નવસારી : આજે નવસારીમાં પ્રધાનમંત્રી નરેન્દ્ર મોદીએ વિવિધ વિકાસલક્ષી કાર્યોનો શુભારંભ કરાવ્યો હતો. આંતરરાષ્ટ્રીય મહિલા દિવસ નિમિત્તે ઉપસ્થિત જનમેદનીને સંબોધતા તેમણે મોટી સંખ્યામાં ઉપસ્થિત માતાઓ, બહેનો અને દીકરીઓના પ્રેમ, સ્નેહ અને આશીર્વાદ બદલ આભાર વ્યક્ત કર્યો હતો અને આ ખાસ દિવસે દેશની તમામ મહિલાઓને શુભકામનાઓ પાઠવી હતી. તેમણે ઉમેર્યું હતું કે આજે માતૃશક્તિનાં મહાકુંભમાં તેમને મા ગંગાનાં આશીર્વાદ મળ્યાં હતાં. પ્રધાનમંત્રીએ આજે ગુજરાતમાં બે યોજનાઓ-જી-સફલ (આજીવિકા વધારવા માટે અંત્યોદય પરિવારો માટેની ગુજરાત યોજના) અને જી-મૈત્રી (પરિવર્તનશીલ ગ્રામીણ આવક માટે વ્યક્તિઓની વૃદ્ધિ માટે ગુજરાત માર્ગદર્શક અને પ્રવેગક) લોંચ કરવાની બાબત પર પ્રકાશ પાડ્યો હતો. તેમણે એમ પણ જણાવ્યું હતું કે વિવિધ યોજનાઓના ભંડોળને મહિલાઓના બેંક ખાતાઓમાં સીધા સ્થાનાંતરિત કરવામાં આવ્યા છે અને આ સિદ્ધિ બદલ દરેકને અભિનંદન આપ્યા હતા.
મોદીએ ઉલ્લેખ કર્યો હતો કે, આજનો દિવસ મહિલાઓ માટે સમર્પિત છે અને તેમણે તમામનો આભાર માન્યો હતો તથા ગર્વભેર જણાવ્યું હતું કે, તેઓ પૈસાની દ્રષ્ટિએ નહીં, પણ કરોડો માતાઓ, બહેનો અને પુત્રીઓનાં આશીર્વાદને કારણે પોતાને દુનિયામાં સૌથી ધનિક વ્યક્તિ માને છે. તેમણે ભારપૂર્વક જણાવ્યું હતું કે “આ આશીર્વાદો મારી સૌથી મોટી તાકાત, મૂડી અને રક્ષણાત્મક ઢાલ છે.”
મહિલાઓનું સન્માન કરવાનાં મહત્ત્વ પર ભાર મૂકીને પ્રધાનમંત્રીએ જણાવ્યું હતું કે, અત્યારે ભારત દેશની ઝડપી પ્રગતિ માટે મહિલાઓનાં નેતૃત્વમાં વિકાસનાં માર્ગે અગ્રેસર છે. તેમણે ટિપ્પણી કરી હતી કે સરકાર મહિલાઓના જીવનમાં આદર અને સુવિધા બંનેને પ્રાધાન્ય આપે છે. તેમણે કરોડો મહિલાઓ માટે શૌચાલયોનાં નિર્માણનો ઉલ્લેખ કર્યો હતો, જેને ‘ઇજ્જત ઘર’ અથવા “પ્રતિષ્ઠિત ઘર” તરીકે પણ ઓળખવામાં આવે છે. જેણે તેમની ગરિમામાં વધારો કર્યો છે અને કરોડો મહિલાઓ માટે બેંક ખાતાઓ ખોલવાની સાથે તેમને બેંકિંગ સિસ્ટમમાં સંકલિત કરી છે. તેમણે મહિલાઓને ધુમાડાની મુશ્કેલીઓથી બચાવવા ઉજ્જવલા સિલિન્ડરની જોગવાઈ પર પણ પ્રકાશ પાડ્યો હતો.
વડાપ્રધાને નોંધ્યું હતું કે, સરકારે શ્રમજીવી મહિલાઓ માટે માતૃત્વની રજાને 12 અઠવાડિયાથી વધારીને 26 અઠવાડિયા કરી છે. તેમણે મુસ્લિમ બહેનોની ત્રણ તલાક વિરુદ્ધ કાયદો બનાવવાની માંગને સ્વીકારી હતી અને જણાવ્યું હતું કે સરકારે લાખો મુસ્લિમ બહેનોના જીવનની સુરક્ષા માટે કડક કાયદો બનાવ્યો છે. તેમણે એમ પણ જણાવ્યું હતું કે જ્યારે જમ્મુ-કાશ્મીરમાં કલમ 370 લાગુ હતી ત્યારે મહિલાઓને ઘણા અધિકારોથી વંચિત રાખવામાં આવી હતી. જો તેઓ રાજ્યની બહાર કોઈની સાથે લગ્ન કરે તો તેઓએ પૂર્વજોની સંપત્તિ પરનો તેમનો અધિકાર ગુમાવે પરંતુ કલમ 370 દૂર થતાં, જમ્મુ-કાશ્મીરમાં મહિલાઓને હવે તેમના અધિકારો પ્રાપ્ત થયા છે.
