સુરત: સુરત સેન્ટ્રલ રેલવે સ્ટેશનને આંતરરાષ્ટ્રીય એરપોર્ટ સમાન બનાવવા અને મુસાફરોને વિશ્વસ્તરીય સુવિધાઓ આપવા રીડેવલપ કરવામાં આવી રહ્યું છે. રેલવે, એસ.ટી. બસ, મેટ્રો રેલ તથા BRTS- સુરત સિટી બસસેવાની તમામ ટ્રાન્સપોર્ટેશનની સુવિધા એક છત્ર નીચે ઉપલબ્ધ બને એવા હેતુથી MMTH (મલ્ટી મોડલ ટ્રાન્સપોર્ટ હબ) પ્રોજેક્ટ રાજ્ય સરકાર, રેલવે વિભાગ અને સુરત મહાનગરપાલિકા દ્વારા હાથ ધરવામાં આવ્યો છે. આ પ્રોજેક્ટ 2026ના અંત સુધીમાં પૂર્ણ થાય એવી ગણતરી છે.
- સુરતમાં મલ્ટી-મોડલ ટ્રાન્સપોર્ટ હબ પ્રોજેક્ટ 2026ના અંત સુધીમાં પૂર્ણ થશે
- સુરત રેલવે સ્ટેશનને ઈન્ટીગ્રૅશન ઓફ ઓલ મોડ્સ ઓફ ટ્રાન્સપોર્ટ્સ તરીકે વિકસાવવા આયોજન, કામગીરી પૂરજોશમાં
MMTH પ્રોજેક્ટની પ્રસ્તાવિત સુવિધાઓમાં સરળ અને સુવિધાયુક્ત પ્રવેશ, વધુ સારી કનેક્ટિવિટી, સુરતની પૂર્વ બાજુને કનેક્ટિવિટી પૂરી પાડવા માટેનો નવો પૂર્વ-પશ્ચિમ માર્ગ, રેલવે પ્લેટફોર્મ, GSTRC ટર્મિનલને વિના અવરોધ કનેક્ટિવિટી માટે પેસેન્જર ઇન્ટરચેન્જ પ્લાઝાના રૂપમાં સેન્ટ્રલ કોનકોર્સ અને વોકવેનો સમાવેશ થાય છે. મુસાફરો માટે BRTS/સિટી બસ ટર્મિનલ, પાર્કિંગ ઝોન, મનોરંજન વિસ્તાર, કોમર્શિયલ બિલ્ડીંગ્સ, એલિવેટેડ કોરિડોર, સ્કાયવોક્સ વગેરે સુવિધાઓને આવરી લેવામાં આવી છે. આ પ્રોજેક્ટમાં રેલવે મંત્રાલય 63%, રાજ્ય સરકાર 34% અને સુરત મનપા 3% ખર્ચ વહન કરી રહી છે.
વેસ્ટર્ન રેલવેના ચીફ પી.આર.ઓ. વિનીત અભિષેકે જણાવ્યું હતું કે, MMTH પ્રોજેક્ટ અંતર્ગત 62,129 ચોરસ મીટર જમીન પર ઇસ્ટ સ્ટેશન બિલ્ડીંગ, 26,297 ચોરસ મીટર જમીન પર વેસ્ટ સ્ટેશન બિલ્ડીંગ, 33,188 ચોરસ મીટર જમીન પર એસ.ટી. (GSRTC) બસ સ્ટેશન અને ૫.૫૦ કિમી લાંબા એલિવેટેડ કોરિડોરનું કામ પ્રગતિમાં છે. એલિવેટેડ કોરિડોર સુગમ વાહનવ્યવહારની કનેક્ટિવિટી માટે ઇસ્ટ, વેસ્ટ બિલ્ડીંગ અને આસપાસના ફ્લાયઓવર્સને જોડાશે. આ પ્રોજેક્ટને 2026ના અંત સુધીમાં પૂર્ણ કરવાનું આયોજન છે.
