વડોદરા શહેરમાં રખડતાં ઢોરના પ્રશ્નને ધ્યાનમાં રાખીને મંગળવાર સવારથી બુધવાર સાંજે 5 વાગ્યા સુધી શહેર મહાનગર પાલિકા દ્વારા વિશેષ કામગીરી હાથ ધરવામાં આવી. આ અભિયાન અંતર્ગત કુલ 29 રખડતાં ઢોર પકડવામાં આવ્યા, જે શહેરના વિવિધ વિસ્તારમાં રખડતાં હતા. શહેરમાં રખડતાં ઢોરને પકડવા માટે પાલિકા દ્વારા પાંચ અલગ-અલગ લોકેશન પસંદ કરવામાં આવ્યા હતા, જ્યાં ખાસ ટીમોની રચના કરવામાં આવી હતી. જેમાં એસ્સાર પેટ્રોલ પંપ હરણી, વારસિયા રિંગ રોડ, ખોડીયાર નગરથી રજીવનગર, ફતેગંજ વોર્ડ ઓફિસથી વુડા ઓફિસ, ઈનઓરબીટ મોલથી ગોરવા પોલીસ મથક સહિતના વિસ્તારોમાં પાલિકાની ઢોર પાર્ટી દ્વારા સઘન કાર્યવાહી કરવામાં આવી હતી. વડોદરા મહાનગર પાલિકાના આ અભિયાનથી રાહદારીઓ અને વાહનચાલકોને થતી અસુવિધામાં રાહત મળશે. અનેકવાર રખડતાં ઢોરના કારણે અકસ્માતો અને ટ્રાફિક જામની પરિસ્થિતિ સર્જાતી હોય છે. તાજેતરમાં જ રખડતાં ઢોરને કારણે એક વ્યક્તિનો જીવ પણ ગયો હતો. જોકે, આ અભિયાન એક તાત્કાલિક પગલું છે, અને લાંબા ગાળાની કાયમી વ્યવસ્થા માટે પાલિકા દ્વારા વધુ સક્રિય ઉકેલ લાવવામાં આવવો જોઈએ. મહાનગર પાલિકા દ્વારા રખડતાં ઢોર પર વધુ નિયંત્રણ માટે આગામી સમયમાં વધુ સઘન કાર્યવાહી હાથ ધરવામાં આવી શકે છે. તેમ છતાં, શહેરમાં રખડતાં ઢોરના મુદ્દે સમસ્યા હજી યથાવત્ છે, અને પાલિકાને આ દિશામાં સતત પ્રયત્નો કરવા પડશે.