સમાજ, સરકાર અને મોટી સંસ્થાઓનાં વિવિધ સ્તરે મહિલાઓ માટે વધી રહેલી તકો પર ભાર મૂકીને પ્રધાનમંત્રીએ કહ્યું હતું કે, “રાજકારણ હોય, રમતગમત હોય, ન્યાયતંત્ર હોય કે પોલીસ હોય, દરેક ક્ષેત્રમાં મહિલાઓ ઉત્કૃષ્ટ પ્રદર્શન કરી રહી છે.” તેમણે નોંધ્યું હતું કે, વર્ષ 2014થી મહિલાઓની મહત્ત્વપૂર્ણ હોદ્દાઓ પર ભાગીદારીમાં નોંધપાત્ર વધારો થયો છે.
વડાપ્રધાને મોદીએ જણાવ્યું હતું કે ગુજરાતની મહિલાઓની તાકાત અને તેમનું યોગદાન કોઈ એક ક્ષેત્ર પૂરતું મર્યાદિત નથી. મોદીએ જણાવ્યું હતું કે, ગુજરાતની પંચાયતોની ચૂંટણીમાં 50 ટકા બેઠકો મહિલાઓ માટે અનામત છે. તેમણે નોંધ્યું હતું કે, જ્યારે તેમને પ્રધાનમંત્રી સ્વરૂપે દિલ્હી મોકલવામાં આવ્યાં હતાં, ત્યારે તેમણે આ જ પ્રકારનો અનુભવ અને પ્રતિબદ્ધતા દેશને આપી હતી. તેમણે નોંધ્યું હતું કે, નવી સંસદમાં પસાર થયેલો પ્રથમ ખરડો મહિલા સશક્તીકરણ માટે હતો, જે નારી શક્તિ વંદન અધિનિયમ તરીકે ઓળખાય છે. તેમણે ગર્વભેર ઉલ્લેખ કર્યો હતો કે, આ ખરડાને રાષ્ટ્રપતિએ મંજૂરી આપી હતી, જેઓ આદિવાસી પૃષ્ઠભૂમિમાંથી આવે છે. પ્રધાનમંત્રીએ વિશ્વાસ વ્યક્ત કર્યો હતો કે, એ દિવસ દૂર નથી, જ્યારે ઉપસ્થિત મહિલાઓમાંથી કોઈ એક સાંસદ કે ધારાસભ્ય બનીને આ પ્રકારનાં મંચ પર બેસશે.
વાંસી-બોરસી ખાતે યોજાયેલા લખપતિ દીદી સન્માન સમારોહમાં મુખ્ય સ્ટેજ પર 18 મહિલાઓને અગ્ર હરોળમાં સ્થાન અપાયું. સાથે જ વડાપ્રધાને નારી શક્તિ સમક્ષ હાથ જોડી નમસ્કાર કરી શીશ ઝુકાવી સૌજન્યપૂર્ણ આભાર પ્રગટ કર્યો હતો. જોકે સરકારે લખપતિ દીદીઓ માટે એસ.ટી. બસ ફાળવી સાથે જ લખપતિ દીદીઓની સંભાળ માટે આરોગ્ય કર્મીઓનો સ્ટાફ સાથે રહ્યો હતો. વિશ્વ મહિલા દિવસે વડાપ્રધાનની સભા સ્થળે સુરક્ષાની જવાબદારી મહિલા પોલીસે બખૂબી નિભાવી દુનિયાને મિસાલ પૂરી પાડી છે. તો બીજી તરફ વડાપ્રધાનને સખી મંડળની મહિલાઓ દ્વારા વિવિધ પ્રોડક્ટની ભેટ, કચ્છની મહિલાઓ દ્વારા મિરર વર્કથી બનાવેલું સ્મૃતિ ચિન્હ અને જામનગરની બહેનોએ રબારી વર્કથી બનાવેલું સ્મૃતિચિહ્ન ભેટ સ્વરૂપે આપી અભૂતપૂર્વ સ્વાગત કર્યું હતું.
