નવી દિલ્હીઃ અમેરિકાના પ્રેસિડેન્ટની ચૂંટણીમાં ડોનાલ્ડ ટ્રમ્પના વિજયને બુધવારે ભારતીય શેરબજારે આવકાર્યું હતું. બજાર ઉછળ્યું હતું. પરંતુ એક જ દિવસમાં ટ્રમ્પની જીતનો નશો ઉતરી ગયો હતો. આજે ગુરુવારે શેરબજાર તૂટ્યું હતું.
ગુરુવારે સવારથી જ શેરબજાર તૂટ્યું હતં તે દિવસના અંત સુધી રિકવર થઈ શક્યું ન હતું. આજે સપ્તાહના ચોથા ટ્રેડિંગ દિવસે સેન્સેક્સ-નિફ્ટી ગ્રીન ઝોનમાં ખુલ્યા પછી તૂટવા માંડ્યું હતું. ટ્રેડિંગના અંતે સેન્સેક્સ 836 પોઈન્ટના ઘટાડા સાથે બંધ રહ્યો હતો જ્યારે નિફ્ટી 284 પોઈન્ટના ઘટાડા સાથે બંધ થયો હતો. દિવસ દરમિયાન ટાટાથી રિલાયન્સ સુધી તમામ શેરની કિંમતમાં ભારે ઘટાડો નોંધાયો હતો.
સપ્તાહના ચોથા કારોબારી દિવસે આજે ગુરુવારે સેન્સેક્સ 800 પોઈન્ટથી વધુના ઘટાડા બાદ બંધ થયો હતો અને તેના અગાઉના બંધ 80,378.13ની સરખામણીમાં લગભગ 200 પોઈન્ટના ઉછાળા સાથે બીએસઈ (BSE) સેન્સેક્સ 80,563.42 ના સ્તરે ખુલ્યો હતો અને 900 પોઈન્ટ્સ ઘટ્યો હતો. બજાર બંધ થયા પછી આ ઘટાડામાં નજીવો ઘટાડો થયો હતો પરંતુ તેમ છતાં બોમ્બે સ્ટોક એક્સચેન્જનો 30 શેરનો સેન્સેક્સ 836.34 પોઈન્ટ અથવા 1.04 ટકા ઘટીને 79,541.79 પર બંધ થયો હતો.
નિફ્ટી 24200 ની નીચે સરકી ગયો
નિફ્ટીમાં પણ ઘટાડો શરૂઆતથી જ ચાલુ રહ્યો અને જેમ જેમ માર્કેટમાં ટ્રેડિંગ આગળ વધતું ગયું તેમ તેમ તે ઝડપી બન્યું. બુધવારે તેના 24,484.05 ના બંધની તુલનામાં નિફ્ટી ઇન્ડેક્સ નજીવા વધારા સાથે 24,489.60 ના સ્તરે ખૂલ્યો હતો અને થોડીવારમાં તે 200 પોઇન્ટ સુધી લપસી ગયો હતો. ત્યાર બાદ નિફ્ટી પણ સેન્સેક્સની જેમ ઘટ્યો અને ટ્રેડિંગના અંતે એનએસઈ ઇન્ડેક્સ 284.70 પોઈન્ટ અથવા 1.16 ટકા ઘટીને 24,199.35 ના સ્તરે બંધ થયો હતો.
આ 10 શેરો સૌથી વધુ તૂટ્યા
આજે ગુરુવારે જે શેર્સ વિલન સાબિત થયા હતા તેમાં ટાટાથી લઈને રિલાયન્સ સુધીના શેરો સામેલ હતા, જે મોટા ઘટાડા સાથે બંધ થયા હતા. બીએસઈ લાર્જકેપમાં ટાટા મોટર્સનો શેર 2.36% ઘટીને રૂ. 819.80 પર, ટેક મહિન્દ્રાનો શેર 2.21% ઘટીને રૂ. 1656 પર, જ્યારે JSW સ્ટીલનો શેર 1.99% ઘટીને રૂ. 988.75 પર બંધ થયો. આ સિવાય ટાઇટન (1.81%), ટાટા સ્ટીલ (1.76%) અને રિલાયન્સ (1.50%) ઘટીને બંધ થયા.
મિડકેપ કેટેગરીમાં સામેલ ગ્લેનમાર્ક શેર 6.27% ઘટીને રૂ. 1658 પર બંધ થયો હતો, અજંતા ફાર્મા શેર 4.46% ઘટીને રૂ. 2981 પર અને મુથૂટફાઇનાન્સ શેર 3.79% ઘટીને રૂ. 1823.25 પર બંધ થયો હતો. સ્મોલકેપ કેટેગરીમાં સૌથી મોટો ઘટાડો વેન્કીઝ શેરમાં આવ્યો હતો અને તે 8.56% ઘટીને રૂ. 1733.35 પર બંધ થયો હતો.
શું કહે છે નિષ્ણાતો?
જિયો ફાઇનાન્શિયલ સર્વિસિસના મુખ્ય રોકાણ વ્યૂહરચનાકાર વીકે વિજયકુમારે જણાવ્યું હતું કે ટ્રમ્પ ટ્રેડે અમેરિકી બજારોને રાતોરાત તેજી તરફ દોરી ગયા છે. પરંતુ ભારતમાં તેની સમાન હકારાત્મક અસર થવાની શક્યતા નથી. કારણ કે ભારતીય બજારનું વેલ્યુએશન ઊંચું છે અને શક્યતા છે.
દરમિયાન ફિલિપકેપિટલની એક નોંધમાં જણાવાયું છે કે મોટા પ્રમાણમાં FII આઉટફ્લો અને મંદીની ચિંતાને કારણે નિફ્ટી તેની તાજેતરની ટોચ પરથી 8 ટકા નીચે આવી ગઈ છે. નુવામાએ એમ પણ જણાવ્યું હતું કે ઊંચા સ્થાનિક સ્ટોક વેલ્યુએશનની અસર અને આવક વૃદ્ધિમાં નબળાઈ તેમજ બોન્ડ યીલ્ડમાં વધારો અથવા વૈશ્વિક વેપારમાં નબળાઈને કારણે બજારોમાં વધઘટની શક્યતાઓ બજાર પર દેખાઈ રહી છે.
