાં આવા શખ્સો જે ગુનાહિત પ્રવૃત્તિઓમાં સામેલ છે, તેમની સંપત્તિઓ પર કાર્યવાહી કરવામાં આવી રહી છે.
