એર ઇન્ડિયાની ફ્લાઇટ મુંબઈથી ન્યૂ યોર્ક માટે ઉડાન ભરી હતી પરંતુ બોમ્બની ધમકી મળ્યા બાદ વિમાનને ઉતાવળે મુંબઈ એરપોર્ટ પર પાછું ઉતરાણ કરવું પડ્યું.
આ ઘટના આજે સોમવારે સવારે 10.30 વાગ્યાની આસપાસ બની હતી. એર ઇન્ડિયાનું વિમાન મુંબઈના છત્રપતિ શિવાજી મહારાજ આંતરરાષ્ટ્રીય એરપોર્ટથી ન્યૂયોર્ક માટે ઉડાન ભરી રહ્યું હતું. પરંતુ વચ્ચે જ વિમાનમાં બોમ્બ મુકવાનો ભય હતો જેના પછી વિમાનને મુંબઈ એરપોર્ટ પર પાછું ઉતારવું પડ્યું.
સૂત્રોનું કહેવું છે કે વિમાનના શૌચાલયમાંથી એક ચિઠ્ઠી મળી આવી હતી, જેમાં કહેવામાં આવ્યું હતું કે વિમાનમાં બોમ્બ રાખવામાં આવ્યો હતો. આ ઘટના પછી એર ઇન્ડિયાએ એક નિવેદન બહાર પાડીને પુષ્ટિ આપી હતી કે આ સંદર્ભમાં તમામ જરૂરી પ્રોટોકોલનું પાલન કરવામાં આવ્યું હતું.
એર ઇન્ડિયાના પ્રવક્તાએ જણાવ્યું હતું કે આજે ૧૦ માર્ચે મુંબઈથી ન્યૂયોર્ક જતી ફ્લાઇટ AI119 માં સંભવિત ખતરો જોવા મળ્યો હતો. જરૂરી પ્રોટોકોલનું પાલન કર્યા પછી બધા મુસાફરોની સલામતીના હિતમાં વિમાનને મુંબઈ પાછું લેન્ડ કરવામાં આવ્યું. અમારી ટીમો મુસાફરોને ઓછામાં ઓછી અસુવિધા થાય તે માટે જમીન પર કામ કરી રહી છે.
હંમેશની જેમ એર ઇન્ડિયા મુસાફરો અને ક્રૂ સભ્યોની સલામતીને સર્વોચ્ચ પ્રાથમિકતા આપે છે. એરલાઇને જણાવ્યું હતું કે ફ્લાઇટ હવે 11 માર્ચે સવારે 5 વાગ્યે ફરીથી શેડ્યૂલ કરવામાં આવી છે. ત્યાં સુધી તમામ મુસાફરોને ભોજન અને રહેવાની તમામ સુવિધાઓ પૂરી પાડવામાં આવી છે. આ વિમાનમાં 19 ક્રૂ મેમ્બર સહિત 322 લોકો સવાર હતા.
