તમિલનાડુ ભારતીય જનતા પાર્ટીના પ્રમુખ અને ભૂતપૂર્વ IPS અધિકારી કે. અન્નામલાઈએ આજે કોઈમ્બતુરમાં પોતાના ઘરની બહાર પોતાને કોરડા મારીને અનોખો વિરોધ દર્શાવ્યો હતો. આજથી તેમણે મુરુગન દીક્ષાના 48 દિવસની શરૂઆત કરી છે. અન્નામલાઈએ ભીષ્મ પ્રતિજ્ઞા પણ લીધી છે કે જ્યાં સુધી તમિલનાડુમાંથી ડીએમકે સરકાર હટાવવામાં નહીં આવે ત્યાં સુધી તેઓ પગમાં ચપ્પલ નહીં પહેરે.
અન્નામલાઈએ અન્ના યુનિવર્સિટીમાં યૌન ઉત્પીડનની ઘટનાને લઈને ડીએમકે સરકાર સામે વિરોધ કરવા માટે શુક્રવારે પોતાને કોરડા માર્યા હતા અને જ્યારે તેમણે છ-આઠ કોરડા માર્યા હતા, ત્યારે પાછળ ઉભેલા લોકોમાંથી એક તેમની તરફ દોડ્યો હતો અને તેમને આવું કરતા અટકાવ્યે હતે.
રાજ્યમાં ભાજપ જાતીય સતામણી પીડિતા માટે ન્યાય અને સરકારની જવાબદારી નક્કી કરવાની માંગ કરી રહી છે. ગુરુવારે કોઈમ્બતુરમાં ડીએમકે સરકારને હટાવવા સુધી ઉઘાડપગું રહેવાની પ્રતિજ્ઞા લેનારા અન્નામલાઈએ ડીએમકે સરકાર પર ગંભીર આરોપ લગાવતા કહ્યું કે આરોપી ડીએમકેનો કાર્યકર હોવાથી તંત્રએ જાણીજોઈને પીડિતાની એફઆઈઆર લીક કરી. અને એફઆઈઆર દ્વારા પીડિતાના ચરિત્ર સામે આંગળી ચીંધવાનું કામ કર્યું.
અગાઉ અન્ના મલાઈએ વચન આપ્યું હતું કે જ્યાં સુધી દ્રવિડ મુનેત્ર કઝગમ (ડીએમકે) સરકાર હટાવવામાં ન આવે ત્યાં સુધી તેઓ ચપ્પલ પહેરશે નહીં અને ખુલ્લા પગે ચાલશે. આ દરમિયાન તેમણે પોતાને કોરડા મારવાની પણ જાહેરાત કરી હતી. અન્નામલાઈએ કહ્યું હતું કે અન્ના યુનિવર્સિટીની વિદ્યાર્થીની પર થયેલા યૌન શોષણની ઘટના તરફ લોકોનું ધ્યાન દોરવા માટે 27 ડિસેમ્બરે સવારે 10 વાગ્યે તેઓ પોતાના ઘરની બહાર છ વાર કોરડા મારશે.
તેમણે કહ્યું હતું કે આરોપી ગણશેકરન ડીએમકેનો અધિકારી છે, જ્યારે સત્તાધારી પક્ષે આ વાતને નકારી કાઢી છે. ભાજપના નેતાએ ડીએમકે નેતાઓ સાથે આરોપીઓની તસવીરો બતાવી અને આરોપ લગાવ્યો કે તે શાસક પક્ષની વિદ્યાર્થી પાંખનો પદાધિકારી છે. તમિલનાડુના કાયદા મંત્રી એસ રઘુપતિએ કહ્યું કે જાતીય સતામણીના કેસમાં આરોપી ડીએમકેનો પ્રાથમિક સભ્ય પણ નથી.
બીજેપી નેતા અન્નામલાઈએ કહ્યું કે આરોપી ડીએમકે સાથે સંકળાયેલો હોવાથી પોલીસે તેની સામે કાર્યવાહી કરી નથી. તે આવા ગુનાઓને રોકવા માટે નિર્ભયા ફંડના ઉપયોગ વિશે જાણવા માંગતા હતા. અન્નામલાઈએ એફઆઈઆર લખવાની રીત પર પણ સવાલ ઉઠાવ્યા અને કહ્યું કે તે એવી રીતે લખવામાં આવી છે જાણે પીડિતાએ ગુનો કર્યો હોય. ડીએમકે (સરકાર)ને પીડિતાની ઓળખ જાહેર કરવામાં શરમ આવવી જોઈએ. તેમણે જાહેરાત કરી કે જ્યાં સુધી ડીએમકે સરકારને હટાવવામાં ન આવે ત્યાં સુધી તેઓ જૂતા પહેરશે નહીં. બીજેપી નેતાએ કહ્યું કે તેઓ ભગવાન મુરુગાની પૂજા કરીને 48-દિવસીય ‘વિરથમ’ (આધ્યાત્મિક ઉપવાસ) નું પાલન કરશે અને ફેબ્રુઆરી 2025 સુધી રાજ્યના તમામ છ ‘અરુપદાઈ’ મંદિરોમાં પ્રાર્થના કરશે.
