દેશમાં ઠંડી અને ધુમ્મસની અસર સતત વધી રહી છે. હવામાન વિભાગે મધ્યપ્રદેશ, ઉત્તર પ્રદેશ, રાજસ્થાન, હિમાચલ પ્રદેશ, દિલ્હી, હરિયાણા અને બિહારમાં એક-બે દિવસ ગાઢ ધુમ્મસની ચેતવણી જારી કરી છે. ઠંડીની અસર સૌથી વધુ રાજસ્થાનમાં જોવા મળી રહી છે. ફતેહપુર, સીકરમાં મંગળવારે લઘુત્તમ તાપમાન 6.5 ડિગ્રી સેલ્સિયસ પર પહોંચ્યું હતું. ભરતપુરમાં ધુમ્મસના કારણે વિઝિબિલિટી 50 મીટરથી ઓછી રહી હતી. જો કે દેશમાં સૌથી ઓછી વિઝિબિલિટી (ઝીરો મીટર) આગ્રામાં નોંધાઈ હતી. હવામાન વિભાગના જણાવ્યા અનુસાર આગામી થોડા દિવસોમા અહીં ધુમ્મસ યથાવત રહેશે.
બીજી તરફ મધ્યપ્રદેશમાં પણ ભોપાલ, ગ્વાલિયર, ભીંડ, મોરેના અને દતિયામાં ગાઢ ધુમ્મસ જોવા મળ્યું હતું. જેના કારણે વિઝિબિલિટીમાં નોંધપાત્ર ઘટાડો થયો હતો. હવામાન વિભાગે કહ્યું છે કે પહાડોમાં હિમવર્ષાના કારણે મધ્યપ્રદેશમાં ઠંડી વધી છે. જમ્મુ-કાશ્મીરના શ્રીનગરમાં હિમવર્ષા ચાલુ છે. સોનમર્ગમાં સોમવારે સાંજે શરૂ થયેલી હિમવર્ષા મંગળવારે સવારે પણ ચાલુ રહી હતી. જેના કારણે સમગ્ર ઉત્તર ભારતમાં તાપમાનમાં ઘટાડો નોંધાયો હતો.
મધ્યપ્રદેશમાં ઠંડા પવનોને કારણે ઠંડીમાં વધારો થયો છે. ગ્વાલિયરમાં મંગળવારે સવારે ગાઢ ધુમ્મસ છવાયું હતું. વિઝિબિલિટી 500 થી 1 હજાર મીટર સુધી નોંધાઈ હતી. રાત્રિનું તાપમાન 3.9 ડિગ્રી ઘટીને 12.3 ડિગ્રી થયું હતું, જે સામાન્ય કરતાં ઓછું હતું. આ વખતે નવેમ્બરમાં પહેલીવાર ગ્વાલિયરમાં આટલી ઠંડી પડી હતી. દતિયા, ભીંડ, મુરેના અને નિવારીમાં પણ ધુમ્મસની અસર જોવા મળી હતી.
અહીં ભોપાલમાં સવારે ફૂંકાતા ઠંડા પવનોને કારણે લોકો થરથરી ગયા હતા. અહીં હળવું ધુમ્મસ પણ હતું. જોકે, પારામાં કોઈ વધારો થયો ન હતો અને તે 14 ડિગ્રી નોંધાયો હતો. ઈન્દોરમાં 16.5 ડિગ્રી, ઉજ્જૈનમાં 15.2 ડિગ્રી અને જબલપુરમાં 13 ડિગ્રી તાપમાન નોંધાયું હતું. સોમવાર-મંગળવારની રાત્રે પચમઢી સૌથી ઠંડું રહ્યું હતું. અહીં તાપમાનનો પારો 8 ડિગ્રી નોંધાયો હતો. રવિવાર-સોમવારની રાત્રિની સરખામણીમાં પારામાં નજીવો ઘટાડો નોંધાયો હતો.
ઉત્તર દિશાના પવનોને કારણે ઠંડીમાં વધારો થશે
જમ્મુ-કાશ્મીર અને લદ્દાખમાં હિમવર્ષા શરૂ થઈ ગઈ છે. જેટ સ્ટ્રીમ પવનો પણ ફૂંકાઈ રહ્યા છે. આવી સ્થિતિમાં ઉત્તરીય પવનો પણ મધ્યપ્રદેશમાં આવશે જેના કારણે ઠંડીમાં વધારો થશે. આગામી દિવસોમાં તાપમાનનો પારો વધુ ગગડી શકે છે. હવે દિવસના સરેરાશ તાપમાનમાં 2 ડિગ્રીનો ઘટાડો થયો છે. 15 થી વધુ શહેરોમાં રાત્રિનું તાપમાન 15 ડિગ્રી સેલ્સિયસથી નીચે છે. રાજ્યમાં ઠંડીમાં વધારો થતાં શાળાઓના સમયમાં પણ ફેરફાર થયો છે. ભોપાલમાં ઘણી શાળાઓનો સમય 30 મિનિટ આગળ કરવામાં આવ્યો છે. ઈન્દોર, ઉજ્જૈન, જબલપુર અને ગ્વાલિયરમાં પણ સમય બદલાશે.
નવેમ્બરમાં આવા હવામાનનું કારણ
હવામાન વિભાગના જણાવ્યા અનુસાર પશ્ચિમ-ઉત્તર ભારતમાં જેટસ્ટ્રીમ પવનો ફૂંકાઈ રહ્યા છે. દક્ષિણ ભાગમાં સાયક્લોનિક સર્ક્યુલેશન સિસ્ટમ સક્રિય છે. જેટ સ્ટ્રીમ પવનની ઝડપ વધવાને કારણે તેની અસર રાજ્યમાં જોવા મળશે. અત્યારે પવન આવી રહ્યો છે પણ તેની ઝડપ ઓછી છે.
