સુરતઃ શહેરના કતારગામ GIDC વિસ્તારમાં એક ચોંકાવનારી ઘટના બની છે. અહીં એક કારીગર એમ્બ્રોઈડરી મશીનમાં ફસાઈ ગયો હતો. આ ઘટના બની ત્યારે કારખાનામાં કારીગર એકલો જ હતો. મશીનમાં ફસાયા બાદ લગભગ એક કલાક સુધી તે બુમો પાડતો રહ્યો હતો, પરંતુ કોઈ સાંભળી રહ્યું નહોતું.
પાડોશીઓએ બૂમો સાંભળી તપાસ કરતા કારીગર મશીનમાં ગળા સુધી ફસાયેલી હાલતમાં મળી આવ્યો હતો. દુર્ઘટનાને પગલે સમગ્ર વિસ્તારમાં ચકચાર મચી ગઈ હતી. ફાયર બ્રિગેડે મહામહેનતે કારીગરને મશીનમાંથી બહાર કાઢી તેની તેનો જીવ બચાવ્યો હતો.
વધુમાં મળતી વિગત અનુસાર કતારગામની વિશ્વકર્મા સોસાયટીના ઘર નંબર-17માં આ ઘટના બની હતી. અહીં એક કારખાનામાં પરવેઝ નામનો કારીગર એમ્બ્રોઈડરી મશીન પર કામ કરી રહ્યો હતો. તે કામ કરતી વખતે કોઈક રીતે એમ્બ્રોઈડરીના મશીનમાં ફસાઈ ગયો હતો. કારખાનામાં તે એકલો જ હતો. તેથી તેની હાલતની જાણ નહોતી અને તે અંદરથી બૂમો પાડી રહ્યો હતો. જોકે પાડોશીઓએ અવાજ સાંભળ્યા બાદ દરવાજો તોડીને અંદર પ્રવેશ કર્યો અને ફાયર વિભાગને જાણ કરી.
ફાયર વિભાગને માહિતી મળતાંની સાથે જ રેસ્ક્યુ-ઓપરેશન હાથ ધરવામાં આવ્યું હતું. ફાયર બ્રિગેડના લાશ્કરોએ ઘટનાસ્થળે પહોંચીને પેન્ટોગ્રાફ કાપીને અને કટરની મદદથી કારીગરને બચાવવામાં આવ્યો. એક કલાક ફસાયેલા રહેલા પરવેઝને બેભાન હાલતમાં બહાર લાવવામાં આવ્યો અને તાત્કાલિક સ્મિમેર હોસ્પિટલ ખસેડવામાં આવ્યો, જ્યાં ગળાના ભાગે 10 ટાંકા લાગ્યા. હાલ તેની તબિયત સ્થિર છે અને સજાગ અવસ્થામાં આવ્યા બાદ તેનું અધિકૃત નિવેદન લેવામાં આવશે.
પોલીસે મકાનમાલિક દિનેશ કાપડિયા અને કારખાના-સંચાલક દિનેશભાઈ પાલડિયાનાં નિવેદન લઈ વધુ તપાસ શરૂ કરી છે, જોકે હજુ સુધી કેટલીક મહત્ત્વની બાબતો વણઉકેલી છે.
